موٹروے دُکھانت بارے فلم ”اب بس“ لوکاں نُوں بھا گئی، صنم سعید نے مایا دا مرکزی کردار ادا کیتا۔۔۔٭رویل نیوز٭

کراچی (نمایندا رویل) لاہور موٹروے اُتے سوانی نال اجتماعی زیادتی دے واقع اُتے مبنی شارٹ فلم ”اب بس“ وچ دِتے گئے مضبوط پیغام نے لوکاں نُوں جذباتی کر دِتا پر یوٹیوب اُتے ایہ مختصر فلم لوکاں وچ بے حد پسند کیتی جا رہی اے۔ دو مہینے پہلاں لاہور موٹروے اُتے سوانی نال اجتماعی زیادتی دے دُکھانت نے جتھے پورے پاکستان نُوں ہلا کے رَکھ دِتا سی‘ اوتھے ایس واقع نے سوانیاں دے تحفظ بارے کئی سوالات کھڑے کر دِتے کہ کیہ ساڈے ملک وچ کلی سوانی بلکل محفوظ نہیں۔ ایہناں سارے سوالاں نُوں اجاگر کردی مختصر فلم ”اب بس“ یوٹیوب اُتے ریلیز کیتی گئی اے۔ فلم وچ صنم سعید نے مایا دا مرکزی کردار ادا کیتا اے۔ اوہناں نے فلم وچ اِک ایہو جہی سوانی دا کردار ادا کیتا اے جہنوں کسے ایمرجنسی دی وجھا توں اپنی دھی دے نال کلیا ای رات ویلے سفر لئی نکلنا پیندا اے‘ پر سفر لئی نکلن توں پہلے اوہ اپنے تحفظ لئی کیہ کیہ تیاریاں کردے نیں ایہو ایس فلم دی اصل کہانی اے۔