استعفیاں دی خبر نال بے چینی ودھائی جا رہی اے:شیخ رشید……٭رویل خبر٭

راولپنڈی (نیوز ڈیسک) وفاقی وزیر داخلا شیخ رشید احمد نے کہیا اے کہ استعفیاں دی دھمکی دین والے اپنے فیصلیاں اُتے نظرثانی کرن‘ استعفیاں نال کوئی قیامت نہیں آئے گی پر جمہوریت تے جمہوری نظام وچ بے چینی ضرور کھلرے گی‘ پی ڈی ایم جہڑا فیصلا کرے گی اج جمعے نُوں لال حویلی دے باہر وزیر داخلاوجوں اوہدا جواب دواں گا‘ جمہوریت نُوں طاقت ہمیشا ڈائیلاگ نال ملدی اے تے ڈائیلاگ دا دوجا ناں ای جمہوریت اے‘ عمران خان نے اقواممتحدا سنے پوری دنیا وچ کشمیر دا کیس مثالی انداز وچ لڑیا اے‘ لال حویلی دا لال چوک نال گوڑھا رشتا اے‘ لال چوک تے سری نگر دے ہوٹلاں وچ اج وی شیخ رشید دیاں تصویراں لگیاں نیں‘ ساڈی ازادی دا ہر ساہ کشمیر دی جدوجہد ازادی نال جڑیا اے‘ کساناں دے احتجاج وچ پاکستان دے ملوث ہون دا الزام لان والا بھارت جان لوے پاکستان کدی ایہو جہیاں چالاں نہیں چلدا پر ایہ طے اے کہ وفا کرو گے تے وفا کراں گے‘ جفا کرو گے تے جفا کراں گے تے جے ستم کرو گے تے ستم کراں گے‘ پیپلز پارٹی نال میرا کوئی رابطا نہیں ت ے نہ بلاول نال دوستی ہوئی اے‘ البتا آصف زرداری نُوں بختاور دی شادی دی مبارکباد دیندا آں تے اوہدیاں خُشیاں لئی دُعا کردا آں۔ایہناں خیالاں دا اظہار اوہناں نے پچھلے دن گورنمنٹ پوسٹ گریجویٹ وقار النساء کالج برائے خواتین وچ کشمیر دیہاڑ دے حوالے توں منعقدا تقریب نال خطاب تے میڈیا نال گلبات کردیاں ہویاں کیتا۔