kraamaat@gmail.com
+ +92 333-430-6384


آملا…… وٹامن سی دا خزاناــــــ٭رویل فیچر٭


ابو نیلوفر November 02, 2020


آملا…… وٹامن سی دا خزاناــــــ٭رویل فیچر٭

ابو نیلوفر

آملاپنجاب دا اک جانیا پچھانیا پھل اے جہدا مربّا ہر حکیم دی دُکان توں مل جاندا اے۔ پنجاب دے لوک سینکڑے سال توں ایس کھٹے پر فایدے مند پھل نوں مربے دے رُوپ وچ کھا رہے نیں۔ ایہنوں دماغی قوت واسطے خاص کر مفید سمجھیا جاندا اے۔ چٹے ہور رہے والاں نوں کالا رکھن واسطے وی ایہنوں پہلے نمبر اُتے رکھدے نیں۔

آملے دا انگریزی ناں گوس بیری (Goosberry) اے جہنوں گزبیری وی آکھیا جاندا اے۔ ایہدا ساینسی ناں Ribus uva-crispa تے Ribes grossularia اے۔ ایہدا جدی علاقا یورپ تے شمالی افریقا اے۔ شمالی امریکا وچ وی ایہدیاں کجھ قسماں مل جاندیاں نیں۔ ایہ بنیادی طور اُتے اک جھاڑی اے جہڑی پنج فٹ توں وی اُچی چلی جاندی اے پر پنجاب تے باقی ہندستان وچ آملا درخت دے روپ وچ ملدا اے جہڑا 25 فٹ تیکر اُچا ہوندا اے۔ ایہدا ناں Phyllanthus emblica اے۔ آملے دے پتر ککر دے پتراں نال رلدے ملدے ہوندے نیں ٹاہنیاں کھلار والیاں تے گھنیاںجہناں نال بیر وانگوں گول گول پھل لگدے نیں۔ پھل لگن توں پہلاں ساوے پیلے پھُل وی آوندے نیں۔ آملے دا پھل لکیردار چھے حصیاں وچ ونڈیا ہویاہوندا اے۔ پت جھڑ دے موسم وچ لگن والا ایہ پھل پیلاہٹ مایل سبزتیز کھٹا تے رسیلا ہوندا اے جہدے اندر گول گٹک وی ہوندی اے۔ ایس پھل نوں سالن دے روپ وچ یاں فیر مربا بناکے کھادا جاندا اے۔ ایہدے رکھ دے پتےٹاہنیاںجڑاںپھل تے بیج دواواں وچ ورتے جاندے نیں۔ ایہناں نوں سیاہیشیمپو تے ہیرآیل وچ وی ورتیا جاندا اے۔

آملے دے پھل نوں دماغ تے نظر واسطے خاص کر بہت فایدے مند سمجھیا جاندا اے۔ ایہدے اندر وٹامن سی دی ماترا بہت زیادا ہوندی اے۔ ایتھوں تیکر کے آملا سُکا ہووے تاں وی وٹامن سی بہت زیادا ہوندا اے۔ ایس توں وکھ آملے وچ مختلف معدنیاتکیلشیمآیرن تے پوٹاشیم وی ملدے نیں۔

نظر تیز کرن لئی آملے دا مربا نرنے پیٹ کھادا جاندا اے۔ ایہدے نال اکھاں دوالے گھیرے وی مکدے نیں۔ آملے نوں پانی وچ دو کو گھنٹے بھیوں کے اوس پانی نال اکھاں دھوتیاں جاون تاں ایہ وی نظر تے گھیرے لئی فایدے مند اے۔

آملے دے جوس نوں وی ورتیا جاندا اے۔ ایہدے نال حافظا تے یادداشت وی بہتر ہو جاندی اے۔ شوگر دے روگی واسطے آملا بہت فایدے مند اے۔ ایہ شوگر دی ماترا نوں کنٹرول کردا اے۔ ایہنوں خون پیدا کرن لئی بہترین دوا وی سمجھیا جاندا اے۔ خون دی کمی والے روگی آملے دا جوس روز دو چمچے پین۔ ایہدے نال بھکھ وی لگن لگ پیندی اے۔ ڈِگدے تے چٹے ہو رہے والاں والے جے روز نرنے پیٹ دو آملے چوس چوس کے کھا لیا کرن تاں پریشانی توں چھٹکارا ہو جاندا اے۔ والاں دی خشکی دور کرن لئی آملے اُبال کے اوہناں دے ٹھنڈے کیتے پانی نال دھونا وی بہت فایدا دیندا اے۔ چوتھائی کلو سرہیوں دا خالص تیل لے کے اوہدے وچ دس بارھاں دانے تازا آملے پا کے بہت ہلکی اگ اُتے پکاندے رہوے۔ ایتھوں تیکر کہ آملے سڑ کے کالے ہو جاون۔ فیر ایہ آملے کڈھ کے سٹ دیو تے تیل سانبھ لوو۔ ایہ تیل والاں دی خشکی دا بہترین علاج اے۔

آملے دامربابنان لئی ادھ کلو تازے آملے لے کے اوہناں نوں پانی وچ اُبال کے تھوڑا نرم کر لوو۔ فیر ایہ پانی وکھرا کر لوو۔ ایہ پانی وٹامن سی دی کمی دُور کرن لئی پیتا وی جا سکدا اے تے ایہدے نال سر وی دھوتا جا سکدا اے۔ سر دھون نال خشکی دُور ہو جاندی اے۔ اُبلے ہوئے آملے ادھ کلو چینی دی چاشنی وچ پا کے تھوڑی دیر ہور پکا لوو۔ مربا تیار اے۔

سالن بنان لئی وی آملے اُبال کے اوہناں دا پانی وکھرا کر لیا جاندا اے۔ فیر ایہ املے عام سالن وانگ مسالا بھُن کے اوہدے اندر پکائے جاندے نیں۔ آملے دا سالن وی وٹامن سی نال بھرواں ہوندا اے۔ کھٹاکھٹا ایہ سالن پکان سمے ایہدے وچ ٹماٹر ورتن دی ضرورت نہیں ہوندی کیوں جے ایہ آپ ای بہت کھٹا ہوندا اے۔

بالاں دا دماغ تے یادداشت تیز کرن لئی اوہناں نوں روز دے ناشتے وچ سویرے اک یاں دو دانے آملے دا مربا کھوان دی عادت بنا دیو۔ بالاں دا حافظا ای تیز نہیں ہووے گااوہ والاں دے کئی روگاں توں وی مکت رہن گے تے اوہناں دے وال لمے چر تیکر کالے وی رہن گے۔

آملے نوں ترپھلے وچ وی ورتیا جاندا اے۔ ایہدے لئی سُکے ہوئے آملےسُکی ہڑیڑتے بہیڑے برابر ماترا وچ لے کے پیہ لوو۔ فیر ایہنوں چھان کے رکھ لوو۔ روز سویرے نرنے پیٹ اک نکا چمچ ایہ پوڈر پانی نال کھا لوو۔ ایہدے نال پیٹ دے بہت سارے روگاں توں بچے رہوو گےدماغ وی تیز ہووے گا تے وال وی ساری عمر کالے رہن گے۔