خواجا آصف نُوں آمدنی توں ودھ اثاثے بنان دے الزام وچ گرفتار کر لیا۔۔۔٭رویل نیوز٭

لاہو ر (نیوز ڈیسک) نیب نے مسلم لیگ (ن) دے خواجا آصف نُوں آمدنی توں ودھ اثاثے بنان دے الزام وچ گرفتار کر لیا۔ وسیلیاں دے مطابق قومی احتساب بیورو (نیب) نے مسلم لیگ (ن) دے آگو خواجا آصف نُوں حراست وچ لے لیا اے‘ اوہناں اُتے آمدنی توں ودھ اثاثے بنان دا الزام اے۔ وسیلیاں دا کہنا اے کہ نیب نے ایس الزام دے بعد خواجا آصف توں اثاثیاں بارے تفصیلات پُچھیاں سن پر اوہناں نے تسلی بخش جواب نہیں دِتا جہدے اُتے نیب نے ایہ قدم چُکیا۔ مسلم لیگ (ن) دی ترجمان مریم اورنگزیب نے خواجا آصف دی گرفتاری دی تصدیق کردیاں ہویاں دَسیا کہ اوہناں نُوں احسن اقبال دے گھر توں گرفتار کیتا گیا‘ جتھے اپوزیشن جماعت مسلم لیگ ن دا اجلاس جاری سی‘ جہدے وچ مریم نواز سنے پارٹی دے سینئر آگو موجود سن۔ وسیلیاں دے مطابق خواجا آصف دے وارنٹ گرفتاری چیئرمین قومی احتساب بیورو (نیب) جسٹس (ر) جاوید اقبال دے دستخط نال جاری کیتے گئے۔ نیب وسیلیاں دے مطابق پچھلے وزیر خارجا نُوں آمدن توں ودھ اثاثیاں دے کیس وچ گرفتار کیتا گیا اے۔ اسلام آباد توں گرفتاری دے بعد خواجا آصف نُوں نیب راولپنڈی دے دفتر منتقل کر دِتا گیا‘ جتھے اوہناں دا طبی معاینا کیتا جاوے گا۔ وسیلیاں دے مطابق کل صبح ای اوہناں نُوں احتساب عدالت اسلام آباد وچ راہداری ریمانڈ لئی پیش کر دِتا جاوے گا۔