محمد عامر دی ریٹائرمنٹ، بورڈ تے انتظامیا دا روّیا ۔۔۔۔٭رویل کالم٭

محمد عامر دی ریٹائرمنٹ، بورڈ تے انتظامیا دا روّیا ۔۔۔۔٭رویل کالم٭

عدنان چودھری

پچھلے دو تن دناں تو پاکستان دی کرکٹ وچ اک تھرتھلی مچی ہوئی اے۔ایس تھرتھلی دا کارن محمد عامر دا قومی کرکٹ ٹیم توں ریٹائرمنٹ دا اعلان اے۔چیتا رہوے کہ دو دن پہلے محمد عامر نے LPL لنکا پریمئیر لیگ دا فائنل کھیڈن توں بعد سماجی رابطے راہیں اک بیان دتاجہدے وچ عامر نے پاکستان کرکٹ بورڈ ، مینجمنٹ تے کوچ تے کچھ الزام لائے۔

محمد عامر پاکستان وچ ای نہیں سگوں دنیا دے منے پرمنے تے سر کڈھویں کھبے ہتھ دے فاسٹ بولراں چوں اک نے۔28ورھیاں دے عامر دا جنم 13 اپریل 1992 نوں ہویا تے ایہناں اپنی انٹرنیشل کرکٹ دی شروعات 2009 وچ پاکستانی جرسی پاندیاں ہویاں سری لنکا دے خلاف کیتی۔اج تک کل ملا کے محمد عامر نے 147میچاں وچ پاکستان دی نمائندگی کیتی۔پاکستان ولوں کھیڈیاں ہویاں محمد عامر 259 آوٹ کیتے۔

اپنی ریٹائرمنٹ بارے گل بات کردیاں ہویا محمد عامر دا آکھن سی کہ میں اس مینجمنٹ نال نہیں کھیڈ سکدا۔ایہ مینجمنٹ مینوں ذہنی طور تے ٹارچر کر رہی اے تے میں ایس صورتحال کارن ذہنی دباؤ نہیں برداشت کر سکدا۔مصباح الحق تے وقار یونس نال کھیڈنا وسوں باہر دی گل اے۔کوچز میرے تے طنز کردے نے تے آکھدے نے کہ عامر نے دھوکھا دتااے۔اس اعلان سے نال ای سوشل میڈیا تے اک طوفان کھڑا ہو گیا تے کئی اک لوگاں نے عامر تو اپنی ریٹائرمنٹ واپس لین دی درخاست وی کیتی۔

شعیب اختر داکہنا سی کہ عامر نوں اپنے فیصلے تے غور کرنا چاہیدا تے مینجمنٹ تے سبھ نوں تنگ کردی اے تے اس لئی مضبوطی نال اس دا مقابلہ کرنا چاہی دا اے اوہنوں اپنی پرفارمنس راہی جواب دینا چاہیدا ۔اس دے نال نال شعیب اختر نے ٹویٹر تے پاکستان کرکٹ بورڈ نوں پیغام دتا "پلیز ٹیلنٹ ضائع مت کریں"شاہد آفریدی دا کہنا سی کہ عامر نوں مینجمنٹ نال مل بیٹھ کے صلاح مشورے نال ایس دا حل کڈنا چاہی دا سی نہ کہ ریٹائرمنٹ لے لیندا۔

محمد عامر نے کہیا کہ مینوں ٹیسٹ کرکٹ توں ریٹائرمنٹ لین کارن طعنے دتے جا رہے سن جد کہ ٹیسٹ توں ریٹائرمنٹ لیندے ویلے پی سی بی دے چیرمین نجم سیٹھی تے کوچ مکی آرتھر نوں میرے اس فیصلے توں کوئی مسلہ نہیں سی بلکہ اوہناں میرا ساتھ دتا۔ریٹائرمنٹ دا اعلان سن کے PCB دا کہنا دی کہ عامر کوئنٹی تے لیگ کرکٹ کر کے ریٹائرمنٹ لے رہیا اے۔نیوزی لینڈ دے دورے تے جان آن ٹیم وچ محمد عامر دی شامل نہ ہون بارے پی سی بی دا کہنا سی کہ عامر دی پرفارمنس چنگی نہیں تے اوہ ورک لوڈ برداشت نہیں کر پا رہیا۔

