kraamaat@gmail.com
+ +92 333-430-6384


پرگٹ سنگھ ستوج دا ناول "ناچ فروش"(تیجی قسط)۔۔۔۔۔٭رویل ناول٭


پرگٹ سنگھ ستوج/لِپی انتر:اعجاز January 07, 2021


دن، مہینیاں وچوں لنگھدے دو سالاں نوں پچھے چھڈ آئے سن۔ اگلے ورھے دا سیال اُتر گیا۔ گرمی آئی۔ فیر گرمی دی رُتّ وی اپنا تاءوِکھا کے پرتن لگی۔ لوکاں نوں مڑکے، مچھر اَتے چپ چپیپن توں سکھ دا ساہ آون لگیا۔ جھونا نسرن لگیا سی۔ لوکاں نوں ویلھ سی۔ ویاہاں دا سیزن شروع ہو گیا سی۔ اج سندیپ اَتے اوہدی ماں نے وی کسے رشتے داری وچ ویاہ جانا سی۔ کرنیل نے سوچیا سی کہ دوویں ماواں دِھیاں ایکٹواتے جا کے پیلس وچوں ہی واپس پرت آواں گیاں پر سندیپ نے جواب دے دتا سی۔ اوہنے ویاہ نالوں اپنی ڈانس دی کلاس نوں ودھ اہمیت دتی سی۔

اوہ سویرے ہی تیار ہو کے بس اڈے اُتے آ کھڑی سی۔ ٹائیٹ زین، ٹاپ اُتے کُھلّھے سلکی والاں چ اوہ پینڈو نہیں بلکہ پچھم دے رنگ وچ رنگے گئے کسے وڈے شہر دی وسنیک لگدی سی۔ دُدّھ ورگا چٹا رنگ، گلابی بُلھیاںتے ہلکی لِپ سٹک، تھریڈنگ نال پتلیاں کیتیاں کالیاں سیلیاں۔ تے جے کدے اُپر دی کالی عینک لا لیندی تاں سچ مچ ہی کوئی فلمی ہیروئن جاپدی۔

اڈے تے کھڑے بہتے منڈیاں دی نگاہ اوسے وَل ہی سی۔ پر اوہ تاں سبھ نوں ٹچ جاندی سی۔ ہُن تاں اوہدی اوہ گل سی اکھے ’سر تے نہیں کنڈا، ہاتھی پھرے لنڈا‘ ہُن اوس نوں کسے دا ڈر ڈُکر رہیا نہیں سی تے اج کل اوہ اپنی مرضی نال چم دیاں چلا رہی سی۔

سندیپ نے ماں نوں کَہ کے ایکٹوا لے لئی سی۔ ایکٹوا دا کرنیل نوں وی بہت سکھ ہو گیا سی۔ جتھے وی جانا ہوندا، دوویں ماواںدِھیاں چڑھ کے چلیاں جاندیاں۔ سندیپ اکلی وی ایکٹوا لے کے چلی جاندی۔ فلماں دا بھوت سوار اوس اُپر ایس حد تک ہو گیا سی کہ ہُن اوہ کرنیل نال ضدکر کے سنگرور ڈانس سکھن لگ پئی سی۔ جدوں دی اوہ ڈانس سکھن لگی سی، سندیپ توں سینڈی بن گئی سی۔ اج وی سینڈی ڈانس دی کلاس لگاون لئی جا رہی سی۔

سنام والی بس آئی تاں اوہ شیشے والی سیٹ مل کے بیٹھ گئی۔ اوہنے پرس وچوں موبائل کڈھیا۔ ڈیٹا آن کیتا۔ وٹس ایپ اُپر ہیری دے میسج آئے پئے سن۔

ہیلو ڈیئر۔

کتھے آ گئے؟

میں تیری سنام ویٹ کروں گا۔

سنگرور کٹھے چلاں گے۔

سینڈی نے میسج ریپلائی کیتا:’اوکے جانو! میں پنڈوں چل پئی ہاں۔

جدوں بس سنام توں سنگرور نوں چلی تاں سینڈی اَتے ہیری دوویں اک سیٹ تے نال نال جُڑے بیٹھے سن۔ سینڈی، سرب اَتے بوٹے ورگے کئیاں دے اُپروں لنگھدی ہوئی ہیری تک سفر کر آئی سی۔ اج کل اوہدی سنام دے ہیری نال سُر ملی ہوئی سی۔ ہیری سنگرور رنبیر کالج چ بی۔ اے فسٹ دا ودیارتھی سی۔ بس وچ آوندیاںجاندیاں کئی وار سینڈی نال میل ہویا سی۔ ایہ میل ہی ہُن پیار وچ بدل گیا سی۔

