حکومت تے ادارےدیس دے لئی اِک پیج اُتے نیں: وزیراعظم عمران خان۔ ۔۔۔٭رویل نیوز٭

اسلام آباد (نیوز ڈیسک) وزیراعظم عمران خان نے کہیا اے کہ اپوزیشن سول ملٹری تعلقات نُوں خراب کرن دی ناکام کوشش کر رہی اے جہدے لئی ایہناں نُوں عالمی لابی دی حمایت حاصل اے۔ وسیلیاں دے مطابق وزیراعظم دی اگوائی وچ حکومتی تے پارٹی ترجماناں دا اجلاس ہویا جہدے وچ ملک دی سیاسی صورتحال خاص طور اُتے اپوزیشن دیاں حالیا سرگرمیاں اُتے وچار وٹاندرا تے اپوزیشن دی مہم اُتے حکومت دی حکمت عملی اُتے غور کیتا گیا۔ وزیراعظم عمران خان دی اگوائی وچ ہون والے اجلاس وچ اوپزیشن خلاف جارحانا حکمت عملی اختیار کرن دا فیصلا کیتا گیا۔ اجلاس نال خطاب کردیاں ہویاں وزیراعظم دا کہنا سی کہ اپوزیشن دا بیانیا بھارت دی پاکستان خلاف مہم دا حصا اے۔ وزیراعظم دا ہور کہنا سی کہ اپوزیشن نے سول ملٹری تعلقات خراب کرن دی کوشش کیتی اے پر اوہ جان لین کہ حکومت تے ادارے ملکی سالمیت تے بقاء لئی اِک پیج اُتے نیں‘ ملک تے قوم دا پیسا لُٹن والیاں دے خلاف احتساب دے عمل نُوں منطقی انجام تک پہنچاواں گے۔ ایس توں وکھ نجی ٹی وی نُوں انٹرویو دیندیاں ہویاں وزیراعظم عمران خان دا کہنا سی کہ نواز شریف دی واپسی لئی برطانیا جانا پیا تے آپ جاواں گا تے برطانوی ہم منصب بورس جانسن نال گل وی کر سکدا آں‘ نواز شریف نُوں لندن گھلن بارے لاہور ہائیکورٹ توں درخاست کیتی کہ 7 ارب رُپئے دے ضمانتی بانڈز منگو‘ عدلیا نے ساڈی گل نہیں منی تے شہباز شریف دی گارنٹی لے لئی۔ عمران خان دا کہنا سی کہ الیکشن سنے ہر شے لئی تیار آں‘ این آر او نہیں دواں گا‘ آرمی چیف جنرل قمر جاوید باجوا مینوں دَسدے رہندے سن کہ ایہ لوک ایہناں نال ملن آندے رہندے نیں‘ میرے خیال وچ جنرل باجوا دیاں اپوزیشن نال ملاقاتاں غلطی سی۔ اپوزیشن دے حوالے توں اوہناں دا کہنا سی کہ لوک اقتدار وچ فیکٹریاں‘ جائیداد بنان لئی آندے نیں‘ لوکاں دا اقتدار وچ آن دا مقصد اپنے خانداناں نُوں نوازنا اے۔ پچھلے حکمراناں دی کرپشن نال ملک قرضیاں وچ ڈُب گیا۔ وزیراعظم دا کہنا سی کہ ساڈے لئی وڈ ا چیلنج مقروض ملک نُوں اپنے پَیراں اُتے کھڑا کرنا اے۔ ریاست مدینہ وچ غریب طبقے دی فلاح اُتے توجا مرکوز کیتی گئی‘ ریاست مدینہ وچ قانون دی اُچیرتا یقینی بنائی گئی سی‘ پورے ملک وچ مزدوراں لئی پناہ گاہواں بنا رہے آں۔ عمران خان دا کہنا سی کہ نواز شریف ای نہیں اسحاق ڈار وی نَسے ہوئے نیں‘ کنٹینرز اُتے چڑھیا ہویا ٹولا جے میری تعریف کرے تے توہین سمجھاں گا‘ ایہناں دا میری تعریف کرن دامطلب جویں میں وی کوئی جرم کیتا ہویا اے‘ ایہناں ساریاں نُوں جاندا آں ایہ کیہ سن تے کیہ بن گئے‘ ایہناں دا ون پوائنٹ ایجنڈا عمران خان اُتے دباء پاؤ تے ساڈی جان چھڈ دیوے۔ اوہناں نے کہیا کہ 10 سال پہلے کہیا سی ایہ سبھ اکٹھے ہو ن گے‘ قوم نال پہلے خطاب وچ وی کہیا سی ایہ سبھ اکٹھے ہون گے‘ شہباز سریف دا بچنا مشکل اے‘ پہلے 9 ارب دا کیس سی‘ ہُن 23 ارب رُپئے دا نواں نکل آیا اے۔ وزیراعظم دا کہنا سی کہ بینکاں نُوں پابند کراں گے 5 فیصد شرح سود اُتے گھراں لئی قرض دین‘ شرح سود بہت زیادا ودھی تے 7 فیصد اُتے گھراں لئی قرض دواں گے‘ شرح سود تھلے گئی تے گھراں لئی قرض وچ وی شرح سود گھٹ کراں گے۔