پی سی بی ولوں لائے گئے اس الزام بارے عامر دا کہنا سی کہ سرلنکا لیگ کھیڈن لئی تے میں نیوزی لینڈ جان آلی ٹیم دے فائنل ہون تو بعد گیا آں۔جو کہ مینوں اپنی کارکردگی وکھان لئی کھیڈنی ضروری سی۔جتھوں تک لیگ کھیڈن دی گل اے تے او تے PCB ولوں سانوں سال وچ تن لیگز کھیڈن دی اجازت اے۔تے نالے میں کدی وی نئی آکھیا کہ میں کوئنٹی یا لیگ کھیڈن چاہندا آن جس لئی مینوں ٹیم وچ شامل نہ کیتا جاوے۔اگر مینوں پاکستان ولوں کھیڈن لئی آکھیا گیا ہوے تے میں لیگ کھیڈن لئی قومی ٹیم نوں کھیڈن تو انکار کیتا ہووے تے فر میں قصوروار آں۔جتھوں تک پرفارمنس دا سوال اے تے لوکاں PSL وچ محمد عامر دی پرفارمنس ویکھی اے۔کہ میں کس طرح سپر اوور وچ اپنی ٹیم نوں جت دووای تے PSL دےباقی میچاں وچ وی میری کارکردگی سبھ دے سامنے اے۔اس توں بعد سرلنکا پریمئیر لیگ وچ وی میری بالنگ سب دے سامنے اے۔LPL وچ میں اکو کھڈاری آن جنھے اک میچ وچ پنج وکٹا لیا نے۔اگر پرفارمنس نوں ویکھیا جاوے تے میں ٹیم چوں باہر ہون دے باوجود انٹرنيشنل کرکٹ کونسل ICC دی درجا بندی تے ستویں نمبر تے آں۔ورک لوڈ دی گل کردیاں عامر نے آکھیا کہ میں واحد کھڈاری آں جس نے 12000 اوور کرواے نے ۔ ایہ سبھ گلاں وقار تے مصباح الحق ولوں مینوں ٹیم چوں باہر کڈن تے اپنے من پسند بندھے ٹیم وچ شامل کرن دیا چالاں نیں۔

2010انگلینڈ دے دورے تے ہون آلی میچ فکسنگ بارے عامر دا کہنا سی کہ مینوں میچ فکسنگ دے طعنے دتے جاندے نے جدو کہ میں اپنی غلطی کھلے عام قبول کیتی اے جد کہ اپنی غلطی قبولن دا جگرا بہت گٹ ہوندا اے محمد عامر نے جیل کٹی تے اپنی پابندی پوری کیتی جس تو بعد فرسٹ کلاس کرکٹ وچ اپنی کارکردگی دے سر تے ٹیم وچ شامل ہویا۔ٹیم وچ شامل ہون نجم سیٹھی تے شاہد آفریدی ولوں ہون آلیاں کوششاں دا میں ڈونگے دلوں شکر گزار آن کہ اوہناں ساری ٹیم دی مخالفت دے باوجود مینوں ٹیم چ لیان لئی سپورٹ کیتا۔

نیوزی لینڈ دے دورے تے جان آلی ٹیم وچ شامل نہ ہون بارے عامر نے کہیا اے کہ ICC دی رینکنگ تے ستویں نمبر تے ہون دے باوجود مینوں پچھیا دسیا نہیں جاندا کہ تینوں اس کارن ٹیم وچ شامل نہیں کیتا جا ریا۔نہ ہی ڈراپ کرن بارے ٹیم مینجمنٹ کوئی صلاح مشورہ کیتا اے۔مینوں تے شوشل میڈیا توں معلوم ہویا اے کہ نیوزی لینڈ جان آلی 35 بندیاں دی ٹیم وچ شامل نہیں آں۔PCB تے مینجمنٹ کھڈاریاں دی عزت نفس نال کھیڈنا بند کرے۔

