kraamaat@gmail.com
+ +92 333-430-6384


اگلے ہفتے  داخلا‘ اطلاعات‘ تجارت‘ ریلوے‘ سائنس و ٹیکنالوجی وزارتاں تبدیل ، فیصلا ہو گیا۔۔۔٭رویل نیوز٭


نمائندا رویل November 06, 2020


اسلام آباد (نیوز ڈیسک) وزیراعظم عمران خان نے مرحلا وار وفاقی کابینا تے بیورو کریسی وچ اعلا سطح اُتے تبدیلیاں دا فیصلا کیتا اے۔ وسیلیاں دا دعوا اے کہ اگلے ہفتے ایس حوالے توں اغا ز ہو جاوے گا جد کہ کئی اہم اداریاں وچ وی تبدیلیاں لئی وزیراعظم عمران خان نے ہوم ورک مکمل کر لیا اے تے ایہناں تبدیلیاں دی وڈی وجھا حکومت دی کمکاری تے گورنر ز دے معاملے نُوں بہتر بنانا اے۔ داخلا‘ اطلاعات‘ تجارت‘ ریلوے‘ سائنس و ٹیکنالوجی دے وزراء دیاں وزارتاں تبدیل ہون دا پکا امکان اے‘ جہناں وزیراں نُوں نواں ٹاسک ملے گا اوہناں نال عمران خان ون آن ون ملاقاتاں کر رہے نیں۔ وزیر ریلوے شیخ رشید احمد تے وزیر سائنس و ٹیکنالوجی فواد چودھری دی وزیراعظم نال ملاقات ہو چکی اے۔ شیخ رشید نُوں اطلاعات یاں داخلا دی وزارت ملن دا امکان اے جد کہ فواد چودھری وی داخلا دی وزارت وچ دلچسپی رکھدے نیں جے شیخ رشید نُوں داخلا دی وزارت دِتی گئی تے فیر فواد چودھری نُوں وزارت اطلاعات دیاں ذمے داریاں دُبارا ملن دا امکان اے۔ وزیراعظم وزارت نیشنل فوڈ سیکیورٹی دے وزیر فخر امام دی کمکاری توں وی خُش نہیں کیوں جے ایہ وزارت آٹا تے کنک بحران اُتے قابو پان وچ ناکام رہی۔ ایسے طرحاں معاشی پالیسیاں دے ہُن تک مؤثر نتیجے ساہمنے نہ آن اُتے حفیظ شیخ دی کمکاری اُتے مطمین نہیں اے پ ایہناں دا متبادل کیہ ہووے گا ایہدے اُتے سوچ وچار جاری اے۔ مشیر تجارت رزاق داؤد نُوں وی شوگر سکینڈل دی وجھا توں وزارت توں فارغ کرن دا امکان اے جد کہ اسد عمر نُوں وزارت توانائی وچ لیان دی تجویز اے۔