ہیری دا اک دوست آرکیسٹرا دا گروپ چلاندا سی۔ اوہنے کسے وی کُڑی نال ایگریمنٹ کر کے پکے طورتے تاں رکھیا نہیں ہویا سی۔ اوہ کُھلّھا کم کرن والیاں کُڑیاں نوں لے کے جاندا؛یاں کسے ہور گروپ توں کُڑیاں لے جاندا۔ جہناں دا کم ودھیا چل نکلیا سی، اوہناں نے کرائے اُتے کوٹھیاں لے کے اوتھے پکے طورتے ہی کُڑیاں رکھ لئیاں سن۔ پورے سال لئی رہن سہن اَتے کھان پین گروپ دے سنچالک دا ہوندا سی۔ کُڑیاں نال پورے سال دا اُکاپُکا ٹھیکا کریا ہوندا۔ اک کُڑی لکھ توں لے کے پنج لکھ تک وی پہلاں پھڑ لیندی اَتے فیر کیتے ایگریمنٹ انوسار کُڑی سال لئی پکے طورتے اوس گروپ نال بنّھی جاندی۔ گروپ دا سنچالک کُڑی توں پنجاہ ہزار، لکھ تک دی کمائی کر لیندا۔ کئی وار جیکر اوہدے اپنے کول کسے فنکشن دی سائی نہ ہوندی تاں اوہ کُڑی نوں کسے کُھلّھا کم کرن والے نال ٹور دیندا؛یاں کوئی ہور گروپ والا لے جاندا۔ اوہ سنچالک دی اپنی مرضی ہوندی کہ کِنّے روپئیاں چ بھیجنی ہے۔ ایگریمنٹ والی کُڑی نوں جدھر وی اوہ کہندا، جانا پیندا۔

ایس کم وچ نویاں آئیاں کُڑیاں توں ودھ آمدن ہوندی۔ چار چنگیاں کُڑیاں وچ اک سکھاندرو چل جاندی سی۔ روپئے اوہ چار کُڑیاں دے حساب نال لیندے۔ جیکر نویں کُڑی چنگی سوہنی سنکھی اَتے پہلاں ڈانس سِکھی ہوندی فیر تاں اوہ اوس لئی سونے دے انڈے دین والی مرغی ثابت ہوندی۔ کئی گروپاں والے اجہی مار مارن لئی موقعے لبھدے رہندے۔

ہیری دے دوست نے وی سینڈی دی فوٹو ویکھی سی۔ اجہی سوہنی سنکھی کُڑی اُتوں لوک رُگ بھر بھر پیسے لٹاوندے سن۔ سینڈی دا ڈانس سِکھنا تاں ہور وی سونے تے سہاگے والی گل سی۔ اوس نے ہیری نوں من دی گل سدھی تاں نہیں دَسی پر ایہ لالچ دے دتا کہ جے توں اوس نوں ایس لاین وچ آون لئی منا لویں تاں اوس نوں لیٹ ہون دے بہانے رات رکھنا سوکھا ہے۔ آپاں دوویں رَل کے اک مکان کرائے تے لے لواں گے۔ ساری رات موجاں لُٹیاکریں۔

ہیری دے وی ایہ گل من لگ گئی سی۔ اج اوہ سینڈی نال ایہ گل کرن لئی پکا من بنا کے آیا سی۔ پہلاں اوہ ایدھراودھر دیاں گلاں کردا رہیا تے فر ہولی ہولی مین مدعا چھوہ لیا۔

سینڈی تینوں اک گل کہاں؟

ہاں کَہ۔“ سینڈی نے موٹیاں اکھاں ہیری دے چہرے تے گڈدتیاں۔

توں ڈانس سِکھی جانی ایں، ایہتوں کوئی کم وی تاں لے۔

کم کِویں؟

توں ڈانس کر کے کمائی وی کریا کر۔

ایں کمائی کِویں ہوو؟

آرکیسٹرا گروپ نال چلی جایا کر۔

کیوں، میں کیوں جاواں؟“ اوہنے حیرانی نال ہیری وَل ویکھیا کہ ایہ گل اوہنے کِویں کَہ دتی۔ فراوہ اَگے بولی:

میرا ڈِریم تاں ماڈلنگ تے فلماں نیں۔

اوہ وی فیر ای پورا ہوو

کِویں؟

دیکھ! توں جہڑا ڈانس سِکھدی ایں، اوہدی ودھ پریکٹس تاں فیر ای ہو جے توں ڈانس کریںگی۔ جہڑے گائیک گاو¿ندے نیں، اوہ کہڑا سِکھن توں بعد سدھا سٹار بن جاندے نیں۔ اوہ وی تاں پہلاں عام سٹیجاں اُپر ای گاوندے نیں۔ جدوں ہولی ہولی پہچان بندی اے فیر اَگے ودھدے نیں۔ جے توں ڈانس کریںگی، اک تاں تینوں ڈانس فیس وغیرا گھروں نی منگنی پو۔ تیری اپنی کمائی وادھو ہون لگ پو۔ نالے تیری لوکاں چ پہچان بنو۔ وچ وڈے وڈے پروگراماں دیاں سائیاں وی ملدیاں نیں جتھے وڈے وڈے کلاکار وی آو¿ندے نیں۔ ڈائریکٹر وغیراوی آوندے نیں۔ جے تیرا کم ودھیا ہوو، کسے ڈائریکٹروغیرا دی نگاہ وی چڑھ سکدی ایں۔ میرا اک دوست آرکیسٹرا گروپ چلاو¿ندااے۔ نالے آپاں اوتھے اکٹھے رہ پیا کراںگے۔ جے توں کہیں تاں میں اوہدے نال گل کر لواں۔“ ہیری نے پورا جال وِچھا دتا سی۔

میں سوچ کے دَسوں۔“ سینڈی دے وی گل من لگ گئی سی پر اجے اک جھاکا جہیا سی۔

چل سوچ کے دَس دیں۔“ ہیری نے وی اوہدی ہاں وچ ہاں ملا دتی۔

بس سنگرور پہنچ گئی۔ ہیری رنبیر کالج جان لئی سنامی گیٹ اُتر گیا۔ سینڈی نے اَگے بس سٹینڈ جانا سی۔ ہیری دیاں کہیاں گلاں اوس دے چیتیاں چ گھمیریاں کھان لگ پئیاں۔ جدوں بس، بس سٹینڈ وچ رُکی تاں اوہ ایہ گلاں سوچدی ہی بس وچوں اُتر کے نابھا گیٹ وَل چل پئی۔

....

تیسرے دن اوہ فیر بس وچ مل پئے۔ اُنج تاں ہیری نے فون تے وی سینڈی دی رائے پُچھی سی پر اوہ نہ تاں ’ہاں‘ کر سکی اَتے نہ ہی ’نہ‘۔ اوہ دُبدھا وچ ہی پھسی رہی۔ بس وچ بیٹھدیاں ہیری نے فیر گل چھیڑ لئی۔

کیہ رائے بنی فیر؟

مینوں تاں کچھ سمجھ چ نی لگدا پئی کیہ کراں؟“ سینڈی شیشے راہیں باہر کھیتاں وَل ویکھن لگی۔ دُور دُور تک کھڑی جھونے دی فصل نے پیلک پھڑ لئی سی۔

توں ایس طرحاں کر! اک دن جا کے دیکھ لے۔“ ہیری نے اوہدے گورے ہتھاں وَل ویکھیا جہڑے اوہ کُجھ سوچدی ہلا رہی سی۔

ممی نوں کیہ کہوں گی؟


ممی نوں کَہ دویں کہ ساڈا ڈانس کمپیٹیشن اے۔ اوہ کہڑا نال آ کے دیکھو۔’“ہیری نوں وشواس ہو گیا سی کہ اوہ ’ہاں‘ وَل ودھ رہی ہے۔

چل ٹرائی کردے آں فیر۔ دیکھی جاو¿۔“ اوہنے باقی فکراں نوں ’چل پرانہ‘کہندیاں فیصلالے لیا۔

دوست نوں کَہ دیاں فیر؟“ ہیری دے من اندر وی لڈو پھُٹن لگے۔ اوہ سینڈی نال اکلیاں رہن دی کلپنا کردیاںسُرور وچ آ گیا۔