عامر دے ریٹائرمنٹ دے عندیے توں بعد PCB نے عامر نال رابطا کیتا تے اس گل دی تصدیق کیتی کہ عامر آن آلے سمے وچ پاکستان ولوں نہیں کھیڈے گا۔پی سی بی نے عامر دی ریٹائرمنٹ قبول کر دیا ہویا سکے لفظہ نال شکریہ وی آکھیا۔جو اس گل نو ثابت کردا اے کہ PCB عامر نوں پہلے توں ای فارغ کرن دا سوچی بیٹھا سی۔

محمد عامر کوئی پہلا کھڈاری نہیں جنھے پی سی بی دے خلاف ہنقارہ بھریا تے اوودا کرکٹ کیرئیر خطرے وچ پایا۔اس توں پہلاں وی سانوں کئی اک مثالاں ملدیاں نے جہناں چے کھڈاریاں نے بورڈ تے مینجمنٹ نال متھا لایا۔2014 وچ شاہد آفریدی نے اعجاز بٹ نال متھا لاندیاں ہویاں بورڈ تے مینجمنٹ دیا من مانیاں دا کھلے عام پرچار کیتا تے اوودی ریٹائرمنٹ دا اعلان کیتا۔2006 وچ یونس خان نوں وی ٹیم دا کیپٹن ہون دے باوجود چیرمین نال ملن لئی بوہے آگے کھڑنا پیندا سی سعید احمد دی وی بورڈ نال کئی اک معاملیاں چ ان بن رہی تے آخر اہنوں اوودی کرکٹ نوں سلاماں لیکم آکھنا پیا۔سرفراز نواز تے عمر اکمل وی ایسے سلسلے دی کنڈی نیں۔

وقار یونس دا کیریئر وی سدا رولے رپھڑے دا شکار ای ریا اے۔2010 وچ دنیا دا قابل فخر آل راونڈر عبد الرزاق وقار دے ظلم دا نشانہ بنیا تے۔2011 وچ وقار دی آفریدی نال وی ان بن ہوی تے اوس نے وی اپنی ریٹائرمنٹ دا اعلان کر دتا۔

2015 وچ وقار نے مصباح الحق نال مل کے سرفراز نوں ٹیموں باہر کیتا تے سرفراز نے دوجا موقع ملدیا ای اپنی پرفارمنس راہی وقار یونس تے مصباح الحق نوں جواب دتا۔2016 وچ وقار نے کچھ کھڈاریاں نال مل کے آفریدی دے خلاف سازش کیتی.2015 دا بدلا لین لئی وقار یونس نے موقع ملدیا ای مصباح الحق نال مل کے سرفراز نوں کپتانی توں فارغ کر دتا۔تے ہن آ کے دنیا دے ٹاپ کلاس بولر نوں ذہنی ٹارچر کر کے ریٹائرمنٹ لین تے مجبور کر دتا۔آیا اے وقار نوں ای سارے کھلاڑیاں نال مسئلا رہندا اے۔یا ں فیر اے وقار اپنی من مرضی کرن لئی کھڈاریاں دا اگا خطرے چ پائی جا رہیا اے۔

اینے سارے کارنامے PCB تے صاحب اقتدار لوگاں دے منہ تے سوالیا نشان نیں۔

ساڈی ٹیم نوں اینا گھاٹا پان تو بعد وی اہہو جے لوگ کیوں مینجمنٹ دا حصا بن جاندے۔اے پاکستان دی ٹیم اے یا وقار تے مصباح الحق دی ذاتی ٹیم اے جو اینیاں من مانیاں کیتاں جا ریا نے۔ایہ سوال حالے تک جواب طلب اے۔اک سابق کرکٹر تے سابق کپتان دے وزیراعظم ہوندیا ہویاں کرکٹ نال ایہ ہتھ ورتیا جاوے تے بڑی ماڑی گل اے۔ہن اُڈیک اس گل دی اے کہ حکومت تے بورڈ عامر دے مڑھے گئے الزاماں تے کوئی ایکشن لیندیا ہویا کوئی پچھ پڑتال وی کردے نے یا ں فیر ایہناں لوکاں نوں پاکستان دی کرکٹ ٹیم دا بیڑا غرق کرن دی کھلی چھُٹی اے۔

ایہ کجھ سوال نے جہڑے حالے تک سانوں منہ چڑهاندے پئے نیں۔