پَیر ــــــــ کہانی ـــ٭رویل٭

پَیر ــــــــ کہانی ـــ٭رویل٭

۔۔۔۔۔۔ توقیر چغتائی

کِسے دا کُچھ وی سوہنا ہو سکدا اے پر ایہ ضروری نہیں کہ اسیں اوہدی ہر شے ویکھ سکیے ۔ پِنڈے دے کُچھ انگ انج دے وی ہوندے نیں جہناں نُوں دوجیاں کولوں چھُپا کے رکھنا ضروری ہوندا اے ۔ جے اوہ ننگے رہ جان تاں دِین دھرم دے نال سانوں اپنے وسیب دی مخالفت د ا وی ڈر ہوندا اے ۔ پر مینوں تاں پیسے ای اپنا وکھالا کرن دے مِلدے نیں ، ٹی وی اینکر جو ہوئی ۔
تُسیں ٹھیک کہندے او، خبراں پڑھن آلی اینکر تے نچن گان آلیاں ، جاں فلماں ، ڈرامیاں تے اشتہاراں وِچ کم کرن آلیاں کُڑیاں وِچ زمین اسمان دا فرق ہوندا اے ، پر خبراں پڑھن جاں سوشل پروگراماں دی اینکرِنگ کرن لئی وی جدوں تیکر تُسیں اپناآپا کِسے وکا ئو شے وانگ سجا کے کیمرے ساہویں نہ لَے کے جائو تاں تہاڈا مُل کوڈی دا رہ جاندا ۔
میں تہاڈی گل سمجھ رہی ہاں پر خبراں پڑھن جاں کسے سوشل تے سیاسی پروگرام دی اینکرنگ کرن لئی سوہنا ہون دی تھاں اسکرپٹ دی مضبوطی، اکھراں دا ودھیا اُچارن تے پتر کار ہونا پہلی شرط ہو ندی اے پر ساڈے جہے دیساں وِچ اسکرپٹ تے ادائیگی نالوں ودھ پڑھن تے بولن آلی اینکر دے مُونہ متھے تے پِنڈے نُوں ویکھیا جاندا اے ۔
سوشل میڈیا تے مینوں لائیک کرن آلیاں دی گنتری لکھاں وِچ ہے ۔ پرایہ میری پترکاری جاں اکھراں دے اُچارن دا سِٹّا نہیں ۔ میں پترکاری نہیں پڑھی ۔ پر ایس گل توں کوئی وی انکار نہیں کر سکدا کہ جدوں ایس کم نال جُڑی ساں تاں اپنے نال دِیاں بہُتیاں کُڑیاں نالوں ودھ سوہنی ساں ۔ سوشل میڈیا تے مینوں لائیک کرن تے چَیٹ کرن آلے ودھیک دوست میتھوں وڈّی عمر دے بندے نیں جیہڑے میرے کپڑے لتّے، لِپ اسٹک، خاص کر قمیض دے گلے تے سینے دے وڈے نِکّے ہون بارے گل کردے نیں ۔
ہاں ٹھیک ہے خبراں تاں اِک تھاں بیٹھ کے ای پڑھیاں جاندیاں نیں پر کسے ٹیکنیکل مجبوری پاروں جے سیٹ تے کھلو نا ہووے جاں پروڈیوسر دے کہن تے چلدے پھردے موسم دا حال دسنا پَے جائے تاں سِر توں لَے کے پیراں تیکر ڈرامے جاں فلم وِچ کم کرن آلیاں کُڑیاں وانگ سارا سریر اسکرین تے نظرآوندا اے تے دُوجے دِن سوشل میڈیا تے ہون آلی چَیٹ میرے ادھے دھڑ تیکر نہیں سگوں سِر توں لَے کے پیراں تیکر اپڑ جاندی اے ۔ چَیٹ وِچ دُھنّی بارے وی گل ہوندی اے اے تے اوہناں ساریاں انگاں بارے وی گل کرن دا جتن کیتا جاندا اے جہنا ں بارے گل کرنا جاں گل دا جواب دینا میرے لئی بہت اوکھا ہوندا اے ۔
سوشل میڈیا تے میرے نال چَیٹ کرن آلے مُنڈے گھٹ تے پکی عمر دے بندے زیادانیں ۔ ایہدا ایہ مطلب نہیں جو میں جوانی دی حد پار کر چُکی ہاں ۔ مجبوری ایہ ہے کہ ٹی وی آلے کسے وی پروگرام دی اینکر توں ودھ اوہدے پروگرام دی ریٹنگ تے سوشل میڈیا تے اوہدے فالوورز دی گنتی نوں ویکھ کے ای اوہدی تنخواہ گھٹاندے ودھاندے نیں ۔ فیر وی اپنےآ پ نُوں لوکائی دے ساہمنے وِکائو شے وانگ پیش کرن تے سوشل میڈیا تے اوہناں دے گھٹیا کمنٹ پڑھ کے کدی کدی تاں دِل کردا ہے کہ لیپ ٹاپ نوں چُک کے فرش تے مار دیاں جاں پروڈیوسر نوں استعفٰی لکھ دِیاں ۔

