وزیراعظم‘ وزیر اعلاپنجاب خلاف کارروائی لئی اپیل منظور،درخاست گزار مؤقف ثابت نہ کر سکے تے بھاری جرمانا ہووے گا: ریمارکس……٭رویل نیوز٭

لاہور (نیوز ڈیسک) چیف جسٹس لاہور ہائیکورٹ محمد قاسم خان دی عدالت نے کرونا وایرس دے حوالے توں وزیراعظم عمران خان تے وزیر اعلا پنجاب سردار عثمان بزدار خلاف کارروائی لئی دایر کیتی گئی درخاست اُتے رجسٹرار لاہور ہائیکورٹ آفس دا اعتراض ختم ہون دے بعد درخاست سنوائی لئی منظور کر لئی۔ درخاست دی منظوری یاں رَد ہون دے حوالے توں ہون والی سنوائی اُتے عدالت نے درخاست گزار توں پُچھیا کہ تُسیں کون او؟ جہدے اُتے درخاست گزار دَسیا کہ اوہ اے سی مکینک اے تے اوہدا ناں سید اظہر عباس اے جہدے اُتے عدالت نے ریمارکس دِتے کہ جاؤ جا کے اپنی روٹی روزی کماؤ عدالت وچ کیوں آ گئے او؟۔ درخاست گزار نے دَسیا کہ اوہ اشرف المخلوقات اے اوہدی وی کوئی ذمے داری اے‘ پاکستان کول کرونا بارے کوئی تحقیق نہیں اے۔ جہدے اُتے عدالت ریمارکس دِتے کہ تُسیں اپنا مؤقف ثابت نہ کر سکے تے بھاری جرمانا ہووے گا۔