کَہ دئیں۔“ سینڈی، ہیری دے کھڑے چہرے وَل ویکھ کے مسکرا پئی۔ ”توں وی نال چلیں فر۔“ سینڈی نے ہیری نوں تاکید کیتی۔

ہاں ہاں، پکا جاو¿ں گا!“ ہیری دا دِل خُشی وچ بھنگڑے پا رہیا سی۔ اوہنے سینڈی دے کَنّ کول مونہ کر کے دبویں آواز وچ کہیا:”میری جان نوں تاں کلی نوں میں اوویں نی چھڈدا۔ نالے فیر....“ پچھلا ادھا واک بولیا تے ادھا اکھ دَبّ کے سمجھا دتا۔

اے.... گندا.... چل پرانہ ہو۔“ سینڈی اوہدے پولی جہی کوہنی ماردی مٹھا مٹھا مسکرا پئی۔

سچ میری چیز؟“ سینڈی دے اچانک یاد آ گیا۔

ہاں لے کے آیاں۔“ ہیری نے آساپاسا ویکھیا۔ وڈیاں سیٹاں وَل تھوڑی جہی پٹھ بھواں لئی۔ اپنی کٹ وچوں بیئر دی بوتل کڈھ کے سینڈی دے بیگ وچ پا دتی۔

تھینک....کی....یو....“سینڈی نے بدلے وچ پھُلاں ورگا ہاسا سٹیا۔ اوہدا جدوں وی جی کردا اوہ ہیری توں’ بیئر‘یاں شراب منگوا لیندی سی۔

اوہ دوویں گلاں کردے سنام تک پہنچ گئے سن۔ سنام اُتر کے ہیری نے اپنے گھر دا راہ پھڑ لیا اَتے سینڈی پنڈ نوں جان والی بس وچ بیٹھ گئی۔

گھر آ کے سینڈی نے بیگ الماری وچ رکھ دتا۔ کپڑے لاہ کے لوئر اُتے ٹی - شرٹ پہن لئی۔ اوہدی ماں برانڈے وچ بیٹھی کدو چیر رہی سی۔ اوہ ماں کول منجے تے آ بیٹھی۔

مما، میں ڈانس کمپیٹیشن تے جانا اک دن۔

کتھے؟“ کرنیل دے کدو چیردے ہتھ رُک گئے۔

ڈیٹ تے تھاں تاں اجے دَسن گے۔

شام نوں آجاں گی؟

ایہ تاں اجے Sure نہیں کِنّا ٹایم لگنا۔

کرنیل اَگے کُجھ نہیں بولی۔ اوہ مڑ کدو چیرن لگ پئی۔ سینڈی نے فیس بُک کھولھ لئی اَتے سٹیٹس پڑھن لگ پئی۔ کُجھ دیر اوہ سٹیٹس پڑھدی رہی اَتے فیر اج ڈانس کردیاں سیکسی لُک چ کھچی فوٹو اپلوڈ کر دتی۔ نال سٹیٹس لکھ دِتا، ’فیلنگ اِن ڈانس۔‘ انباکس وچ بہت سارے میسج آئے پئے سن۔ اوہنے اک دو جان پہچان والیاں دے میسج پڑھے، باقی اِگنور کر دتے۔ دس وِیہ منٹ اوہ واٹس ایپ نوں چنبڑی رہی۔ مڑ فیس بُک کھولھی تاں اوہدی پائی فوٹوتے بہت سارے سٹیٹس آئے پئے سن۔

اَتّ اے۔

ویری نائیس۔

بیوٹی فُل لُک۔

بڑے جچ رہے او۔

سیکسی لُک۔

اوہنے سارے کومنٹ لائیک کیتے تے فیر ڈیٹا آف کر دتا۔

....

کرنیل نے اج شام دے کم ہور دِناں نالوں جلدی نپٹا دتے سن۔ ہُن اوہنے نہا کے ودھیا سوٹ پایا اَتے ہلکا ہلکا میک اپ کر لیا۔ سینڈی نے ماں دی چال ڈھال توں اندازا لا لیا سی کہ اج سُکھے انکل نے آونا ہووے گا۔ کرنیل، سینڈی نوں وی وار وار کَہ چُکی سی کہ اوہ روٹی کھا کے اپنا کم نبیڑ دیوے پر سینڈی نے کَہ دتا کہ اوہنوں جدوں بھُکھ لگی، اوہ آپے ہی تتی کر کے کھا لوے گی۔

