دوائیاں دیاں قیمتاں وچ پینتی(35) فیصد وادھا،نوٹیفیکشن جاری۔۔۔٭رویل نیوز٭

لاہور (نیوز ڈیسک) حکومت ولوں 1 مہینے وچ دوائیاں دیاں قیمتاں وچ دوجی وار وادھا کر دِتا گیا‘ دوائیاں دیاں قیمتاں وچ 22 توں 35 فیصد وادھے دا نوٹیفکیشن وی جاری کر دِتا گیا۔ تفصیلات مطابق مقامی فارما سسٹ نو رمہر نے دَسیا کہ حکومت ولوں پہلا نوٹیفکیشن پچھلے مہینے دی 17 تاریخ نُوں جاری کیتا گیا جہڑا کہ 27 نُوں ساہمنے آیا جد کہ چالو مہینے دی 5 تاریخ نُوں جاری کیتا گیا نوٹیفکیشن اج ساہمنے آیا جہدے مطابق دوائیاں دیاں قیمتاں وچ 22 توں 35 فیصد وادھا کر دِتا گیا اے تے مجموعی طور اُتے 253 دوائیاں دیاں قیمتاں ودھائیاں گئیاں نیں‘ جد کہ پاکستان وچ دوائیاں دیاں قیمتاں پہلے ای بُہتیاں نیں‘ ایس صورتحال وچ حکومت ولوں کیتا گیا نواں وادھا مریض کش اے۔ دوجے پاسے دوائیاں دیاں قیمتاں وچ وادھے دے بعد دوائیاں بنان والیاں کمپنیاں دا منافع وی ودھ گیا‘ دوائیاں بنان والیاں کمپنیاں دے خالص منافع وچ 69 فیصد وادھا ہو گیا اے‘ دَسیا گیا اے کہ چالو سال دی پہلی شماہی وچ 5 وڈیاں کمپنیاں نے خالص منافع دی مد وچ 6 ارب رُپئے توں بُہتا فایدا چُکیا۔ ایس توں وکھ سٹیٹ بینک آف پاکستان نے کہیا اے کہ ستمبر 2018 نُوں بیرونی قر ضا 96 ارب ڈالر سی‘ موجودا حکومت نے 17 ارب ڈالر دا نواں غیر ملکی قرضا لیا‘ جہدے نال 30 جون 2020 تک بیرونی قرض دا حجم 113 ارب ڈالر رہیا‘ اِک سال دے دوران بیرونی قرضیاں وچ 7 ارب ڈالر وادھا ہویا‘ 30جون 2019 نُوں بیرونی قرضیاں دا حجم 106 ارب ڈالر سی۔ سٹیٹ بینک دا کہنا اے کہ موجود ا حکومت نے آئی ایم ایف توں 1 ارب 7 کروڑ ڈالر قرض لیا‘ کمرشل بینکاں توں 1 ارب 20 کروڑ ڈالر لئے گئے‘ مختلف ملکاں توں 3 ارب 10 کروڑ ڈالر قرض لیا گیا۔