حکومت نُوں گھر گھلن لئی  ہر  وار  کراں گے، لانگ مارچ جنوری دے اخیرلے ہفتے ہووے گا: اپوزیشن اتحاد پاکستان ڈیمو کریٹک موومنٹ۔۔۔٭رویل نیوز٭

اسلام آباد (نیوز ڈیسک) حکومت خلاف بنن والے ایکے پاکستان ڈیمو کریٹک موومنٹ ولوں فیصلا کیتا گیا اے کہ جنوری دے آخری ہفتے وچ لانگ مارچ کیتا جاوے گا۔ 13 دسمبر نُوں مینار پاکستان ہر حال وچ جلسا ہووے گا‘ اپوزیشن اتحاد پاکستان ڈیمو کریٹک موومنٹ (پی ڈی ایم) نے 13 دسمبر نُوں لاہور وچ ہر قیمت جلسا کرن دا عزم ظاہر کردیاں ہویاں کہیا اے کہ ایس حکومت نُوں گھر گھلن لئی اسیں ہر ہتھیار استعمال کراں گے۔ وفاقی راجدھانی وچ پاکستان ڈیمو کریٹک موومنٹ (پی ڈی ایم) دی سٹیئرنگ کمیٹی دا اجلاس ہویا جہدے بعد ترجمان میاں افتخار نے پاکستان مسلم لیگ ن دے آگو احسن اقبال دے نال پریس کانفرنس وچ فیصلیاں توں اگاہ کیتا۔ میاں افتخار نے کہیا کہ جنوری د آخری ہفتے وچ لانگ مارچ ہووے گا‘ جنوری دے آخری ہفتے تاجر‘ ڈاکٹرز‘ وکلاء‘ استاداں‘ کساناں نال رابطے کراں گے۔ مینار پاکستان نُوں ڈیم بنا دِتا گیا اے‘ پانی وچ کھلو کے وی 13 دسمبر نُوں ہر حال وچ جلسا ہووے گا‘ پوری دنیا دیاں نظراں لاہور جلسے اُتے لگیاں نیں۔ اے این پی آگو دا کہنا سی کہ حکومت جو مرضی کر لوے فیل ہووے گی‘ ملتان دا حشر ایہناں نے ویکھ لیا اے‘ لاہور دے جلسے وچ اگلے شیڈول دا اعلان کیتا جاوے گا‘ گرفتاریاں شروع کر دِتیاں گئیاں نیں‘ ڈی جی بٹ نُوں وی گرفتار کیتا گیا اے۔ میاں افتخار نے کہیا کہ لاہور دا جلسا روکن لئی ساریاں کارروائیاں جاری نیں‘ حکمران اینا ڈر گئے نیں‘ جلسا لازمی ہووے گا‘ ایہ حکومت دھاندلی دی پیداوار اے‘ اسیں نہ پہلے منیا نہ اگے مناں گے‘ سار ادارے اپنیاں حداں وچ رہ کے کم کرن۔ جلسے نُوں تھریٹ بارے اوہناں نے کہیا کہ تھریٹ الرٹ تے پشاور‘ کوئٹہ وچ وی سی‘ ایہ اپنی مرضی دے الرٹ جاری کردے نیں‘ رانا ثناء دا کوئی وال وی وِنگا نہیں کر سکدا۔ سارے مکتبا فکر دے لوکاں د ے نال کنونشن دا وی ارادا اے‘ لانگ مارچ توں پہلے ٹمپو نُوں ودھاواں گے۔ ایس توں پہلاں اسلام آباد وچ چیئرمین پیپلز پارٹی بلاول بھٹو زرداری تے مرکزی نائب صدر مسلم لیگ (ن) مریم نواز دے نال میڈیا نال گلبات کردیاں ہویاں آگو پی ڈی ایم مولانا فضل الرحمان نے کہیا کہ ایس ویلے پنجا ب سرکار جلسا گاہ مینار پاکستان نُوں ڈیم بنا رہی اے تاں جے اوتھے جلسا نہ ہو سکے جد کہ کہندے نیں اسیں جلسے نُوں نہیں روکاں گے پر اجازت وی نہیں دے رہے‘ فیر جتھے اسیں جلسا کر رہے آں اوہنوں ڈیم وی بنا دِتا اے تے ایہدے متبادل اُتے گل ہوئی۔ اوہناں دا کہنا سی کہ اسیں طے کیتا اے کہ جلسا ہو کے رہوے گا تے ہر قیمت اُتے لوک ایس جلسے وچ آن گے‘ ہر پاسیوں لاہور لوکاں دا مرکز تے 13 دسمبر اِک تواریخی دن ہووے گا۔ مولانا فضل الرحمان نے کہیا کہ ایہدے اُتے اتفاق اے کہ جے اوہناں نے اِک راہ روکیا تے دوجا راہ بنانا اے تے دوجا راہ روکیا تے تیجا راہ بنانا اے۔ استعفیاں بارے سوال اُتے اوہناں نے کہیا کہ گلاں نال تحریک نُوں تقویت ملدی اے‘ سٹیئرنگ کمیٹی وچ شٹر ڈاؤن‘ پہیا جام ہڑتال‘ جلوس تے اسلام آباد ول مارچ کہڑے ویلے کراں گے ایہدا فیصلا ہووے گا تے ایہناں سارے مرحلیاں وچ استعفیاں دا ذکر ہوندا رہوے گا۔ اوہناں دا کہنا سی کہ اگلے دناں وچ حکمت عملی وی واضح کراں گے کہ استعفے کہڑے ویلے ڈھال بنا کے ایہناں دے سر اُتے دے مارنے نیں۔ اوہناں نے کہیا کہ اج جمہوریت نہیں اے سگوں آمریت دا اِک مہرا اے‘ جہنے جمہوریت نُوں دفن ک دِتا اے‘ اسیں جمہوریت دی احیاء‘ جمہوریت دی بقاء تے آئین دے تحت حقیقی معنیاں وچ لوکائی دی نمایندا حکومت دی گل کرنی اے۔ پی ڈی ایم دے آگو نے کہیا کہ اسیں ایس حکومت نُوں نہ لوکائی دی نمایندا سمجھدے آں تے نہ ای آئینی تے جمہوری حکومت تسلیم کردے آں‘ ہُن وی اسٹیبلشمنٹ ایہناں دی محافظ بنی ہوئی اے۔ اوہناں نے کہیا کہ جدوں اسٹیبلشمنٹ ایس طرحاں دی اِک ناجایز حکومت دی محافظ بنی رہوے گی تے کس طرحاں ایس نظام نُوں جمہوری کَہ سکدے آں۔ سندھ اسمبلی دے ٹُٹن نال سینیٹ دے الیکٹورل کالج ٹُٹن بارے سوال اُتے اوہناں نے کہیا کہ ایس ویلے پاکستان وچ موجود اسمبلیاں راہیں سینیٹ دے اگلے انتخابات ہون گے تے ظاہر اے اوہ جعلی قسم دے ہون گے تے ایہدے الیکٹورل نُوں توڑنا اِک جمہوری تے آئینی عمل دا حصا تصور کراں گے۔ ایس موقع اُتے چیئرمین بلاول بھٹو زرداری نے کہیا کہ پی پی پی دی سیاست سڑکاں اُتے شروع ہوئی سی تے ہر آمرانا دور دا مقابلا کیتا اے تے اج وی اسیں سبھ مقابلا کراں گے۔ اوہناں دا کہنا سی کہ اسیں سبھ عمران خان دی سلیکٹڈ حکومت تے ایہناں دے سہولت کاراں نُوں گر گھلن لئی نکلے آں‘ ایہدے وچ پی پی مولانا فضل الرحمان تے مریم نواز سنے ساریاں 11 جماعتاں اِک صفحے تے اِک پیج اُتے نیں۔ بلاول بھٹو نے کہیا کہ اسیں اے پی سی وچ 20 ستمبر نُوں اعلان کیتا سی کہ اسیں جلسے وی کراں گے‘ سول سوسائٹی نال رابطے تے احتجاج وی کراں گے‘ اسیں سارے جمہوری حربے استعمال کراں گے تے ایہدے وچ استعفے وی شامل نیں تے اسیں ایسے عمل نُوں اگے لے کے جا رہے آں۔ اوہناں دا کہنا سی کہ اسیں ایس حکومت نُوں گھر گھلن لئی ہر ہتھیار استعمال کرن لئی تیار آں تے ایہدے وچ پاکستان دی لوکائی وی شامل اے۔ اوہناں نے کہیا کہ پی پی پی ایس موضوع اُتے سی ای سی دا اجلاس بلا رہی اے جتھے اعتزاز احسن سنے ہور آگو رلت کرن گے تے جہڑا وی پی پی پی دا فیصلا ہووے گا اوہ اعتزاز احسن دا وی اونا فیصلا ہووے گا جنا میرا فیصلا اے۔ میڈیا نال گلبات کردیاں ہویاں مریم نواز نے کہیا کہ جلسے دی تھاں تبدیل نہیں کراں گے۔ جلسا مینار پاکستان ای ہووے گا۔ مریم نواز شریف دا کہنا سی کہ ارکان اسمبلی دے استعفے پارٹی قیادت دے کول جمع ہون گے‘ لاہور دا جلسا ہر حال وچ ہووے گا‘ جلسا اوتھے ہووے گا تے ضرور ہووے گا‘ موجودا حکومت ساڈے منصوبیاں اُتے تختیاں لگوا رہی اے‘ ایہناں دا تے کوئی منصوبا ای نہیں جہدے اُتے اسیں تختیاں لائیاں۔ ایس توں پہلاں پی ڈی ایم دی اہم بیٹھک ہوئی۔ وسیلیاں دے مطابق آگو مولانا فضل الرحمان پیپلز پارٹی دے تحفظات دور کرن وچ ناکام رہے نیں۔ پیپلز پارٹی دے تحفظات اُتے ہور ملاقاتاں اُتے اتفاق ہویا اے۔ مولانا فضل الرحمان‘ بلاول بھٹو زرداری تے مریم نواز دی ملاقات دی اندرونی کہانی دے حوالے توں وسیلیاں نے دَسیا کہ پیپلز پارٹی تے ن لیگ نے اپنے اپنے مؤقف توں پی ڈی ایم آگو نُوں اگاہ کر دِتا۔ پیپلز پارٹی دا مؤقف سی کہ سبھ توں پہلے پی ڈی ایم دے اعلان شدا شیڈول اُتے عملدرآمد کیتا جاوے‘ استعفے آخری کارڈ ہونا چاہیدا اے۔ وسیلیاں دے مطابق پیپلز پارٹی نے کہیا کہ پہلے ای استعفے دِتے تے فیر حکومت اُتے دباء نُوں ودھان لئی ہور آپشن مشکل ہون گے۔