کرونا وایرس نال پاکستان وچ ہور 60 بندے جان دی بازی ہار گئے۔۔۔٭رویل نیوز٭

اسلام آباد (بیورو رپورٹ) عالمی وباء کرونا وایرس نال پاکستان وچ ہور 60 بندے جان دی بازی ہار گئے نیں تے مرن والیاں دی کل گنتی 8 ہزار 547 ہو گئی اے۔ نیشنل کمانڈ اینڈ اپریشن سینٹر دے مطابق کرونا دے ہور 2 ہزار 963 کیسز رپورٹ ہوئے نیں جہدے بعد متاثرا بندیاں دی مجموعی گنتی 4 لکھ 26 ہزار 142 تک پہنچ چکی اے۔ پاکستان وچ کرونا دے 3 لکھ 72 ہزار 271 روگی صحتیاب ہو چکے نیں تے 45 ہزار 324 علاج ہیٹھ نیں۔ کرونا دے کارن سبھ توں ودھ مَوتاں پنجاب وچ ہوئیاں نیں جتھے 3 ہزار 242 بندے جان دی بازی ہار چکے نیں جد کہ سندھ وچ 3 ہزار 81 روگی چلانا کر چکے نیں۔ پورے ملک وچ کرونا وایرس دے مثبت کیسز دی شرح 7.9 فیصد ہو گئی اے۔ کراچی کرونا مثبت کیسز دی شرح 17.39 فیصد اے‘ حیدر آباد وچ مثبت کیسز دی شرح 18.43‘ ازاد کشمیر 10.83‘ بلوچستان 11.62‘ گلگت بلتستان وچ 2.68‘ اسلام آباد وچ 6.16‘ پختونخوا 11.29 تے سندھ وچ 11.47 فیصد تک ہو گئی اے۔ این سی او سی دے مطابق پنجاب وچ مثبت کیسز دی شرح 4.42 اے۔ لاہور وچ مثبت کیسز دی شرح 5.47 اے۔