فیصل آباد: کڑیاں دے کالج وِچ پنجابی بولن اُتے پابندی،پنجابی سیوکاں ولوں پرنسپل دا دماغی معائنا کروان دی منگ۔۔۔٭رویل نیوز٭

فیصل آباد (اچیچی رپورٹ) جتھے پنجابی پیارے اپنی ماں بولی دے حقاں لئی جدوجہد کر رہے نیں‘ اوتھے ایسّے پنجاب اندر انج دے دماغوں خالی تے عقلوں پیدل لوک وی نیں جہڑے پنجاب وچ وس کے‘ پنجاب دا کھا کے‘ پنجاب دِیاں ہواواں وچ ساہ لے کے‘ پنجابی دشمنی دی لعنت دا طوق اپنے گل پا رہے نیں۔ ایہو جہے لعنتی کرداراں وچ اِک‘ پروفیسر انور بیگم ہوراں دا ناں وی شامل اے جہڑے گورنمنٹ گرلز ڈگری کالج‘ گلستان کالونی فیصل آباد دے پرنسپل نیں۔ انور بیگم نے اپنے کالج دے پراسپکٹس وچ قاعدے تے ضابطیاں اندر ایہ گل شامل کروائی اے کہ کڑیاں کالج وچ پنجابی نہیں بولن گیاں۔ اوہناں دا ایہ احمقانا عمل نہ صرف بنیادی حقاں دی مناہی اے‘ سگوں پاکستان دے دستور دے خلاف وی اے جتھے مادری زبان دے حقاں دی ضمانت دِتی گئی اے۔ پنجابی سیوکاں وچ انور بیگم دے ایس احمقانا کارے بارے انتہائی غم تے غصا پیدا ہو رہیا اے تے لوک منگ کر رہے نیں کہ انور بیگم دا دماغی معاینا کروایا جاوے تے جے اوہ واقعی ذہنی مریض نیں تاں اوہناں نوں پاگل خانے داخل کروایا جاوے تاں جے اوہ اک اہم پوسٹ اُتے بہ کے پڑھیاراں دے دماغ خراب نہ کر سکن۔