بی بی پاکدامن دے سالانا عرس دیاں تقریبات شروع،اج قدیمی جھنڈے دا جلوس وی کڈھیا جاوے گا۔۔۔٭رویل خبر٭

لاہور (نیوز ڈیسک) صوبائی راجدھانی لاہور وچ واقع مزار بی بی پاکدن دے سالانا عرس دیاں 3 دنا تقریباں شروع ہو گئیاں نیں۔ بدھ والے دن ظہر دی نماز دے بعد تقریبات دا اغاز بی بی پاکدامن دے مزار نُوں غسل دے کے چادر پوشی نال کیتا گیا۔ افتتاحی تقریب وچ صوبائی وزیر اوقاف سید سعیدالحسن سنے سیکرٹری اوقاف تے ہور افسراں نے رلت کیتی۔ ایس موقع اُتے سیکیورٹی دے سخت انتظامات وی کیتے گئے نیں۔ 3 دنا تقریباں وچ محفل نعت تے محفل سماع سنے اج جمعرات نُوں قدیمی جھنڈے دا جلوس وی کڈھیا جاوے گا جد کہ بی بی پاکدامن دے سالانا عرس دیاں 3 دنا تقریبات جمعے دی رات عشاء دی نماز دے بعد خصوصی دُعا دے نال مُک جان گیاں۔