الحمد اللہ آکھو تے شکر کرورب دا ـــ ٭رویل کالم٭

جے تُسیں رب سوہنے دے احساناں نوں یاد کردے ہوئے اوہدا شکر ادا کردے او تے فیر الحمد اللہ آکھن مگروں اک وار سجدہ وی دیو کیوں جے اوہنے تہانوں اپنا شکر اداکرن دی توفیق دتی ہوئی اے، نہیں تے ایس دُنیا وچ کئی انسان اِنج دے وی نیں جہناں نوں ایہ توفیق نہیں مل سکی تے اوہناں دا ناں نشان وی ایس دُنیا توں ختم ہو گیا۔

اج جدوں پوری دُنیا کرونا ورگے روگ کارن ڈاڈھی پریشان اے سگوں ہر وڈا ملک تے وڈی کارپوریشن وی ایہدے نقصان توں نہیں بچ سکی تے فیر ایہناں حالاں وچ وی تہاڈے کول بنک وچ یاں گھر وچ اٹھ دس لکھ روپیا ہیگا،جہنوں تُسیں کسے وی ویلے لوڑ پین اُتے یاں کُجھ گھنٹیاں وچ کسے وی اوکھے ویلے وچ ورت سکدے او تے بغیر کُجھ ہور سوچے اپنے مونہوں الحمد اللہ آکھو کہ رب سوہنے تہانوں ایس دُنیا وچ ایس مقام اُتے کھڑا کیتا اے جو صرف کل اَبادی دا پنج توں ست فیصد اے۔

اگانہ ودھو تے ہور سوچو کہ تہاڈے فون دی گھنٹی وجے تے دوجے پاسیوں کوئی بھائی، بھین یاں بیلی ہوئے تے اوہ کرونا کارن پریشان ہوئے تے تہاڈے کولوں تھوڑے پیسے منگ لوے تے تُسیں اوہدی مدد کردے ہوئے اوہنوں پیسے چھیتی نال گھل دیو یاں پیسے دین لئی راضی ہو جاؤ تے فیر آکھو۔الحمداللہ یا رب العالمین۔کیوں جے اوس رب رحیم نے تہانوں ایس دنیا دے اوہناں دو توں تن فیصد لوکاں وچ اُچا تھاں دِتا اے جہناں کول لوڑ توں ودھ اے تے اوہ کسے دوجے دی وی مدد کر سکدے نیں۔

رُکو تے غور کرو کہ تہاڈا اپنا گھر اے تے تسیں ہر روز سُتے اپنے بسترے وچوں نکل کے باتھ روم جاندے او،نہان لئی شاور کھولدے او تے سردیاں وچ گرم تے گرمیاں وچ مناسب ٹھنڈا پانی تہاڈے جُثے اُتے ڈِگدا،جہدے نال تُسیں تروتازا ہو جاندے فیر چنگا گرموں گرم ناشتاکردے او،اپنی سواری یاں گڈی وچ کم تے چلے جاندے او،سردیاں وچ گرما گرم ہیٹر تے گرمیاں وچ ٹھنڈے ایئر کنڈیشن ماحول نوں انجوائے کردے او۔تہاڈے بال دن وچ تن وار روٹی کھاندے او، بھرے ڈھڈ تُسیں سارے گھر والے رات نوں بسترے وچ وڑ جاندے او تے فیر سبھ توں پہلاں الحمد اللہ آکھو تے بار بار الحمد اللہ بولو تے جُھک جاؤ اوس رب اگے کیوں جے دُنیا دی 90فیصد ابادی دے رہن والے ایہناں سہولتاں بارے سوچ وی نہیں سکدے جو تُسیں کسے وی تکلیف دے بغیر بلکل غیر محسوس انداز وچ دن رات انجوائے کر رہے۔ایہ صرف تہاڈے رب دا تہاڈے اُتے احسان تے فضل اے۔

اگے آؤ تے ویکھو تُسیں ما شاء اللہ جدوں چاہو اپنے ہتھ پیر ہلا سکدے او، بانہ تے گوڈے موڑ سکدے او تے اپنے ہتھ بنا پیڑ دے گوڈیاں تیکر اپڑا سکدے او۔ تُسیں سوکھے ڈھنگ نال ساہ لیندے ہوئے آکسیجن اندر لیجا سکدے او تے کاربن ڈائی آکسائید باہر سُٹ سکدے او تے فیر جناب بغیر کسے وقفے دے سجداکرو تے سبھ توں پہلاں الحمد الحمد اللہ آکھو، کیوں جے تہاڈی گنتی اوہناں تھوڑے بھاگاں والے لوکاں وچ ہوندی اے جہنا ں نوں رب سوہنے نے ایہ سہولتاں دِتیاں نیں۔

بار بار الحمد اللہ آکھو تے ہُن اُٹھ کھلوو اپنے رب دے بندیاں دی مدد نو ں اینے اوکھے تے ماڑے حالات وچ۔ویکھو اپنے آلے دوالے،اپنے رشتے دارں تے بیلیاں وچ اوہ کون نیں جو حقدار نیں تے تہاڈی مدد تے ساتھ دے طلبگار اے۔کیوں جے ہُن اپنے رب دیاں نوازشاں نوں دوجیاں وچ ونڈن دا ویلا ہویا اے ایہ وبائی روگ نہیں سگوں ساڈی ازمایش تے امتحان اے۔یاد رکھو! ایہدے وچ کامیابی تہانوں اُچی تھاں اُتے لے جائے گی،انشاء اللہ۔بار بار الحمد اللہ آکھو۔جدوں تیکر کہ تہاڈا آخری ساہ نہ آ جائے۔بے شک ایہ زندگی،ایہ نعمتاں تے مہربانیا ں رب دا ساڈے اُتے اک وڈا احسان اے۔