ہاں ٹھیک کہندے او میں ہُن مٹیار نہیں رہی سگوں عورت بن گئی ہاں تے دِنوں دِنی گھٹدے ایس رُوپ نوں قائم رکھن لئی مینوں سو سوجتن کرنے پیندے نیں ، پر بہت سارے مرداں نوں پنجاہ ورھیاں دا ہو کے وی جے تِیہ ورھیاں دے گبھرو ہون داشک نہیں جاندا تاں پینتی ورھیاں دی تیویں نوں مٹیار سمجھن لگیاں اوہناں نوں کیہ تکلیف ہو سکدی اے ۔

کل سوشل میڈیا تے چَیٹ کردیاں مینوں اِک بندہ دس رہیا سی کہ تہاڈے گلّھاں تے سوت ہو گئی اے ۔ سجّی اکھ وڈّی تے کھبّی نِکّی لگ رہی سی ۔ اوہنے مُونہ دی سوت گھٹ کرن دے کُچھ ٹوٹکے وی دسّے سن پر اوہنوں ایہ نہیں سی پتا کہ مُونہ تے سوت کیوں ہوئی سی ۔ رات نُوں اسٹوڈیو توں گھر آن مگروں شیشے موہرے جا کے اپنا مُونہ ویکھیا تاں مینوں پہلے وانگ ای لگیاپر شک جیہا ضرور ہوگیا سی ۔ ہو سکدا اے ایہ میرا وہم ہووے ۔ میں اپنے گھر آلے نُو وی ایس بارے پُچھیا پراوہنے میرے مُونہہ ول بے دھیانی نال ویکھدیاں آکھیا :
" مینوں تاں اِکو جیہیاں نظر آوندیاں نیں تیریاں اکھاں ۔ کیوں ؟ کیہ ہویا اے ؟"
"کُچھ نہیں ۔ "کہندے ہوئے مَیں دُوجے کمر ے وِچ لگے بیڈ تے سُتّی اپنی دسّاں ورھیاں دی دِھی کول چلی گئی ساں ۔ سون لگیاں میں اپنے گھر آلے نال گلّاں کردے آکھیا:

’’جیویں اج توں وِیہہ ورھے پہلاں ہر کُڑی مُنڈے نُوں فلم جاں ڈرامے وِچ کم کرن دا ا نھّا شوق ہوندا سی، اُنج ای ہُن ہرکوئی چاہندا اے کہ اوہ اینکر بن جائے ۔

" فیر ؟‘‘

"اوہنے اُتانہ ہوکے رُکھے جہے سبھا نال مینوں پُچھیا ۔

" مینوں لگدا اے ہُن میری اینکری ودھ توں ودھ اِک ادھ سال تیکر ای چلّے گی ۔ "

" کیوں کیہ ہویا ؟"

"سوشل میڈیا تے میرے فالوورز وی گھٹی جا رہے نیں تے ریٹنگ وی نہیں آرہی ۔ نالے ٹی وی ویکھن آلے خبراں دے پچھوکڑ تے اکھراں دے اُچارن توں ودھ میرے سریر تے کمنٹ کرن لگ پئے نیں ۔ "

