kraamaat@gmail.com
+ +92 333-430-6384


پاکستان پیپلز پارٹی دی مرکزی مجلس عاملا نے استعفیاں نُوں نواز شریف دی وطن واپسی نال مشروط کر دِتا۔۔۔٭رویل نیوز٭


نمائندا رویل December 30, 2020


اسلام آباد (نیوز ڈیسک) پاکستان پیپلز پارٹی دی مرکزی مجلس عاملا نے کہیا اے کہ کہدے کسے دے کہن اُتے اسمبلیاں دا سٹِیک نہ چھڈیا جاوے‘ اراکین نے استعفیاں نُوں نواز شریف دی وطن واپسی نال مشروط کر دِتا۔ وسیلیاں دے مطابق چیئرمین پیپلز پارٹی بلاول بھٹو زرداری دی صدارت ہیٹھ ہون والے سنٹرل ایگزیکٹو کمیٹی دے اجلاس وچ اسمبلیاں توں استعفیاں تے سندھ اسمبلی دی تحلیل دا معاملا غور ہیٹھ آیا۔ اراکین نے واضح تے دو ٹوک مؤقف اخیتار کردیاں ہویاں کہیا کہ ساڈی جماعت کسے دی ڈکٹیشن اُتے نہیں چل سکدی۔ جمہوری قوتاں نُوں کسے دے جھانسے وچ نہیں آنا چاہیدا اے۔ وسیلیاں دے مطابق پاکستان پیپلز پارٹی (پی پی پی) نے کسے دیاں گلاں وچ نہ آندیاں ہویاں ضمنی چوناں تے سینیٹ الیکشن لڑن دا فیصلا کر لیا اے۔ پیپلز پارٹی سنٹرل ایگزیکٹو کمیٹی دے رلتیاں دا کہنا سی کہ اسیں نویں پاکستان نیشنل الائنس (پی این اے) نہیں بن سکدے۔ پاکستان پیپلز پارٹی اوہ کلّی جماعت اے جہڑی مزاحمتی سیاست لئی تیار اے۔ اسیں لانگ مارچ لئی تیار آں۔وسیلیاں دے مطابق پیپلز پارٹی دے کئی آگوواں نے اسمبلیاں توں استعفے دی مخالفت کر دِتی۔ ارکان نے رائے دِتی کہ پارلیمنٹ دے فورم نُوں چھڈنا سیاسی طور اُتے بہتر اقدام نہیں ہووے گا۔ میاں نواز شریف نُوں وطن واپس آ کے لانگ مارچ دا حصا بننا چاہیدا اے۔ ایہدے علاوا لیگی قائد دی وطن واپسی اُتے ای استعفیاں اُتے گل ہو سکدی اے۔ مرکز مجلس عاملا دے اراکین نے مولانا فضل الرحمان دی بے نظیر بھٹو دی برسی اُتے غیر موجودگی اُتے دُکھ دا اظہار کردیاں ہویاں کہیا کہ مقامی سیاست دے پچھے مولانا فضل الرحمان نے بے نظیر بھٹو دی برسی چھڈ دِتی تے اوہ چاہندے نیں کہ اوہناں دے کہن اُتے اسمبلیاں چھڈ دیے۔ وسیلیاں دے مطابق اجلاس وچ موجود قانونی ماہرین نے دھڑکُو ظاہر کتیا کہ ویلے توں پہلاں استعفیاں دی صورت وچ حکومت 18 ویں ترمیم ختم کر سکدی اے۔ اوہناں دا کہنا سی کہ استعفے سینیٹ الیکشن دی راہ وچ رکاوٹ پیدا نہیں کر سکدے‘ جے اسیں استعفے دے دِتے تے ایہدے بعد اگے دا لائحے عمل بلکل واضح نہیں اے۔ وسیلیاں دے مطابق ایس موقع اُتے خطاب وچ چیئرمین بلاول بھٹو زرداری دا کہنا سی کہ اپوزیشن اتحاد پی ڈی ایم اسیں بنایا‘ اسیں اتفاق رائے نال ای اگے ودھاں گے۔ لوکائی دے وسیع تر مفاد تے جمہوریت لئی اسیں ہمیشا اپنے ذاتی اختلافات نُوں اِک پاسے رکھیا اے۔ دوجے پاسے مسلم لیگ ن دے قائد نواز شریف تے پی ڈی ایم دے آگو مولانا فضل الرحمان وِچ اِک واری فیر ٹیلی فونک رابطا ہویا اے جہدے وچ موجودا سیاسی صورتحال تے پی ڈی ایم دی اگے دی حکمت عملی اُتے وچار وٹاندرا کیتا گیا۔ وسیلیاں نے دَسیا کہ دوہاں آگوواں دے وچکار سینیٹ الیکشن وچ حصا لین تے لانگ مارچ بارے وی مختلف تجویزاں اُتے غور کیتا گیا جد کہ آصف زرداری دے حالیا بیان اُتے وی گلبات کیتی گئی جد کہ پہلی جنوری نُوں ہون والے لاہور وچ پی ڈی ایم اگوائی اجلاس بارے امور اُتے وی وچار وٹاندرا کیتا گیا۔ دوہاں آگوواں نے اہم فیصلیاں لئی پی ڈی ایم دے پلیٹ فارم نُوں ای مؤثر بنان اُتے اتفاق کیتا اے‘ وسیلیاں نے دَسیا کہ نواز شریف نے اپنی دھی مریم نواز نال وی رابطا کیتا تے سیاسی صورتحال اُتے گلبات کیتی تے مریم نواز نُوں کئی اہم ہدایتاں وی دِتیاں۔