kraamaat@gmail.com
+ +92 333-430-6384


(جرمن لوک کہانی/نِکّا بھانڈا تے دَلیے دا ہڑھ( ایڈورڈ بلِشن


خاص لیکھ December 10, 2019


نِکّا بھانڈا تے دَلیے دا ہڑھ

جرمن لوک کہانی ایڈورڈ بلِشنEdward Blishen)

اِک بیوا دے کول نِکّی جہی جھُگی سی اِک نِکّا جہیا باغ تے اِک دِھی اوس دی کُل کائنات بن گئی ہوئی سی۔ جو باغ وچ اُگاندے اوہ اوہی کھاندے سن۔ اوس دی دِھی جنگل وچ جاندی تے جنگلی سٹرابری چُگ لیاندی۔

اِک چمکیلے جہے چانن بھرے دِن وچ اوہ ایہ ای کرن گئی ہوئی اوس دن سویر بہت سوہنی ہو گئی سی۔

اوہدی ٹوکری پہلاں ای اَدھی بھری گئی تے دُپہر دے کھانے دا ویلا ہو گیا۔ اوہ اِک ڈِگے ہوئے رُکھ اُتے بہ گئی تے اپنے نال لیاندی روٹی نوں کھاون لئی تیری کرن لگی۔اوس نے کُجھ جنگلی سٹرابری کھاون دا وی فیصلاکیتا۔ کول ای اِک نِکّی جہی ندی سی جِس دا پانی صاف شفاف سی۔ اوس نے اوتھوں پانی پیون دا وی فیصلا کیتا۔

اوسے ای لمحے کسے پاسیوں اِک بُڈھی زنانی آ گئی۔ اوہدا کُب نکلیا ہویا تے قد بہت نِکّا سی پر اوس دا چہرا کسے مہربان ورگا سی۔ اوہدے ہتھ وچ اِک نِکّا جہیا بھانڈاسی۔

میری سوہنی“ اوس نے ونجھلی دی تان ورگی واج کڈھی۔ ”مینوں بڑی بھُکھ لگی ہوئی اے میں کئی دِناں توں کُجھ نہیں کھادا اے۔ کیہ تُوں مینوں اپنے ہتھ چ پھڑی روٹی دا کُجھ حِصّا دیویں گی؟

ایہ سُکی روٹی اے……بلکل چھان بُورے وانگ…… کیوں جے اسیں تازا روٹی تے کھاون جوگے ای نہیں ناں۔“ کُڑی نے دسیا۔ ”پر تُوں ایہ کھا سکنی ایں، ایہ لو۔ میں گھر نُوں جا رہی آں میں تے اوتھے جا کے کھا ای لواں گی۔ پر اپنے دنداں دا خیال رکھیں۔ ایہ روٹی بہت ای سخت اے۔

رب تینوں برکت دیوے۔“ بُڈھی زنانی بولی۔ ”تُوں اک چنگی رحمدل کُڑی اے۔ میں تینوں کُجھ دینا چاہنی آں۔ ایہ بھانڈا لے لے۔ ایہ بہت خاص بھانڈا اے۔ صرف تینوں اینا ای کہنا اے۔ ”نِکّے بھانڈے تھوڑا دلیا“ تے ایہ فوری طور تے تیرے واسطے دلیا پکا دیوے گا۔جدوں بھانڈا بھریا جاوے تینوں ایہ ضرور کہنا اے ”نِکّے بھانڈے بس ہُن کافی اے“ تے ایہ رُک جاوے گا۔ پر تینو ں ایہ ای لفظ دُہرانے نیں یاد رکھیں تے بھُلی نہ۔ ہور کوئی لفظ نہیں بولنے نیں۔ ہور لفظاں نال ہونا وی کُجھ نہیں اے۔ ایہ میرے واسطے کم نہیں کردا ایس لئی میں خُد بہت بھُکھی آں۔ پر مینوں پتا اے ایہ تیرے واسطے کم کرے گا۔

بُڈھی مائی نے سخت روٹی نوں ای چک مارنے شروع کر دتے، اوہ نِکّا بھانڈا اوس نوں پھڑایا تے جویں آئی سی اُنج ای غائب ہو گئی۔

جدوں کُڑی گھر آئی تاں اوس نے اپنی ماں نُوں سٹرابری نال بھری ٹوکری وکھائی تے فیر بھیت بھریا اوہ نِکّا بھانڈا وی وکھایا۔ بڑے خُش ہو کے اوہناں نے اوہ بھانڈا میز تے جا رکھیا تے پکاریا۔ ”نِکّے بھانڈے تھوڑے جہے دلیے بارے کیہ خیال اے؟“ ایہ بھانڈا تاں بلکل ای خالی سی پر اگلے ای لمحے پیندے توں دلیا اُبلن لگ پیا۔ تھوڑا جہیا دلیا۔ فیر تھوڑا ہور فیر ایہ بُہتا ہودا گیا کہ بھانڈا سارے د ا سارا ای بھریچ گیا۔“ فیر کُڑی نے کہیا۔ ”نِکے بھانڈے بس بس کافی اے۔“ تے فوری ای بھانڈے وچ د لیا بننا مُک گیا۔ کِنے چِراں توں کھاؤن مگروں اوہنا نوں سکون جہیا محسوس ہویا۔

