kraamaat@gmail.com
+ +92 333-430-6384


دِل تے نہیں لائی دا۔۔۔۔٭رویل شاعری٭


ایم وائی شاہد February 15, 2021


اَکھوں ڈُلھےپانیاں نوں

بیتیاں کہانیاں نوں

جانیاں انجانیاں نوں

دور جاندے ہانیاں نوں

پِچھاں نہیں بُلائی دا

دل تے نہیں لائی دا

سمیاں سہانیاں نوں

سُکھ دے زمانیاں نوں

نیناں مستانیاں نوں

پیار دے دیوانیاں نوں

اکھاں چ وسائی دا

دل تے نہیں لائی دا

سوچ دے سویریاں نوں

ہاسیاں بکھیریاں نوں

دکھاں تیرے میریاں نوں

ہنجواں وی کیریاں نوں

جگ توں لُکائی دا

دل تے نہیں لائی دا

ویلے دیاں لہرناں نوں

آندے جاندے قہرناں نوں

دُھپاں تے دُپہرناں نوں

کوڑیاں تے زہرناں نوں

بہ کے لنگھائی دا

دل تے نہیں لائی دا

٭٭٭٭٭