kraamaat@gmail.com
+ +92 333-430-6384


پنجاب وچ تحریک انصاف دی حکومت عوامی مسئلیاں دے حل وچ ناکام ہو چکی: بلاول بھٹو زرداری……٭رویل نیوز٭


نمائندا رویل July 22, 2020


لاہور (نمایندا رویل) پاکستان پیپلز پارٹی دے چیئرمین بلاول بھٹو زرداری دا کہنا اے کہ پیپلز پارٹی ای پنجاب دی لوکائی دے مسئلیاں نُوں حل کر سکدی اے۔ پی پی پنجاب دے آگو بزدار سرکار دیاں نا اہلیاں نُوں لوکائی وچ اجاگر کرن۔ تفصیلات دے مطابق پاکستان پیپلز پارٹی دے چیئرمین بلاول بھٹو زرداری دی اگوائی وچ بلاول ہاؤس وچ اہم اجلاس ہویا‘ اجلاس وچ پی پی پی اراکین پنجاب کابینا‘ اراکین صوبائی اسمبلی‘ پارٹی دے مختلف ذیلی ونگز دے آگوواں نے رلت کیتی۔ اجلاس وچ سینئر آگو اعتزاز احسن‘ قمر زمان کایرا‘ اسلم گِل‘ چودھری منظور‘ حسن مرتضیٰ تے عثمان سلیم ملک نے وی رلت کیتی۔ اجلاس دوران صوبے دی سیاسی صورتحال اُتے غور کیتا گیا۔ اجلاس دے رلتیاں نے اپوزیشن نُوں متحد کرن دے حوالے توں چیئرمین بلاول بھٹو زرداری دیاں کاوشاں نُوں سلاہیا جد کہ پاکستان پیپلز پارٹی نُوں پورے پنجاب وچ سیاسی طور اُتے ہور فعال کرن دا فیصلا کیتا گیا۔ بلاول بھٹو نے پی پی پنجاب دے آگوواں نُوں بزدار سرکار دیاں نا اہلیاں نُوں لوکائی وچ اجاگر کرن دا ٹاسک دے دِتا۔ بلاول بھٹو دا کہنا سی کہ پیپلز پارٹی پنجاب دے کارکنان گھر گھر جا کے لوکائی نُوں پی ٹی آئی سرکار دیاں نا اہلیاں توں اگاہ کرن‘ پنجاب وچ تحریک انصاف دی حکومت عوامی مسئلیاں دے حل وچ ناکام ہو چکی اے۔ گل نُوں جاری رکھدیاں ہویاں اوہناں نے کہیا کہ وباء دے دناں وچ شعبا صحت وچ پنجاب سرکار دی ناکامی نے لوکائی دیاں زندگیاں نُوں خطرے وچ پایا‘ پیپلز پارٹی ای پنجاب دی لوکائی دے مسئلیاں نُوں حل کر سکدی اے۔ پیپلز پارٹی دے چیئرمین دا کہنا سی کہ وفاق وچ پی ٹی آئی سرکار نُوں پنجاب دے 483 ارب رُپیاں اُتے ڈاکا مارن نہیں دواں گے۔