kraamaat@gmail.com
+ +92 333-430-6384


مسلسل کرپشن دی پُڑی ویچن وچ لگی حکو مت نے بغض وچ پاکستان داء اُتے لا دِتا: سعد رفیق ……٭رویل خبر٭


نمائندا رویل February 01, 2021


لاہور (نیوز ڈیسک) پاکستان مسلم لیگ (ن) دے آگو خواجا سعد رفیق نے سیالکوٹ وچ پارٹی آگو دی ہاؤسنگ سکیم نُوں ڈِگان اُتے رد عمل دیندیاں ہویاں کہیا اے کہ حکومت نے نواز شریف تے مسلم لیگ (ن) دے بغض وچ ملک نُوں داء اُتے لا دِتا اے۔ لاہور وچ پچھلے سیپکر قومی اسمبلی ایاز صادق تے پاکستان مسلم لیگ (ن) دے ہور آگوواں نال پریس کانفرنس کردیاں ہویاں خواجا سعد رفیق نے کہیا کہ سیالکوٹ ڈسکا وچ قومی اسمبلی تے وزیر آباد وچ صوبائی اسمبلی دے اِک‘ اِک حلقے وچ ضمنی چوناں ہون جا رہیاں نیں‘ افتخار الحسن شاہ دے پُتر عطاء شاہ نُوں گرفتار کر کے مختلف تھانیاں وچ گھُمایا گیا تے اوہناں اُتے ہیروئن پا ن دی کوشش کیتی گئی‘ کئی پولیس افراں نے ایس مکروہ عمل دا حصا بنن توں انکار کیتا پر گوجرانوالا توں گھلیا گیا ڈی ایس پی ایس سارے کھیڈ دا مرکزی کردار سی‘ حکومت مسلسل کرپشن دی پُڑی ویچن دی کوشش کر رہی اے‘ اوہ پُڑی جہدا چورن ہُن کوئی نہیں خریددا کیوں جے ایہ حکومت وچ پوری طرحاں ناکام ہو چکے نیں‘ پچھلے میئر سیالکوٹ اُتے حملا کیتا گیا‘ اوہناں دی ہاؤسنگ سکیم دے دفتراں نُوں ڈیگ کے کروڑاں دا نقصان کیتا گیا تے جرم ایہ سی کہ اوہناں نے اپنی وفاداری تبدیل نہیں کیتی تے اپنے پَیراں اُتے کھلوتے نیں‘ ایہ سِکا شاہی پور ے پنجاب وچ جاری اے۔