آوے دا آوا وِگڑیا ہویا،ایل ڈی اے دیاں نالایقیاں کارن زرعی زمیناں اُتے سوسائٹیاں وچ لکھاں گھر بن چُکے نیں:چیف جسٹس لاہور ہائیکورٹ……٭رویل خبر٭

لاہور (نیوز ڈیسک) لاہور ہائیکورٹ نے گرین لینڈ ایریاز وچ ہاؤسنگ سوسائٹیاں دی اُساری خلاف دایر درخاست اُتے پنجاب سرکار تے ایل ڈی اے توں تفصیلی رپورٹ منگدیاں ہویاں سنوائی 28 جنوری تک ملتوی کر دِتی جد کہ چیف جسٹس لاہور ہائیکورٹ جسٹس محمد قاسم خان نے ریمارکس دِتے نیں کہ ساڈے ملک وچ آوے دا آوا وِگڑیا ہویا اے‘ ترویں نظر وچ ایل ڈی اے دیاں نالایقیاں دی وجھا توں ایہناں سوسائٹیاں وچ لکھاں گھر بن چُکے نیں۔ چیف جسٹس لاہور ہائیکورٹ جسٹس محمد قاسم خان نے شہری مبشر الماس دی درخاست اُتے سنوائی کیتی۔ چیف جسٹ سنے حکم دِتا کہ تفصیلی رپورٹ پیش کرو کہ کہنے کیہ کیتا اے‘ ایل ڈی اے دا بجٹ ارباں رُپئے اے پر ایہدی کمکاری صفر اے‘ سبھ ذمے دار افسراں تے ڈی جی نیب نُوں بلاواں گا تے ایتھوں سدھے جیل جان گے۔ چیف جسٹس نے کہیا کہ سبھ ذمے دار نیں‘ سارے شہر دا حسن تباہ کر دِتا گیا‘ وڈے تے پرانے رُکھ اُکھاڑ دِتے گئے۔ چیف جسٹس نے کہیا کہ مینوں ہُن تک رہن والے سارے ڈی جی ایل ڈی ایز تے متعلقا افسراں دے ناواں دی فہرست چاہیدی اے۔ چیف جسٹس قاسم خان دی عدالت نے ایل ڈی اے ولوں غیر قانونی ہاؤسنگ سوسائٹیاں دے خلاف کیتیاں جان والیاں کارروائیاں دی رپورٹ وی منگ لئی۔ فاضل عدالت نے عدالتاں توں حکم امتناعی لین والیاں سوسائٹیاں دے ناں وی منگ لئے۔ چیف جسٹس محمد قاسم خان نے کہیا کہ ساڈے ملک وچ آوے دا آوا وِگڑیا اے۔ سنوائی دوران ایل ڈی اے دے وکیل نے گرین لینڈ ایریا ز اُتے قایم غیر قانونی ہاؤسنگ سوسائٹیاں دی فہرست فراہم کردیاں ہویاں دسیاکہ ایہو جہیاں ساریاں ہاؤسنگ سوسائٹیاں نُوں نوٹس جاری کر دِتے نیں‘ ایہناں سوسائٹیاں نُوں بجلی‘ پانی تے گیس دے کنکشن دین توں روک دِتا گیا اے‘ ایہناں سوسائٹیاں دی اراضی دی ویچ وٹک اُتے پابندی لا دِتی اے۔ ایل ڈی اے دے وکیل نے دَسیا کہ غیر قانونی سوسائٹیاں توں 1 ارب دے واٹر چارجز وصول کیتے گئے نیں‘ حکومت دی ایماء اُتے ایہو جہیاں سوسائٹیاں لئی ایمنسٹی سکیم متعارف کروا دِتی گئی اے۔ چیف جسٹس نے پچھیا کیہ سیاسی لوکاں دیاں وی ہاؤسنگ سوسائٹیاں نیں۔ ایل ڈی اے دے وکیل نے دَسیاکہ پاک عرب ولاز وی اِک سیاستدان دی اے‘ سینئر صوبائی وزیر دی وی ہاؤسنگ سوسائٹی اے‘ ایہ ہاؤسنگ سوسائٹی ساڈھے 3 ہزار کنال اُتے اے۔ عدالت نے گرین لینڈ ایریاز اُتے قایم غیر قانونی ہاؤسنگ سوسائٹیاں دے باریتفصیلی رپورٹ فراہم کرن دی مہلت دے رکھی اے‘ قانون دے تحت گرین بلٹ اُتے ہاؤسنگ سوسائٹیاں نہیں بن سکدیاں۔ سرکاری وکیل نے دَسیا کہ لاہور ڈویژن وچ 241 ہاؤسنگ سوسائٹیاں گرین لینڈ ایریاز دی خلاف ورزی کر رہیاں نیں۔ فاضل عدالت نے کہیا کہ جدوں عدالت نے ایہناں سوسائٹیاں دے خلاف حکم امتناعی دے رکھیا ہووے تے ایہ فیر کویں کم کر سکدیاں نیں۔ ایل ڈی اے دے وکیل نے کہیا کہ کئی سوسائٹیاں ایل ڈی اے قانون دی پاسداری دے تحت کم کر رہیاں نیں۔ درخاست گزار دے وکیل نے مؤقف اپنایا کہ فاضل عدالت ایل ڈی اے توں وضاحت منگے کہ ایہناں دے افسر کِنّے کِنّے ورھیاںتوں سیٹاں اُتے براجمان نیں‘ زیادا تر افسران ایل ڈی اے وچ ڈیپوٹیشن اُتے لمے عرصے توں تعینات نیں‘ ڈیپوٹیشن اُتے تعینات افسراں دے دور وچ غیر قانونی ہاؤسنگ سوسائٹیاں بنائیاں گئیاں نیں۔