کساناں بارے احتجاج،کنگنا مشکل وچ پھَس گئے،رلتی وڈیری سوانی نُوں تنقید دا نشانا بنایا سی۔۔۔٭رویل نیوز٭

ممبئی (نیٹ نیوز) بالی ووڈ فلم کوئن دی سٹار کنگنا رناوت سوشل میڈیا اُتے متعدد معاملات اُتے اپنی رائے دین توں نہیں کتراندے تے مختلف معاملات وچ بغیر وجھا لَت اڑان دی وجھا توں ایہناں نُوں اکثر مشکلاں دا ساہمنا وی کرنا پیندا اے۔ حال ای وچ اداکارا کنگنا رناوت نے بھارت وچ جاری کساناں دے احتجاج وچ شامل بھٹھنڈادی اِک وڈیری سوانی مہندر کور دی تصویر پوسٹ کردیاں ہویاں اوہناں نُوں تنقید دا نشانا بنایا سی۔ کنگنا نے احتجاج وچ سامل وڈیری سوانی نُوں تنقید دا نشانا بناندیاں ہویاں کہیا کہ ایہ 100 رُپئے دے بدلے احتجاج وچ پہنچ گئے۔ ایس توں بعد بالی ووڈ اداکارا کنگنا رناوت نے اپنی ایہ متنازع ٹویٹ فورن ڈیلیٹ کر دِتی پر بھارتی شوبز شخصیات سنے لوکائی ولوں اوہناں اُتے تنقید دے تیر برسان دا سلسلا شروع ہو گیا۔ اداکارا کنگنا رناوت دی ایس ٹویٹ اُتے اداکار دلجیت دوسانج وی چُپ نہ رہ سکے تے اوہناں نے کنگنا نُوں کھریاں کھریاں سنا دِتیاں جہدے بعد دوہاں وچکار اِک نویں بحث چھڑ گئی۔