کیہ پنجابی حملا آوراں دا خیر مقدم کردے رہے نیں ؟۔۔۔۔٭رویل ٭

کیہ پنجابی حملا آوراں دا خیر مقدم کردے رہے نیں؟۔۔۔۔٭رویل ٭

ازھر مُنیر

پاکستان دیاں ساریاں قومیتاں تے لسانی گرُپاں نے اِک اصول اپنا رکھیا اے:

”پنجابیاں دے بارے وچ ہر طرحاں دی اِلزام تراشی کرنا‘ جھوٹھ گھڑنے‘ حقایق نُوں مِدھ کے پیس کرنا تے اوہناں دے خلاف ہر طرحاں دی گندی زبان استعمال کرنا‘ اوہناں نُوں گالھاں کڈھنا تے دُشنام طرازی کرنا ساڈا حق اے تے جے کوئی پنجابی واقعات نُوں تواریخ دے حقایق دی روشنی وچ تے اوہناں دے درست تناظر وچ جانچ کے سچ نُوں پیش کردا اے تے اِنج پنجابیاں دا دِفاع کردا تے اوہناں اُتے لائے گئے الزاماں دا پول کھولدا تے جھوٹھ توں پردا چُکدا اے تے اوہ بڑا متعصب‘ صوبائیت پرست تے شوونسٹ (Chauvinist) اے۔“

بدقسمتی دی گل ایہ ے کہ آپ پنجابیاں نے وی اوہناں دے ایس ”حق“ نُوں دل تے جان توں منیا ہویا اے۔ ایس لئی نہ تے اوہ واقعات نُوں تواریخی حقایق دی روشنی وچ پرکھ کے سچ تے جھوٹھ نُوں وکھرا وکھرا کر کے پیش کر سکدے نیں تے نہ ایس خوف توں ایس معاملے وچ اپنا دِفاع کردے نیں کہ کدھرے اوہناں اُتے متعصب تے صوبائیت پرست یاں شوونسٹ ہون دا الزام نہ لگ جاوے۔

پنجابیاں دے علاوا ہور قومیتاں بھاویں مذہب دے ناں اُتے سیاست کرن والیاں جماعتاں ہون یاں ترقی پسندی دے ناں اُتے‘ اُنج تے اِسلامی بھرا بندی تے ترقی پسندی دے اُچے اُچے دعوے کردیاں نیں پر جویں ای قومیت دی گل آندی اے تے فورن اسلامی ایکے تے ترقی پسندی نُوں چھڈ کے سندھی‘ پشتون‘ بلوچ تے ”مہاجر“ بن جاندیاں نیں جد کہ ایہدے مقابلے وچ پنجابیاں توں ایہ توقُع سگوں مطالبا کیتا جاندا اے کہا وہ کسے وی صورت اپنی قومیت دا دفاع نہ کرن تے اوہناں دے حوالے توں حقایق نُوں جویں وی مدھ کے پیش کیتا جا رہیا اے تے اوہناں دے بارے وچ جہڑے جھوٹھ گھڑے جا رہے نیں‘ الزامات لائے جا رہے نیں تے دُشنام طرازی کیتی جا رہی اے اوہناں نُوں بغیر کسے حیل و حجت دے قبول کردے رہے نہیں تے اسلامی ایکے تے ترقی پسندی سگوں آپ پاکستان دا وُجود خطرے وچ پے جاوے گا۔ یعنی پنجابیاں دا ایہو جہیا فعل کافرانا یاں رَجعت پسندانا جد کہ آپ ایہناں لوکاں دا ایسے نوع دا عمل ترقی پسندانا تے اسلام دیاں تعلیمات دے عین مطابق۔ تے سادا لوح پنجابی ایس تشریح تے صورتحال نُوں مندے وی لگے آ رہے نیں۔

ایہدی اِک مثال افغان مہاجرین نُوں واپس اوہناں دے ملک گھلن دا معاملا اے جہناں دی ایتھے موجودگی نُوں حکومت تے عسکری اِدارے قومی سلامتی لئی زبردست خطرا متھ چُکے نیں۔ ایس لئی کہ نہ صرف ایہ کہ دہشتگرد دہشتگردی دیاں کارروائیاں کرن توں پہلے یاں بعد وچ ایہناں دے کول پناہ لیندے نیں سگوں اپنے آپ نُوں مہاجرین وچ وی دہشتگرداں دی اِک وڈی گنتی موجود اے۔ وڈی گنتی کیہ‘ اکثریت۔ ایس توں وکھ افغان مہاجرین دے کیمپاں وچ کھولے گئے سکولاں وچ جہڑا نصاب پڑھایا جا رہیا اے اوہ پاکستان دُشمنی اُتے مبنی اے۔ یعنی کہ اِک پاسے تے پاکستان ایہناں لوکاں نُوں پناہ دے رہیا اے تے ایہدے نتیجے وچ سو طرحاں دیاں تکلیفاں چُک رہیا اے جد کہ دوجے پاسے ایس ملک دے اندر پاکستان دُشمنی اُتے مبنی نصاب پڑھایا جا رہیا اے۔ جد کہ ایہدے نال نال جہناں لکھاں افغاناں نے جعل سازی راہیں پاکستانی شناختی کارڈ تے پاسپورٹ حاصل کر رکھے نیں‘ اوہناں دی جعلی پاکستانی شہریت نُوں ختم کرن دا معاملا۔ ایہ افغان جدوں کسے ملک وچ ہَیروئن سمگل کردیاں ہویاں یاں کسے ہور جُرم وچ پھڑے جاندے نیں تے ناں پاکستان دا بدنام ہوندا اے۔ ایس لئی کہ ایہناں دے کول پاکستانی شناختی کارڈ تے پاسپورٹ ہوندے نیں جہڑے ایہناں نے فراڈ راہیں حاصل کررکھے نیں۔

