شراب لائسنس جاری کرن وچ کوئی غیر قانونی کم نہیں کیتا،عثمان بزدار دا نیب نوں جواب ……٭رویل نیوز٭

لاہور (نیوز ڈیسک) وزیر اعلا پنجاب سردار عثمان بزدار نے نیب ولوں پُچھے گئے 17 سوالاں دا جواب جمع کروا دِتا۔ وزیرا علا پنجاب نے نیب ولوں پُچھے گئے سوالاں دے جوابات دیندیاں ہویاں کہیا کہ شراب لائسنس دے اجرا ء وچ اوہناں نے کوئی غیر قانونی کم نہیں کیتا۔ ہوٹل نُوں شراب ویچن دے لائسنس دے اجرا دا اختیار ڈائریکٹر ایکسائز اینڈ ٹیکسیشن پنجاب دے کول اے ایس لئی ایس معاملے وچ اوہناں دا کوئی کردار نہیں۔ اِک سوال دے جواب وچ وزیر اعلا پنجاب دا ایہ وی کہنا سی کہ لاہور سنے پورے پنجاب وچ شراب ویچن لئی 11 لائسنس وِچوں 9 لائسنس ڈائریکٹر جنرل ایکسائز اینڈ ٹیکسیشن پنجاب نے جاری کیتے۔ متعلقا ہوٹل نُوں لائسنس دے اجرا دے حوالے توں ڈی جی ایکسائز نے جہڑی سمری اوہناں نُوں گھلی اوہ ڈی جی نُوں واپس گھل دِتی گئی سی۔ جہدے اُتے ڈی جی ایکاسئز نے لائسنس جاری کیتا پر صوبائی وزیر ایکسائز اینڈ ٹیکسیشن پنجاب نے جاری کیتا گیا لائسنس معطل کر دِتا سی۔ اوہناں دا ایہ وی کہنا سی کہ ذکر کیتے ہوٹل توں شراب دی اِک بوتل وی ویچی نہیں گئی جد کہ ہوٹل دی انتظامیا نے ریونیو کمان لئی لائسنس اپلائی کیتا سی۔ وزیر اعلا پنجاب دا ایہ وی کہنا سی کہ 2001 وچ گورنر پنجاب نے شراب ویچن دے لائسنس جاری کیتے جد کہ لاہور ہائیکورٹ دے جسٹس شاہد کریم نے2019 وچ لائسنس بحا کرن دا حکم دِتا سی۔