اَزادی کشمیرتے تکمیل پاکستان۔۔۔۔٭رویل کالم٭

پورے کرہ ارض اُتے ریاست دی سرپرستی وچ جے کدھرے دہشتگردی ہو رہی اے تے اوہ مقبوضا جموں تے کشمیر اے جتھے اِک جارحانا تے قابض ملک دی 9 لکھ فوج صرف انساناں نُوں ای تَہ و تیغ نہیں کر رہی سگوں اوہدے ہتھوں انساناں دے گھر‘ پیلی بنھا‘ باغ تے باغیچے تے شجر و حجر وی محفوظ نہیں نیں۔ اکتوبر 1947 وچ بھارت نے کشمیر اُتے حملا کر کے تے ایہدے اُتے اپنا غیر قانونی قبضا جما کے کشمیریاں دی پاکستان دا حصا بنن دی فطری خاہش دا قتل کیتا۔ اوس ویلے توں لے کے ہُن تک بھارت دے لکھاں فوجی کسمیری لوکائی ولوں ایہ مطالبا دُہران دی سزا دے طور اُتے اوہناں دا قتلام کر رہے نیں‘ کشمیری اپنی ازادی دے نال نال پاکستان دی تکمیل تے سلامتی دی جنگ لڑ رہے نیں‘ کشمیر پاکستان دی شَہ رگ اے‘ کشمیر دے بغیر پاکستان مکمل نہیں ہوندا‘ حریک ازادی کشمیر اصل وچ تحریک پاکستان ای دا تسلسل اے۔

5 اگست 2019 نُوں بھارتی حکومت نے اپنی 9 لکھ فوج دی مدد نال ناصرف مقبوضا جموں و کشمیر اُتے دُبارا حملا کیتا سگوں ریاست دی لوکائی نُوں محصور کر کے متنازع علاقے نُوں بھارتی یونین دا حصا مِتھ دِا تے ایس سارے عمل وچ ریست جموں و کشمیر دی لوکائی دی رائے نُوں کوئی اہمیت نہیں دِتی‘ 18 مہینیاں توں نریندر مودی نے سوا کروڑ کشمیریاں نُوں اپنا جایز حق منگن دی پاداش وچ کھلی جیل وچ قید کر رکھیا اے جو عالمی انسانی ضمیر لئی چیلنج اے‘ نریندر مودی نے سارے استعمال ہتھکنڈے استعمال کر کے ویکھ لئے نیں‘ بھارت مقبوضا علاقے اُتے اپنے غیر قانونی تسلط نُوں برقرار رکھن لئی نہتے کشمیریاں نُوں بے انتہا مظالم دا نشانا بنا رہیا اے‘ کشمیری نوجواناں نُوں جعلی مقابلیاں وچ شہید کرن تے اوہناں نُوں غیر قانونی طور اُتے نظر بند کر کے جسمانی تے ذہنی تشدد دا نشانا بنایا جا رہیا اے تے ایہدے باوجود کشمیری اپنے حق ازادی لئی ڈٹے ہو ئے نیں۔ ہزاراں بندیاں نُوں صرف ایس بنیاد اُتے گرفتار کر کے ہندستان دیاں دور دُراڈیاں جیلاں وچ منتقل کیتا ہویا اے کہ اوہ بھارتی مظالم توں ازادی چاہندے نیں۔

انسانی ازادیاں اُتے یقن رکھن والے ملک تے لوکائی ہندستان دا سیاسی‘ سفارتی تے معاشی بائیکاٹ کرن‘ میڈیا مقبوضا کشمیر دے اندر ہون والے مظالم نُوں اُجاگر کرے تے عالمی ضمیر نُوں جگائے‘ 5 فروری نُوں پوری قوم تے دنیا وچ وَسن والے کشمیری تے پاکستان اقوام متحدا‘ یورپی یونین تے او آئی سی نُوں اِک زبان ہو کے پیغام دین کہ اوہ کشمیریاں دے پشتی بان نیں تے مقبوضا ریاست جموں و کشمیر نُوں بحران توں کڈھن تے خطے وچ پائیدار امن و سلامتی یقینی بنان لئی کشمیر جھیڑے دا حل ضروری اے۔ مودی حکومت دی طاقت دے وحشیانا استعمال دی پالیسی دا کوئی نتیجا نہیں نکلے گا‘ مسئلا کشمیر اِک سیاسی مسئلا اے جہدی بنیاد کشمیریاں نال کیتے گئے وعدیاں توں انحراف اُتے مبنی اے۔ بھارت نُوں جموں و کشمیر دی خصوصی حیثیت نُوں بحال کرنا پوے گا کیوں جے جموں و کشمیر دی لوکائی اپنے حقاں دے حصول لئی پُرعزم اے تے ایہناں نُوں دنیا دی کوئی طاقت خوفزدا کر کے اپنے حقاں دے مطالبے توں دستبردار ہون اُتے مجبور نہیں کر سکدی‘ جموں و کشمیر دی لوکائی پچھلیاں 2 صدیاں توں اپنے جمہوری حق‘ حق خُد ارادیت لئی لڑ رہی اے۔ اوہناں نے پہلے ڈوگرا سامراج دے ظالمانا شخصی نظام دے خلاف جدوجہد کیتی تے ہُن پچھلے 72 سال توں بھارت دے خلاف جدوجہد کر رہے نیں تے اوہناں دا اِک ای مطالبا اے کہ اوہناں نُوں اپنے مستقبل دا فیصلا کرن دا حق دِتا جاوے۔