پر جدوں ایہ معاملات قومی سطح اُتے بحث ہیٹھ آئے تے ایس حوالے توں کارروائی دا اغاز ہویا تے پشتوناں دیاں مذہب دے ناں اُتے سیاست کرن والیاں جماعتاں ہون یاں کھبے پَکھ دیاں جماعتاں جہڑیاں عام حالات وچ اِک دوجے دے سخت خلاف تے دُشمن نیں‘ اِکو دَم اپنے نظریاتی اِختلافات نُوں پچھے سُٹ کے پاکستان دی معیشت تے امن و سلامتی اُتے بھار بنے افغان مہاجرین تے دھوکھے بازی تے فراڈ نال پاکستانی شہریت حاصل کرن والے افغاناں دی حمایت وچ اِک ہو گئیاں۔ ایس لئی کہ ایہ پشتون معاملا سی۔ تے جتھے پشتوناں دی گل آ جاوے اوتھے ایہ جماعتاں نہ صرف ایہ کہ اک دُوجے دے نال شدید نظریاتی اختلافات نُوں بھُلا دیندیاں نیں سگوں قومی سلامتی نُوں داء اُتے لان توں وی گریز نہیں کردیاں۔ حالاں جے ایہناں وِچوں کھبے پَکھ دیاں دعویدار کئی جماعتاں ماضی وچ ایہناں مہاجرین نُوں افغان بھگوڑے متھدیاں رہیاں نیں۔ ایس لئی نہیں کہ اودوں ایہ جماعتاں متعصب پشتون شوونسٹ نہیں سن سگوں ایس لئی کہ اوس ویلے ایہ کابل دے ایہو جہے پشتون حکمراناں دیاں حامی سن جہناں دے ایہ مہاجرین مخالف تے باغی سن۔

انج سندھ ہون‘ پشتون ہون یاں کسے ہور قومیت دے حامل‘ جدوں ایہناں دی قومیت دا معاملا آ جاوے تے بھاویں اوہ قومی سلامتی دے خلاف ای کیوں نہ ہووے ایہ لوک اوہدی حمایت وچ لک بنھ لیندے نیں جد کہ ایہد ے مقابلے وچ جے کوئی پنجابی صرف پنجابیاں اُتے لائے کسے جھوٹھے تے بے بنیاد الزام نُوں تواریخی حقایق دی روسنی وچ غلط ثابت کرن دی کوشش ای کرے تے اِک گرُپ اوہنوں فورن کافِر تے دوجا رَجعت پسند متھ دیندا اے تے سادا لوح پنجابی کدی کافِر تے کدی رَجعت پسند ہون دے الزم توں بچن دی خاطر فورن مدافعانا پوزیشن اُتے آ جاندے نیں تے انج محسوس کرن لگدے نیں جویں اوہ کسے بُہت وڈے جُرم دا اِرتکاب کر رہے ہون۔ تے اوہناں دے مخالفین دا ایس الزام تراشی نال مقصود وی ایہو ہوندا اے۔

اِک ہور مثال ویکھو۔

اِک حکمران جہنوں برصغیر دے لوکاں نے مجاہدِ اسلام ورگا رُتبا دے رکھیا اے‘ اوہنے اپنے جہناں ایرانی وڈکیاں دی شان وچ زمین اسمان دے قلابے ملاون تے اوہناں نُوں ایس دھرتی دے سبھ توں بہادر تے عظیم انسان ثابت کرن دی خاطر فردوسی توں ”شاہ ناما“ لکھویا اوہ سبھ دے سبھ کافر سن جد کہ ایہدے مقابلے وچ جے کوئی پنجابی بھُل کے ہزاراں ورھے پہلاں‘ طلوع اسلام توں بہت پہلے ہون والے کسے غیر مُسلم پنجابی دی تعریف وچ دو لفظ کَہ دویے تے اوہدے ایس فعل نُوں غداری‘ کُفر تے پتا نہیں کیہ کیہ کہیا جاندا اے۔ اِنج ایس حوالے توں پنجابیاں تے غیر پنجابیاں لئی دُہرے معیار قایم کر دِتے گئے نیں۔ تے سادا لوح پنجابی کافِر ہو جان دے ایس باطل خوف توں ایہناں دُہرے معیاراں نُوں قبول کردے چلے آ رہے نیں۔

حقیقت ایہ اے کہ معاملا کُفر تے اِسلام دا نہیں‘ غیر پنجابیاں دا پنجابیاں دے خلاف تعصب اے جہدی بناء اتے اوہ کسے پنجابی دی تعریف برداشت ای نہیں کر سکدے۔ برداشت کیہ‘ سُن وی نہیں سکدے۔ ایس لئی ایہدے لئی رَجعت پسندی‘ کُفر تے غداری دے فتوے لے کے آجاندے نیں۔ ورنا کافِر ایرانی بادشاہواں دی تعریف وچ 20 ہزار شعر لکھوان والے محمود دے بارے وچ تے اج تک کسے نے کُفر دا فتوا جاری نہیں کیتا‘ نہ کدی کسے نے فردوسی نُوں کافِر تے اسلام دُشمن متھیا اے۔

ایہ تحریر دوجیاں قومتاں دی نفرت‘ تعصب تے جھوٹھ اُتے مبنی ایس ڈِکٹیشن نُوں نہ منن تے واقعات نُوں تواریخی حقایق تے سچ دی روشنی وچ پرکھن تے بیان کرن دی اِک عاجزانا کوشش اے۔

( جاری اے)

٭٭٭٭٭