شہباز شریف دی جیل وچ طبیعت وِگڑ گئی‘ ہسپتال اپڑا دتے گئے ……٭رویل خبر٭

لاہور (نمائندا رویل) مسلم لیگ (ن) دے صدر شہباز شریف دی کوٹ لکھپت جیل وچ طبیعت خراب ہو گئی تے اوہناں نُوں فوری طور اُتے کینسر ہسپتال منتقل کر دِتا گیا۔ شہباز شریف نُوں انمول کینسر ہسپتال منتقل کیتا گیا جتھے سکین کیتے جان گے۔ ایس موقع اُتے سخت سیکیورٹی انتظامات کیتے گئے تے ہسپتال تے دوالے وچ پولیس دی بھاری نفری تعینات اے۔ شہباز شریف نُوں بلڈ کینسر دا روگ لاحق رہیا اے تے اوہ لندن وچ علاج ہیٹھ رہے نیں۔ عدالتی حکم اُتے پنجاب انسٹی ٹیوٹ آف نیورو سائنسز دے ایگزیکٹو ڈائریکٹر دی اگوائی وچ سپیشل میڈیکل بورڈ علاج کر رہیا اے۔ شہباز شریف دے ذاتی معالجین وی انمول ہسپتال وچ موجود نیں۔ طبی ٹیسٹاں دیاں رپورٹاں آن دے بعد شہباز شریف نُوں ہسپتال وچ داخل کرن یاں نہ کرن دا فیصلا کیتا جاوے گا۔