" سچ نوں اسیں کدوں تیکر چھُپا سکدے ہاں ۔ جدوں ساڈا ویاہ ہویا سی تاں تُوں اپنی عمر وِیہ ورھے لکھوائی سی ۔ مگروں پتا چلیا کہ تیری عمر تاں پنجھی ورھیاں توں وی ودھ ہے ۔ "

" تُوں وی تاں ست ورھے گھٹ لکھوائی سی نا ؟"

" آہو۔۔۔ پر مرد تے گھوڑا بُڈّھے نہیں ہوندے ۔ "

" پر میں ایہو جہے مرد وی ویکھے نیں جنہاں نال کھوتے آلی ہوندی اے تے جوانی دا جھُوٹھا چولا پاٹدا اے تاں اوہ تیویاں نُوں ہتھ جوڑ کے آکھدے نیں ، بس کر دیو ہُن میں بُڈھا ہو گیاں ۔ ایہ گل نہ بھُلنا کہ میری کمائی نال ای گھر دا کرایا تے کُڑی دی پڑھائی لکھائی چل رہی اے ۔ جے اج میری نوکری جاندی اے تاں تیری چھوٹی جہی تنخاہ وِچ نہ گھر بار چل سکدا تے نہ تِن جِیاں دا کھان پِین پُورا ہو سکدا اے ۔ ‘‘

ہمیش وانگ اسیں اِک دُوجے نال لڑ کے سوں گئے ۔ پر سون توں پہلاں مینوں اِنج جاپیا کہ بھاویں تیجی دُنیا دے غریب دیش جاں یورپ تے امریکا ورگے امیر دیش ہون،عورت نوں وکھ وکھ شیواں ویچن لئی بنے اشتہار تے اپنی سریرک لوڑ پُوری کرن آلی باندی توں بِنا ہور کُچھ نہیں سمجھدے ۔

فیس بُک تے یوسف ناں دا میرا اِک فرینڈ مینوں بڑا تنگ کر رہیا سی، پر میں بڑے ٹھڈے سبھا نال اوہنوں ڈیل کر رہی ساں تاں جو میرے فالوورز دی گنتری گھٹ نہ ہووے ۔ دُوجیاں اینکراں وانگوں سوشل میڈیا تے میں وی اپنے فالوورز دی گنتی ودھانا چاہندی ساں تے جدوں وی ویلا مِلدا، نویں نویں فرینڈز بنان داجتن کردی ساں ۔ یوسف نے کُچھ دِن پہلاں خبراں دے بُلیٹن دی بڑی تعریف کیتی سی ۔ اوہنے خبراں پڑھن دے ڈھنگ نوں وی سلاہیا سی تے میری اواز دی وی تعریف کیتی سی ۔ ایہدے نال میرا حوصلہ ودھیا سی تے مینوں اوہ دُوجیاں دوستاں نالوں وکھ وی لگیا سی کہ اوہنے پروگرام بارے بہت سارے مشورے وی دِتے سن ۔ پر نال ای مینوں اپنی وال تے نویں فوٹو لان دی فرمائش وی کر دِتی سی ۔

میں اوسے ویلے سیلفی لَے کے اپنی نویں فوٹو شیئر کر دتی ۔ پر گل ایتھے ای ختم نہ ہوئی ۔ اوہنے مینوں میسج راہیں آکھیا:

" ٹی وی دی اسکرین تے تہاڈے ہتھ صاف نہیں دِسدے ۔ اپنے ہتھاں دی ذرا نیڑیوں اِک ہور فوٹو بنا کے اپنی وال تے لا ئو ۔ "

ہتھاں دی فوٹو وی لا ِدتی تاں اوہنے لکھیا :

"تہاڈی دھون جُولیا رابرٹس وانگ لگدی اے تے متھے دا تِل ویکھ کے انجلینا جولی دا بھُلیکھا پیندا اے ۔ ذرا کلوز اپ وِچ تِل دی اِک فوٹو تاں گھلّو ۔ "

تِل دا فوٹو گھلیا تاں اِک وار فیر فرمائش آئی:

