موٹر وے زیادتی کیس دا اہم ملزم ماڈل ٹاؤن تھانے وچ پیش،متاثرا سوانی دا شناخت توں انکار……٭رویل نیوز٭

لاہور (نمایندا رویل) موٹروے زیادتی کیس دی متاثرا سوانی نے ملزم وقار الحسن نُوں شناخت کرن توں انکار کر دِتا۔ وسیلیاں مطابق موٹروے زیادتی کیس دا اہم ملزم وقار الحسن پولیس دے ساہمنے پیش ہو گیا‘ ملزم وقار الحسن نے آپ سی آئی اے ماڈل ٹاؤن وچ اپنے آپ نُوں پیش کیتا‘ پر اوہنے صحت جرم توں انکار کردیاں ہویاں کہیا کہ میرا واقع نال کوئی تعلق نہیں‘پولیس چاہوے تے میرا ڈی این اے ٹیسٹ وی لے سکدی اے‘ ڈی این اے سیمپل فرانزک لیب پہنچا دِتا گیا۔ دوجے پاسے پولیس حکام نے واٹس ایپ راہیں ملزم وقار الحسن دی تصویر متاثرا سوانی نُوں گھلی تے سوانی نے وی ملزم وقار دی شناخت توں انکار کردیاں ہویاں کہیا اے کہ وقار واقع وچ شامل نہیں سی۔ پولیس دا کہنا اے کہ ہور حقایق ڈی این اے ٹیسٹ دے بعد پتا لگن گے۔ وسیلیاں نے شیخوپورا وچ رہایش پذیر ملزم وقار الحسن دے بھرا تے والد نال گلبات کیتی تے بھرا مشتاق دا کہنا سی کہ وقار محنت مزدوری کر کے گھر چلا رہیا اے‘ موٹر سائیکلاں دی دُکان اُتے کم کردا اے۔ وقار دے محلے والیاں دا وی ایہو مؤقف اے کہ وقار 20 سال توں علی ٹاؤن وچ رہ رہیا اے تے محنت مزدوری کر کے گزارا کردا اے‘ اوہ ایس طرحاں دا بندا نہیں اے‘ ایہدے اُتے غلط الزام لایا گیا اے۔ دوجے پاسے سیالکوٹ موٹروے اجتماعی زیادتی کسی دے دوجے مرکزی ملزم عابد علی دے گھروالیاں نال گل کیتی گئی تے اوہ سبھ اوہدیاں کرتوتاں اُتے پھٹ پئے‘ مقامی بندیاں دا کہنا سی کہ عابد پہلے وی چوری تے راہزنی ورگے جرم و چ ملوث رہیا اے‘ لوکاں دی عزت ایہدے توں محفوظ نہیں سی‘ جے حکومت پہلے اوہنوں سخت سزا دیندی تے لاہور ورگا واقع نہ ہوندا۔ مقامی زمیندار حنیف دا کہنا سی کہ عابد ایتھے 10 سال رہ کے گیا اے‘ ہر کسے نُوں تنگ کرنا اوہدا معمول سی۔ پولیس وسیلیاں مطابق سی آئی اے پولیس نے مرکزی ملزم عابد دے 2 بھراواں تے والد نُوں حراست وچ لے لیا اے تے تِناں بندیاں نُوں شیخوپورا توں حراست وچ لے کے لاہور منتقل کر دِتا گیا اے‘ حراست و چ لئے جان والے بھراواں وچ قاسم تے آصف تے والد اکبر علی شامل نیں۔