رات دے نو(9)کُو وَجے سچ مچ ہی سُکھا ڈرائیور آ گیا۔ اوہ پنڈ تاں شام نوں ہی آ جاندا سی۔ پہلاں کسے متر دے گھر رُکیا رہندا، جدوں چنگا انھیرا ہو جاندا تاں چپکے جہے کرنیل دے گھر آ وڑدا۔

ہور پُت ٹھیک ایں؟“ فیس بُک وچ کھبھی سینڈی نے پچھے مڑ کے ویکھیا، سُکھا انکل مسکرا رہیا سی۔

ہاں جی، انکل جی۔“ سینڈی موبائل چھڈ کے کھڑی ہو گئی۔ سُکھے نے اوس دا سر پلوس دتا۔

ہور، ڈانس دیاں کلاساں ودھیا چل رہیاں نیں ؟

ہاں جی انکل جی۔

تیری روٹی رسوئی چ رکھی پئی اے۔“ کرنیل وی سُکھے دے برابر آ کھڑی سی۔

چنگا مَما۔ میں آپ ای لے لوں۔

سُکھے تے کرنیل نے کمرے وچ جا کے اندروں بار بند کر لیا۔ سینڈی نے الماری کھولھی۔ پرس وچوں بیئر دی بوتل کڈھی اَتے چسکیاں لے کے پین لگ پئی۔ نال نال اوہ کسے دی فوٹو لائیک کردی، کمنٹ لکھدی اَتے اَگوں پھرولاپھرالی کرن لگ پیندی۔ بیئر ختم ہوئی تاں اوس نے خالی بوتل لکڑاں وچ سٹ دتی۔ اوہ رسوئی وچ جا کے روٹی کھا آئی۔ بسترا وِچھا کے کنّاں وچ ہیڈ فون تُن لئے اَتے اج ہیری توں لئی فلم 'راگنی ایم. ایم. ایس' ویکھن لگ پئی۔

جدوں اوہ فلم ویکھ کے اُٹھی تاں سارا پنڈ نیند وچ گاچیا سی۔ ممی دے کمرے وچ لائیٹ اجے وی جگ رہی سی۔ دھیان لایاں مدھم جہی گھسربھسر وی سنائی دیندی سی۔ اوہ پیشاب کر کے مڑ اپنے بسترے وچ آ پئی۔ ہیری دی کہی گل اوہنوں فر یاد آئی تاں اوس نوں آرکیسٹرا گروپ نال جان دا عجیب جہیا احساس ہون لگیا۔

....

چار کُو دِناں بعد ہیری دا فون آ گیا کہ اتوار نوں ملیرکوٹلے پروگرام تے جانا ہے۔ سویرے جلدی رام بستی والے پُل کول آ جاویں۔ اتوار نوں اوہ بیگ اَتے میک اَپّ کِٹ لے کے ایکٹوا تے چل پئی۔ رام بستی والے پُل کول پہنچی تاں اَگے ہیری اَتے اوہدا دوست سومو لئی کھڑے سن۔ دو کُڑیاں پہلاں گڈی وچ بیٹھیاں سن اَتے اک کُڑی نے اجے آو¿نا سی۔ ہیری دا دوست، ایکٹوا نیڑے ہی کسے جان پہچان والے دے گھر کھڑا کرکے واپس آ گیا۔ اوہدے واپس پرتدیاں تیسری کُڑی وی پہنچ گئی سی۔ اوہ سارا گروپ ملیرکوٹلے وَل چل پیا۔

ملیرکوٹلے توں نابھا روڈتے پیندے گرین ویو وچ پروگرام سی۔ پہلاں ساریاں نے کیبن وچ ہی چاہ پانی منگوا کے پیتا۔ فیرباقی سارے سٹیج اُپر چلے گئے۔ کُڑیاں اَتے ہیری کیبن وچ ہی رہ گئے۔

بھرا جی تسیں ذرا کُو پوڑیاں وچ ہو جاو۔ اسیں کپڑے بدل لئیے۔“اک کُڑی نے ہیری نوں بینتی کیتی۔ ہیری کیبن وچوں سٹیج اُتے چڑھدیاں پوڑیاں وچ بیٹھ گیا۔ جدوں کُڑیاں نے کپڑے بدل لئے، اوہ فیر ہیٹھاں چلا گیا۔

