kraamaat@gmail.com
+ +92 333-430-6384


معافی ناما 1947 ــــــ٭رویل شاعری٭


امرجیت سنگھ امنیت August 07, 2020


معافی ناما 1947 ــــــ٭رویل شاعری٭

پنجے دریاواں دے جائیو ! میرے بھراوو !!

حاکماں نے سانوں ایہ

کہی اَزادی دتی سی

کہ ساڈے اندر دے پشواں دے

رَسے کھلھ گئے

تے اسیں پشو ہو ورت گئے

کجھ نہ وگڑیا حاکماں دا

اَسیں اپنے ڈھڈّ آپے ہی پاڑ لئے

ہر چھوٹی وڈی آندر اسیں کھچ کھچ کے

دھرت 'تے کھلھار سٹی

چلو آپاں گل لگ روئیے

موئے پِتراں دے کلیجے

کجھ تاں ٹھنڈ پوے

چلو دھر اندروں رَوئیے

لگے تے لائے زخماں 'چوں روئیے

پِترساڈے خون 'چ سمائے ہوئے

ساڈے اندر ہی نے اوہناں دے زخم

اُوہناں دی لعنت

چلو زخماں 'تے ملھماں لائیے

ایہناں زخماں دا قرض اتاریئے

چلو منیے

کہ ساڈے مَناں 'چ

جنگل جاگ پئے سن

ساڈے لہو 'چ ہزاراں پشو

دھاڑن لگ پئے سن

تے دِھیاں دھیانیاں دے سراں 'تے

رَکھ ہون والے ساڈے ہتھ

پلاں 'چ ہی نہوندراں بن گئے

تے اسیں بندے نہیں ساں رہے

اَسیں چھَویاں تلواراں نیزے

بس ہتھیاراں 'چ بدل گئے ساں

چلو اُوہناں دھیاں بھیناں اَگے

گوڈیاں بھار ہی نہ بیٹھیئے

سگوں دھرتی 'چ ہی سما جائیے

جہناں نوں بابلاں امیاں

تے چھوٹے بھین بھراواں کولوں

اسیں برچھے بن کے ادھالیا

تے اپنے شملیاں اتے

ٹنگ لئیاں جہناں دیاں عصمتاں دیاں

پاٹیاں چُنیاں

تے اوہ کھوہاں 'چ نہیں سن ڈگیاں

اَسیں ہی پتالیں غرق گئے ساں

چلو باہاں کھلھار کے

تے اَکھاں جھکا کے بھُباں مار روئیے

تے اوہ حاکماں دے میسنے سمجھوتیاں نال

جو گھروں بے گھر ہو گئیاں

تے کچھڑ چک چک بچیاں نوں

لمے سفراں نے بھنیاں

پتانہیں اوہ ساڈیاں ماواں سن

یاں بھیناں سن جاں دھیاں سن

پر اَسیں اوہ وڈھیاں نوچیاں

تے میلیاں کیتیاں

اوہناں توں معافی منگن لئی

جہڑے شبد چاہیدے

اوہ کہڑیاں عمراں 'چ سرجان گے

چلو اوہناں مویاں دی مٹی توں

جس نوں مٹی وی نصیب نہ ہوئی

اوہناں اگے بہ کے مٹی ہوئیے

تے وچھّ جائیے مٹی دے وانگ ہی

چلو منیے کہ ایہ لیک

دھرتی 'تے نہیں کھچ ہوئی سی

ساڈیاں آندراں اُتے کھچی گئی سی

تے پھر اَسیں ماواں دیاں آندراں

ککھاں تے سیراں نوں ولوندریا سی

تے جہناں دے ساہویں ڈھڈوں جمیاں تے جمے

ساڈیاں برچھیاں نے کوہے

اوہناں ماواں دیاں ککھاں اگے

ککھاں دیاں آندراں اگے

چلو نشبد ہو کے جے کھلو سکیے

اَسیں رہبر چھوٹے کر لئے

دھرم بونے کر لئے

نانک سانوں پکاردے رہِ گئے

فرید کبیر کرلاؤندے رہِ گئے

پر سانوں پشواں تے ہتھیاراں دی

جونے پیاں نوں

کدوں اوہناں دا الہام سنیا

تے اوہ لہو لہان ہوئیاں کنڈھاں نال

ویئیاں دریاواں 'چ اتر گئے

پھر سبھ نہراں 'چ رت گھلی سی

نیر لنگھے کدوں پرتدے نے دوستو

پر چلو آپاں پتراں دے اس جامے وچ

ویئیاں دریاواں دے اس جامے توں

اپنے گناہ معاف کروائیے

چلو میریو ویرو !

اوہ پچھے رہِ گئے سُنے گھراں توں

بچیاں دے رہِ گئے ڈرے کھڈونیاں توں

لمکدیاں رہِ گئیاں پینگھاں توں

دِھیاں دیاں رہیاں اَن بُنیاں دریاں توں

کھڈیاں 'تے رہے ادھورے کھیساں توں

پاٹیاں فلکاریاں توں

تے سروں لہہ گئیاں چنیاں توں

رو رو معافی منگیے

اوہ جو بچپن والیاں گلیاں

پنڈ ویڑھیاں تے گھراں نوں

بس اک وار ویکھن لئی ترسدے

اس دھرت توں رخصت ہو گئے

چلو اوہناں دیاں قبراں 'تے جا روئیے

تے شرمندے ہوندے آکھیئے

کہ ایہناں سرحداں نوں اجے تک

بس ساڈیاں چلیاں گولیاں

جنگ والے جہاز تے جاں پرندے ہی

اُلنگھ سکدے نیں

چلو لبھیے بھراوو !

اوہ پشو ساڈے اندر کتھے سُتے ہوئے نیں

جو جاگدے نے تاں اسیں یُدھ کردے

ہزاراں یُدھ کیتے

ایہ جاگدے اسیں دنگئی بندے

تے سیاں واری دنگے کیتے

کنی وار ایہ دھرت ونڈی

کنی وار رت نال رنگی

انج کون نے ایہ

جو ساڈے سدھے سادے بندیاں 'چوں

پشو جگا لیندے

اسیں خونخار چوپایاں 'چ وٹ جاندے

آدم بو آدم بو کردے

ساڈے چہریاں دی مسکراہٹ

ساڈے منہ 'تے لگیا لہو بن جاندی

مالا تے رباب دی تھاں

سانوں تے نانک اتے مردانے ہتھ

لہو لبڑیاں چھَویاں دسدیاں

اسیں کھلے کھلوتے ہلک جاندے

تے چلو اوہناں نوں وی سجداکریئے

جو اس جنگل بن گئے خطے وچ وی

منکھ ہی بنے رہے

تے سنبھالدے پھرے

گورواں، پیراں ،رہبراں دی سوچ نوں

اوہناں تاں ہر یُگ وچ

منکھ بنے رہنا

تے اوہناں دی مٹی کدے

ساڈے وانگ شرمندانہ ہونا

کنی عمر بچی ہوئی اے ساڈی

تے پھر اسیں کہڑے یگ 'چ

معاف کیتے جاواں گے

چلو روئیے یارو

زارو زار روئیے

تے اپنے داغ دھوئیے

ایہ لہو دے لگے داغ

بس ہنجواں نال ای دھو ندے

ہنجواں نال ای دھو ندے

٭٭٭٭٭