"جدوں مُونہ متھّا تے دھون اینی سوہنی اے تاں پَیر وی ضرور سوہنے ہون گے ۔ اپنے پَیراں دی فوٹو تاں گھلّو، پر فوٹو بنان لگیاں پونچے تھوڑے اُتانہہ کر لینا تاں جو پِنیاں وی وِچ آ جان ۔ "

میں نکّو نک ہو گئی ساں پر چُپ رہی ۔

دفتر جان لئی تیار ہوئی تاں گھر آلا کہن لگا:

"کل بڑی دیر نال گھر آئی سیں ۔ خبراں تاں نَوں توں دَس وجے تیکر ای ہوندیاں نیں ۔ "

میں آکھیا :

"رات نوں ست وجے توں لَے کے دس وجے تیکر سڑکاں تے گڈیاں دا رش ہو جاندا اے، ٹریفک جام ہوندا اے، ایس کر کے دیر ہو جاندی اے ۔ میں کِتے ہور تاں نہیں جاندی، اسٹوڈیو وِچوں سِدّھی گھر آوندی ہاں ۔ پروگرام ختم ہوندے ای گھر تے گُڈی یاد آون لگدے نیں ۔ "

"مینوں کیہ پتا ہووے، سِدّھی آوندی ایں جاں کِتوں ہو کے آوندی ایں ۔ اج کل تاں تیری چال ہی بدلی ہوئی اے ۔ چار پیسے جو کمالیندی ایں ۔ "

" کِتھے جاندی ہاں میں ؟ کہدے کول جا سکدی ہاں ؟"کہندے ہوئے غصّے نال بھری ہوئی میں لت چُکّی تے بِنا سوچے سمجھے اوہدی ڈُھوئی تے کڈھ ماری ۔ اوہدا سر کندھ نال وجیا تے متھے تے وڈّا سارا گروڑابن گیا ۔ مُڑ کے اوہنے میری گُت پھڑ ی تے دھون وِچ مُکّے مارن لگ پیا ۔

میں اندر وڑی تے گُڈی نوں سینے نال لا کے رون لگ پئی ۔ تھوڑے چِر مگروں اوہ وی اندر آیا تے کہن لگا:

"پہلی وار میں تیرے تے ہتھ چُکیا اے ۔ پر ایہدے وِچ تیرا ہی قصور ہے ۔ پہلے تُوں مینوں لت ماری سی ۔"

" آہو۔۔۔ پر تُوں گل ای ایہو جہی کیتی سی ۔ میتھوں برداشت نہیں ہوئی ۔ "

اوہ چُپ کر کے گھروں باہر چلا گیا تے جدوں مُڑ کے آیا، اسیں ماواں دِھیاں سوں گئیاں ساں ۔

" دُوجے دِن اسٹوڈیو جان لگی تاں گُڈی اسکولوں پرت آ ئی سی ۔ اوہنے دسیا:

"جدوں تُسیں لڑ رہے سو، میں اپنے موبائل تے تہاڈیاں فوٹوواں بنا رہی ساں ، تاں جو مگروں وکھا کے تہانوں دس سکاں کہ تُسیں اِک دُوجے نال لڑدے کِنّے بھیڑے لگدے او ۔ "

میں اوہدے موبائل دی فائل ویکھی تاں دُوجیاں ساریاں نالوں اوہ فوٹو ودھ اچھی لگی جہدے وِچ میں اوہدے پیو دی پِٹھ تے لت مار رہی ساں ۔ فوٹو وِچ اوہدی کنڈ ای نہیں ،میرا پیر تے گورے رنگ دی پِنّی وی صاف دِس رہی سی ۔ گُڈی نوں آکھیا:

" دُوجیاں نُوں تاں چھڈ،مینوں ایہ فوٹو فارورڈ کر دے ۔ "

اوہنے میرے ول ویکھدیاں فوٹو فارورڈکیتی تے اندر تُر گئی ۔

دفتر پہنچدے سار ای میں اوہ فوٹو یوسف نوں شیئر کردِتی پر نقصان ایہ ہویا کہ سوشل میڈیا تے وادھے دی تھاں میرا اِک فالوور گھٹ گیا ۔

٭٭٭٭٭