عمران خان ترقی پذیر ملکاں دی بدعنوان اشرافیا نیں: مریم اورنگزیب۔۔۔٭رویل نیوز٭

اسلام آباد (نیوز ڈیسک) مسلم لیگ (ن) دی ترجمان مریم اورنگزیب نے وزیراعظم عمران خان دے جوبائیڈن لئی خیر مقدمی بیان اُتے رد عمل دیندیاں ہویاں کہیا اے کہ عمران خان ترقی پذیر ملکاں دی بدعنوان اشرافیا نیں جہنے لوکائی نُوں مہنگائی تے مفلسی دے گھاٹ اتار دِتا اے‘ جوبائیڈن نُوں دَسو کہ ترقی پذیر ملکاں توں بدعنوان اشرافیا نے لُٹ مار کے امریکا وچ پیزے دا کاروبار شروع کیتا‘ عمران صاحب جوبائیڈن دی چاپلوسی دی بجائے علیمہ باجی دیاں بیرون ملک جائیداداں دا راز قوم نُوں دَسن‘ عمران صاحب جوبائیڈن دے بیان اُتے خیر مقدم توں پہلے اپنی ناجایز دولت دے فارن فنڈنگ کیس دا جواب دین‘ عمران صاحب چھے سال توں ارباں رُپئے دے فارن فنڈنگ کیس وچ تُسیں مفرور او‘ ایہدے بارے وچ دَسّو‘ عمران صاحب 23 خُفیا فارن فنڈنگ اکاؤنٹس دا دَسن جہڑے سٹیٹ بینک نے پھڑے نیں‘ عمران صاحب پارلیمنٹ دے بعد الیکشن کمیشن نُوں وی تالا لا دِتا تاں جے فارن فنڈنگ کیس دی سنوائی نہ ہووے‘ عمران صاحب فارن فنڈنگ کیس توں نَسنا ثبوت اے کہ تہاڈی ناجایز دولت پھڑی گئی اے‘ عمران صاحب فارن فنڈنگ کیس دی سنوائی غیر معینا مدت لئی ملتوی کرن نال تہاڈی ناجایز دولت نہیں لُکے گی‘ عمران صاحب فارن فنڈنگ دی ناجایز غیر ملکی دولت نال پاکستان دی معیشت‘ خارجا پالیسی تے لوکائی دی تباہی دا ایجنڈا قوم سمجھ چکی اے‘ عمران صاحب آٹا کھنڈ چوری وچ تہاڈی ناجایز دولت نہیں لُکے گی‘ عوامی دولت لُٹن دا جواب دینا پوے گا‘ عمران صاحب بنی گالا‘ زمان پارک‘ تہاڈی پرتعیس زندگی دے پچھے کہدا کہدا مال اے‘ ایہ قوم نُوں سمجھ آ چکی اے۔