اگلے دیہاڑ اوہ اندازا لا سکدے سن کہ ناشتے و چ کیہ ہوئے گا۔ کُڑی فیر جنگلی سٹرابری چُگن لئی گئی۔ ہُن اوہنوں بھُکھیاں کم کرن لئی نہیں سی جانا پے رہیا۔ اوہ حالے بُہتا دُور نہیں سی گئی کے اوہدی ماں نُوں اِک وارفیر بھُکھ لگ گئی۔ اوس نے بھانڈے نُوں میز تے رکھیا تے کہیا ”نِکّے بھانڈے تھوڑے جہے دلیے بارے کیہ خیال اے۔“ تے اوہدی خُشی ویکھن والی سی کہ بھانڈے نے کم کرنا شروع کر دِتا۔ فوری طور تے نِکّا بھانڈا گاڑھے تے مِٹھے دلیے نال بھرنا شروع ہوگیا۔

دلیے نُوں کھاون لئی پیالا، چمچ باورچی خانے وچ سن جو ناشتے توں بعد اجے تیکرمانجھے نہیں سی گئے۔ جدوں اوہ مُڑی تاں ویکھ کے حیران رہ گئی دلیا بھانڈے توں باہر ڈِگدا پیا سی۔ ایہ میز توں وکھ کُرسی تے وی پے چُکیا سی تے ہُن فرش اُتے ڈِگ رہیا سی۔ اوہ ڈر گئی تے ڈر نال اوس نوں بھانڈے نُوں بند کرن والے الفاظ وی بھُل گئے سن۔

نِکّے بھانڈے اللہ دا واسطا ای انج نہ کر۔“ اوہ چِیکدی اے۔ ”بھیڑے…… اوہ دُبارا چِیکی اے۔“ ”مہربانی تیری……مہربانی……مہربانی……“

پر بھانڈے نُوں کوئی فرق نہ پیا کیوں جے ایہ صحیح الفاظ نہیں سن۔ اوہنے بھانڈے نُوں کپڑے وچ ولھیٹ کے بند کرن دا وی جتن کیتا پر دلیا کپڑے وچوں وی باہر نکل آیا۔ ہُن کمرے وچ انج لگدا سی کہ دلیے دا ہڑھ آیا ہووے۔ جدوں فرش بھریا گیا تے ایہ اُپر دیوارں نُوں چڑھن لگیا تے بُڈھی نے ویکھیا تاں اوس نوں لگیا اوہنوں بھیانک موت آون والی اے۔ اوہ دلیے وچ ڈُب جاوے گی انج تاں لوکاں نال نہیں ہوندا۔ اوہ کمرے توں نکل کے پوڑھیاں ول نوں نَسی۔ کُجھ دیر بعد پوڑھیاں ول نوں دلیا آون لگیا تے۔۔۔۔۔

ہُن دلیے نے پوری طاقت نال گھر دا بوا کھول دِتا تے دلیا باغ نُوں بھرن لگا تے باغ بھر ے جاون توں مگروں ایہ گلی وچ آون لگ گیا۔ ایس نے کھڑکیاں توڑ کے باہر نوں نکلنا شروع کر دِتا۔ گلی جویں دلیے دا دریا بن گئی تے سبز پِنڈ دلیے والا تالاب بن گیا جہڑے لوک گھروں باہر سن اوہ رُکھاں تے چڑھ گئے سن کیوں جے دلیا اوہناں دے لک لک تیکر آگیا سی تے حالے وی آئی جا رہیا سی۔ اوہ بُڈھی بیوا کھڑکی توں بچ نکل کے سبھ توں اُتلی چھت اُتے چڑھ چُکی سی۔ پر فیر وی دلیے والی سطح اُپر نوں ودھدی جا رہی سی۔

ایسے ای لمحے، رب دا شکر اے کہ بُڈھی بیوا دی دِھی آ گئی۔ اوس نے اج جنگلی سٹرابری دی ٹوکری نُوں نکو نک بھریا ہویا سی۔ اوس نے ایہ انہونی واپردیاں ویکھی تاں اُچی ساری واج ماری ”نِکّے بھانڈے، بس بس کافی اے۔

تے فیر بھانڈے نے دلیا پکاؤنا بند کر دِتا۔

مینوں ڈر اے کہ بُڈھی بیوا تے ہور لکاں نوں دلیے توں نجات تیکر چھتاں اُتے ایہنا پوے گا۔

اوہ اونا چِر اوتھے ای رہے جِناچِر علاقے دے سبھ لوکاں نے مِل ک یاوہ دلیا کھا نہ لیا تے ہُن بس تھوڑا ہلیا دلیا ای بچیا سی تے اوہناں سبھ نُوں بدہضمی ہوگئی۔

ایس توں مگروں اوہناں نوں سارا علاقا صاف کرنا پیا۔ کسے نے کہیا سی کہ ایہ اوس پِنڈ وچ پہلی وار ہویا کہ سارے پِنڈ والیا نے رجّ کے کُجھ کھادا سی۔

٭٭٭٭٭