پروگرام شروع ہو چکیا سی۔ ہیری دا دوست کیبن وچ آیا۔

سینڈی اگلے گیت چ توں سٹیج تے جائیں۔ کُجھ نہیں کرنا، بس پکھی پھڑ کے کھڑ جائیں۔“ اوہ چاہندا سی سینڈی دی اک وار جھجک کُھلّھ جاوے۔

ہیری! مینوں تاں پہلاں اک پیگ دے۔“ سینڈی نے ہیری کول آ کے سفارش کر دتی۔ ہیری نے اَگوں اپنے دوست نوں کَہ کے کیبن وچ بوتل منگوا لئی۔ سینڈی نے پیگّ پا کے اندر سٹ لیا۔ اوہنے دھڑدھڑی لیندیاں پنیر والا پکوڑا مونہ وچ پا لیا۔

سٹیج تے گانا چل رہیاسی،”توں میری کھنڈ مشری.... لگیں جان توں پیاری۔“جدوں گیت ختم ہویا تاں اک کُڑی پوڑیاں اُتر آئی:”بھین چو.... نے میرے واری جماں پھدو گانا لایا۔“اوہ ساونڈ والے تے بھڑاس کڈھ رہی سی۔

چلو تسیں تِنّے۔“ سینڈی سمیت باقی دوہاں کُڑیاں نوں اشارا ہو گیا۔ تِنوں سٹیج تے جا چڑھیاں۔ سینڈی دی سٹیج تے جان والی جھجک پہلے گانے وچ ہی کُھلّھ گئی۔ اگلے گانے تک اوہنوں پیگ دا وی چنگا سرور ہو گیا۔ ڈانس سِکھن کرکے سینڈی دی چنگی لچک بنی ہوئی سی اَتے اُپروں اوہدا حُسن تے نخرا بیماراں نوں وی پٹھیاں چھالاں مرواون تک جاندا سی۔ اوہ سٹیج تے پانی چ تردی مرغابی وانگ تر رہی سی۔ ہُن اوہنوں وی نچدیاں مزا آون لگیا سی۔

ایہ پروگرام پورا ہِٹ رہیا۔ سینڈی دا وی اوس نوں کامیاب کرن وچ بڑا یوگدان سی۔ پروگرام توں بعد سینڈی نوں بارھاں سو روپئے دے دتے۔ سینڈی اپنے ڈانس دی پہلی کمائی ہتھاں وچ لے کے پھُلی نہیں سما رہی سی۔ پروگرام توں بعد باقی سارا گروپ واپس آ گیا پر سینڈی تے ہیری اوتھے ہی ہوٹل وچ کمرا لے کے رہ پئے۔

کِویں لگیا فیر پروگرام؟“ ہوٹل دے کمرے وچ بیٹھدیاں ہیری نے سینڈی دی کمر دوآلے بانہ دا سپ وانگ ولیواں پا لیا۔

بہت مزا آیا!“ سینڈی دا اندر نچ رہیا سی۔

ہُن چلیا کریں گی؟

ہاں پکا۔“ سینڈی نے ہیری نوں چُم لیا فر اوہ شرارت بھریا مسکراندی اَگے بولی:”تیری منوکامنا وی پوری ہو گئی۔

ہیری نے بدلے وچ اوہنوں ہور گُھٹ لیا:”جے تینوں اک سوال پاواں؟ کہن نوں جی تاں کردا نہیں....” اوہنے سینڈی دا پرتکرم جانن لئی گل ادھ وچکار چھڈ دتی۔

ہاں دَس یار۔

سینڈی! مینوں پنج چار ہزار دی لوڑ سی۔ میں تیرے واپس کردوں۔

گل سُن! جے آہ واپس کرن والی گل فیر کدے مُوہوں کڈھی اے تاں میرا تیرا کوئی رشتا نہیں۔“ سینڈی نے اوس وَل اکھاں کڈھیاں۔

چنگا سوری جناب۔“ ہیری نے دوویں کنّ پھڑ لئے۔

آہ لے۔“ سینڈی نے پنج سو روپئے پرس وچ رکھ کے ساڈھے چار ہزار ہیری دی ہتھیلی تے دھر دتا۔

ہیری نے روپئے جیب وچ پا کے سینڈی نوں جپھی وچ گُھٹ لیا۔ دوواں دی دھڑکن تیز ہو گئی۔ ساہ اک دوجے وچ رلگڈ ہو گئے۔

(جاری اے)