kraamaat@gmail.com
+ +92 333-430-6384


 موجودا حکومت ناجایز تے دھاندلی دی پیداوار،معیشت کدی اینی نہیں ڈِگی، ملک کسے دی ملکیت وی نہیں اے سگوں ایہ ساریاں دا اے: مولانا فضل الرحمان۔۔۔٭رویل نیوز٭


نمائندا رویل December 29, 2020


ٹانک (نمایندا رویل) پاکستان ڈیمو کریٹک موومنٹ دے آگو مولانا فضل الرحمان نے کہیا اے کہ حکومت ناجایز ہووے تے نا اہل وی ہووے تے اوہنوں رہن دا حق نہیں‘ قوم نُوں کمزور کر کے کہیا جا رہیا اے کہ ملک چل رہیا اے‘ ایہ ملک دیاں جڑاں کھوکھلیاں کرن وانگوں اے۔ ٹانک وچ پارٹی کارکناں نال خطاب کردیاں ہویاں اوہناں نے کہیا کہ موجودا حکومت ناجایز تے دھاندلی دی پیداوار اے‘ اگلے 2 سال وچ ترقی دی شرح ہور تھلے جاوے گی‘ سالانا مجموعی ترقی دا تخمینا صفر توں تھلے چلا گیا اے‘ اج ملک جام ہو چکیا اے‘ ایس صورتحال وچ ملک سبھ توں پہلے اے‘ باقی سیاستدان تے ہور سبھ بعد وچ نیں‘ سٹیٹ بینک کہندا اے کہ پاکستان دی تواریخ وچ معیشت کدی اینی نہیں ڈِگی‘ ملک داخلی طور اُتے اودوں ای مضبوط ہوندا اے جدوں معیشت مضبوط ہووے‘ میرے ملک دا آئین جنا حق دیندا اے اونا استعمال کرنا اے‘ ملک کسے دی ملکیت نہیں ایہ ساریاں دا اے۔ مولانا فضل الرحمان نے کہیا کہ حکومت خوف زدا تے گھبراہٹ دا شکار اے‘ حکومت نے سوالناما گھل کے میری کردار کشی کرن دی کوشش کیتی‘ نیب وچ پیشی ہوئی تے میں کلّا نہیں پوری جماعت پیش ہووے گی۔ اوہناں نے کہیا کہ پچھلے وزیراعظم نواز شریف دے 2 خط آئے نیں‘ جہناں وچ اوہناں نے لکھی اکہ مولانا نے ٹھیک کہیا سی کہ سانوں اسمبلیاں وچ نہیں جانا چاہیدا سی۔ اوہناں نے کہیا کہ ’زور آور بندا غریب دی زمین اُتے ہل چلائے تے وچارا اوہ اوہنوں کجھ نہیں کَہ سکدا‘ ایس لئی قوم نُوں کمزور کر کے ایہ کہنا ملک وچ امن اے تے نظام ٹھیک چل رہیا اے‘ شاید ملک دیاں بنیاداں نُوں کھوکھلا کرن دی گل اے‘۔ اوہناں نے کہیا کہ اسیں سنجیدا آں‘ اسیں کسے دے دشمن نہیں آں پر ملک کسے دی ملکیت وی نہیں اے سگوں ایہ ساریاں دا اے‘ بس فرق اینا ے کہ دنیا وچ جتھے آمر ہووے گا اوہنوں زمین نال دلچسپی ہووے گی جد کہ جتھے جمہوریت ہووے گی اوتھے لوکائی نال دلچسپی ہووے گی۔ ’آمرانا قوت علاقے اُتے قبضے تے اختیارات نُوں اپنے ہتھ وچ لین دا سوچدی اے جد کہ جمہوری ماحول وچ لوکاں دی فلاح تے بہبود مقصود ہوندی اے‘ لوکائی خُش اے تے فیر سیاست‘ پارلیمنٹ تے ملک دا نظام وی ٹھیک چل رہیا اے‘۔ آگو جے یو آئی (ف) دا کہنا سی کہ جدوں حکومت ناجایز تے نا اہل وی ہووے تے فیر اوہنوں حکومت و چ رہن دا حق حاصل نہیں اے‘ صرف حکومت نُوں ای نہیں سگوں جہڑی قوت وی ایہو جہی حکومت نُوں سہارا دیوے گی اوہ وی مجرم ہووے گی‘ اصل وچ وڈی مجرم اوہی ہووے گی‘۔ اوہناں نے کہیا کہ پاکستان مقدس تے اول ملک اے‘ میں‘ تُسیں‘ سیاستدان‘ جرنیل‘ بیورو کریٹس‘ تاجر بعد وچ نیں‘ ملک ہووے گا تے ایہ ساریاں شیواں ہون گیاں۔ اپنے خطاب وچ اوہناں نے کہیا کہ تعریفاں کیتیاں جاندیاں نیں جہڑیاں بُریاں وی نہیں نیں کہ ’فوج نے قربانیاں دِتیاں نیں‘ جواناں نے ملک لئی جاناں شہید کیتیاں نیں‘ اسیں کہندے آں کہ اللہ قبول فرمائے پر تُسیں تے پیٹی ایسے لئی بنھی اے‘ تُسیں رینک ایسے لئی لائے نیں تے تنخاہ وی ایسے شے دی لیندے او‘۔ پر اوہناں نے کہیا کہ اسیں جہڑے رضا کار لوک آں اوہناں نے کِنے علماء‘ کارکناں دیاں شہادتاں دِتیاں نیں جو ایس ملک لئی نیں کہ اسیں آئین‘ قانون تے ملک دے نال کھلوگئے آں۔