اوکھے پینڈے ، لمیاں راہواں عشق دیاں (۳)ـــ----٭رویل٭

لولو سر جھیل توں اگے نکلے تے اوکھے پینڈیاں تے لمیاں راہواں دا کجھ کجھ اندازا ہویا ۔ جویں جویں بابو سر ٹاپ ول ٹردے گئے راہواں دے موڑ تے اچیائی وچ اکسار وادھا ہوندا گیا ۔ موڑ ولا ولا کے گڈیاں جواب دین لگ پئیاں تے دل اک گئے ۔ مہران تے بولان دے انجن دا حوصلا اپنی تھاں تے پر ڈرئیوراں دی ہمت دا اپنا کردار سی جہیڑا ایہناں ان ڈٹھیاں پہاڑی راہواں تے ٹردا رہیا ۔ تھاں تھاں تے سوہنیاں وادیاں تے دریا کنہار دے سوہن سنہپ روکدے رہے پر اسیں ٹردے رہے کیوں جے ساڈے پندھ لمیرے سن تے اسیں شمالی علاقا جات دے نقشے مطابق الله آسرے تے پہاڑی سفر چھیڑے ہوئے سن ۔ بابو سر ٹاپ پہاڑاں دی چوٹی تے واقع اک اجہی تھاں اے جتھے اپڑ کے آل دو آلے دے پہاڑ نکے نکے ٹبے جاپدے نیں تے ایہناں پہاڑاں دی کچھ وچ ساوے ہرے گھاہ تے پہاڑی رکھاں دی بہار اپنے پورے جوبن تے سی ۔ شبو دیاں شوخیاں اچیائیاں تے پہاڑی موڑ ویکھ ویکھ کے گھٹدیاں جا رہیاں سن ۔ سجاد دیاں ہانگراں تے میرے موبائل وچوں نور جہان دے گانیاں دے سر وی مدھم پئے گئے ساں ۔ شہباز تے زاہد دے چہریاں تے پریشانی سی پر اسیں بابو سر ٹاپ دی ہر اچیائی تے موڑ تے شبو دی کنڈ تے تھاپنا دیندے ساں تے شبو اپنی مہران نوں شابش دیندیاں ورسی کڈھدا تے گڈی زور شور نال پہاڑ چڑھدی جاندی ۔ بابو سر ٹاپ تے اپڑ کے ویکھیا تے سارے اچے پہاڑ نویں لگن لگ پئے ۔ گڈی توں باہر نکلے تے دسمبر ورگی ٹھنڈ دا احساس ہویا ۔ دھند تے دھوں ورگے بدلاں نال اسمان ڈھکیا ہویا سی ۔ آکسیجن گھٹ ہون پاروں ساہ لین وچ اوکھ ہو رہی سی ۔ پہاڑ دی چوٹی تے جاونا منع سی پر جتھے اسیں کھلوتے ساں اوہ تھاں وی 13000 فٹ توں ودھ اچی سی ۔ نکے نکے کھوکھے تے چاہ بوتل تے بسکٹاں توں اڈ خشک میویاں دیاں نکیاں نکیاں دکاناں سن ۔ سیاح وکھ وکھ ہو کے تصویراں لے رہے سن تے قدرت دے نظاریاں توں لطف چک رہے سن ۔ ہر پاسے حسن سی ، فطرت دا جمال سی ، پہاڑاں دا جلال سی تے انسان دے ویکھن لئی سبھ کجھ سی پر اوہ دل تے اوہ اکھ پتا نہیں کنے لوکاں کول سی جہڑی قدرت دے اس پر نور چہرے دی پچھان کردی ؟