دیس وچ 27کرونا دے روگی وفات پا گئے، مَوتاں دی مجموعی گنتی 5 ہزار 951 ہو گئی اے ……٭رویل نیوز٭

اسلام آباد (نمایندا رویل) پاکستان وچ کرونا وایرس نال ہور 27 بندے چلانا کر گئے جد کہ 903 نویں کیسز رپورٹ ہوئے نیں‘ کرونا نال مَوتاں دی مجموعی گنتی 5 ہزار 951 ہو گئی اے تے 2 لکھ 78 ہزار 305 بندے متاثر نیں جد کہ پورے ملک وچ کرونا دے 2 لکھ 47 ہزار 117 روگی صحت یاب ہو چکے نیں۔ نیشنل کمانڈ اینڈ آپریشنل سینٹر ولوں جاری آنکڑیاں دے مطابق ایس ویلے پورے ملک وچ کرونا دے ایکٹیو کیساں دی گنتی 25 ہزار 347 اے۔ پچھلے 24 گھنٹیاں دے دوران 20 ہزا ر 507 کرونا ٹیسٹ کیتے گئے۔ پنجاب وچ کرونا وایرس نال واصل ہون والے بندیاں دی گنتی 2 ہزار 140 ہو گئی اے جد کہ پورے ملک دے ہسپتالاں وچ 210 روگی وینٹی لیٹر اُتے نیں۔ این سی او سی دے مطابق ہسپتالاں وچ کرونا وینٹی لیٹرز دی گنتی 1 ہزار 859 اے جد کہ 1 ہزار 771 روگی ایس ویلے ہسپتالاں وچ داخل نیں۔