kraamaat@gmail.com
+ +92 333-430-6384


نیب نے لندن وچ پاکستان دے 4 ارب رُپئے ڈبو دِتے‘ کوئی پُچھن والا ہے؟:احسن اقبال۔۔۔٭رویل خبر٭


نمائندا رویل January 05, 2021


لاہور (نیوز ڈیسک) مسلم لیگ (ن) دے آگو احسن اقبال نے کہیا اے کہ نیب نے لندن وچ پاکستان دے 4 ارب رُپئے ڈبو دِتے‘ کوئی پُچھن والا ہے؟ اینی مالیت دے فلیٹ نہیں نیں‘ جنی رقم خرچ کر دِتی گئی‘ نیب اُتے مقدما کون بنائے گا‘ پاکستان دے زرمبادلا دا نقصان کون پورا کرے گا۔ پیر والے دن لاہور وچ میڈیا نال گلبات کردیاں ہویاں احسن اقبال نے کہیا کہ عمران خان 31 جنوری توں پہلے استعفا دین تے گھر جان‘ تواریخی لانگ مارچ ہووے گا‘ نا اہل حکمراناں نُوں گھلر گھلنا 22 کروڑ لوکائی دی ضرورت اے۔ احسن اقبال نے کہیا کہ حکومت انتقامی ایجنڈے اُتے کم کر رہی اے‘ شہباز شریف نے سارے اثاثے ظاہر کیتے‘ حکومت شہباز شریف اُتے اِک پیسے دی کرپشن ثابت نہیں کر سکی۔ اوہناں نے کہیا کہ مَچھ وچ کان کناں نُوں قتل کیتا گیا‘ وزیر داخلا کَہ رہے نیں دہشتگردی ہون والی اے‘ قوم تیار رہوے‘ حکومت امن و امان قایم کرن وچ ناکام ہو چکی اے‘ تُسیں کہڑے مرض دی دوا او؟ حکومت دا کم اے دہشتگردی روکے‘ شیخ رشید نُوں ملکی سیکیورٹی اُتے توجا دینی چاہیدی اے۔ اوہناں نے کہیا کہ ملکی معیشت نُوں تباہ کر دِتا گیا‘ بجلی دی قیمت وچ وادھے نال لوکاں دیاں چیکاں نکل گئیاں نیں‘ نا اہل حکومت نُوں گھر گھلنا 22 کروڑ لوکائی دی ضرورت اے‘ ایہ حکومت پاکستان وچ لطیفا بن چُکی‘ حکومت جھوٹھے الزامات لا کے ناکامیاں اُتے پردا پا رہی اے۔ نیب وی لندن وچ مقدما ہار چکی اے تے قومی خزانے نُوں 4 ارب رُپئے دا ٹِیکا لگا اے ایس نقصان دے بارے وچ نیب توں کوئی پُچھن والا ہے؟‘ عمران خان لوکائی دا سمندر تہانوں گھر گھلن لئی آ رہیا اے‘ ایہو جہیا تواریخی لانگ مارچ ہووے گا کہ حکمران سارے مارچ بھُل جان گے‘ پی ڈی ایم دی جدوجہد کسے غیر جمہوری قوت دے سہارے نہیں چل رہی سگوں لوکائی دے سہارے چل رہی اے۔