عالمی میڈیا‘ سول سوسائٹی‘ انسانیت تے انسانی حقاں اُتے یقین رکھن والے ملک تے معاشریاں نُوں کشمیریاں دے حق ازادی تے حق خُد ارادیت دی حمایت کرنی چاہیدی اے کیوں جے ایہ اِک جایز‘ منصفانا تے فہم جوگ مطالبا اے‘ ایس لئی ہندستان‘ مقبوضا کشمیر تے جموں کشمیر توں اپنی فوج کڈھے‘ یاسین ملک‘ شبیر احمد شاہ‘ آسیہ اندرابی سنے سارے سیاسی آگوواں تے جیلاں وچ بند سیاسی قیدیاں نُوں رہا کرے‘ مقبوضا جموں و کشمیر وچ انسانی حقاں دیاں پامالیاں تے متنازع ریاست دی ابادی دے تناسب وچ تبدیلی لئی بھارتی شہریاں دی مقبوضا کشمیر وچ آبادکاری دا سلسلا بند کرے تے اقوام متحدا دیاں قرار داداں دی روشنی وچ کشمیریاں نُوں اپنے مستقبل دا فیصلا کرن دا اختیار بحال کرے پر ایہدے اُلٹ مودی نے 20 لکھ غیر کشمیریاں نُوں ڈومیسائل جاری کر کے کشمیری شہری بنا دِتا تے اوہنے 50 لکھ بندے تک لے جان دا ہدف طے رکھیا اے‘ ہندستان اقوام متحدا دے چارٹر تے قرار داداں دی خلاف ورزی کر رہیا اے کیوں جے مسلم اکثریت نُوں اقلیت وچ بدلنا ناقابل معافی جرم اے‘ ہندستان دے خلاف کارروائی کیتی جاوے۔

اقوام متحدا‘ سلامتی کونسل وچ قرار داد منظور کر کے مداخلت کرے‘ مودی ہندوتوا سوچ دے تحت ہندتان وچ وَسن والے لوکاں نُوں جبرن ہندو بنان دا منصوبا بنایا ہویا اے‘ آر ایس ایس دے ایجنڈے نُوں اگے ودھایا جا رہیا اے جہڑا پورے جنوبی ایشیا لئی خطرناک اے‘ مودی نے جہڑے ایجنڈے اُتے الیکشن جِتیا اوہنوں پورا کر رہیا اے۔ پچھلے 18 مہینیاں توں مقبوضا کشمیر وچ مکمل بلیک آؤٹ اے‘ نہتے کشمیریاں دے گھراں نُوں اگاں لائیاں گئیاں‘ بھارتی قابض فوجاں دے مقبوضا کشمیر وچ انسانیت سوز مظالم جاری نیں جہد ینال پورے خطے وچ خطرات لاحق ہو چکے نیں جے بھارت نہتے تے مظلوم کشمیریاں دی اواز نُوں طاقت نال نَپن اُتے بضد رہیا تے فیر خطے دیاں دو وڈیاں طاقتاں بھارت تے پاکستان دے وچکار جنگ وی ہو سکدی اے تے ایہ جنگ جوہری ٹکراؤ اُتے منتج ہووے گی جہدے نال پوری دنیا متاثر ہو سکدی اے‘ کشمیری لوکائی کشمیر دی وحد ت اُتے کسے قسم دی آنچ نہیں آن دیوے گی‘ ایس لئی عالمی برادری مداخلت کر کے کشمیر جھیڑا پرامن سیاسی تے سفارتی وسیلیاں نال حل کروان وچ اپنا کردار ادا کرے‘ دنیا دے منصفاں نُوں ایہ گل وی یاد رکھنی چاہیدی اے کہ کشمیریاں دی مرضی تے منشاء دے بغیر کوئی وی فارمولا کسے صورت قبولن جوگ نہیں اے۔ عالمی سطح اُتے پاکستان ولوں بھارت دا مکروہ چہرا بے نقاب کیتا گیا۔ 5 اگست دے غیر آئینی اقدامات دے بعد مسئلا کشمیر 3 وار اقوام متحدا وچ بحث ہیٹھ وی آیا‘ کشمیریاں نال صرف اکسُرتا دا اظہار کرن تے تقریراں کرن نال اوہ ازاد نہیں ہووے گا سگوں ایہدے لئی سیاسی تے سفارتی حمایت نال اگے ودھ کے عملی اقدامات کرنے پین گے۔