kraamaat@gmail.com
+ +92 333-430-6384


نعت حضور سرور کائنات ؐ ﷺ/     میاں محمد بخش-----رویل


میاں محمد بخش December 12, 2019


ؒ واہ کریم اُمت والی مہر شفاعت کردا

جبرائیل جہے جس چاکر نبیاں دا سر کردا

اوہ محبوبؐ حبیبؐ ربانا حامی روز حشر دا

آپ یتیم یتیماں تائیں ہتھ سرے تے دھردا

جے لکھ واری عطر گلاباں دھوئیے نِت زباناں

نام اوہناں دے لائق ناہیں کیہ قلمے دیاں کاناں

نعت اوہناں دے لائق پاکی کد اساں ناداناں

میں پلیت ندی وچ وڑیا پاک کرے تن جاناں

نال اشارت ٹُکڑے کیتا جس نے چن اسمانی

سنگ روڑاں تھیں جس پڑھایا کلمہ ذکر ربانی

معجزیوں اُس بہت ودھائی تھوڑی سی مہمانی

لشکر تَسّا سبھ رجایا ہکسے کاسے پانی

صدر نشین دیوان حشر دا افسر وچ اماماں

کُل نبی ؑ محتاج اوہناں دے نفراں وانگ غلاماں

دُنیا تے جد ظاہر ہویا گھریا دین دماماں

کو ہ قاف نے سیس نوائے کوٹ کفار تماماں

تخت چبارے شاہی کنبے ڈھٹھے کفر منارے

چھِک دِتے قرآن اوہدے نے اگلے دفتر سارے

سبھو نُور اوسے دے نوروں اس دا نُور حضوروں

اُس نوں تخت عرش دا ملیا موسیٰؑ نوں کوہ طوروں

لولاک لما خلقت الکون آیا شان اوہناں دے

جن انسان غلام فرشتے دوئے جہان اوہناں دے

نور محمد ؐ روشن آہا آدم ؑ جدوں نہ ہویا

اوّل آخر دوئے پاسے اوہو مَل کھلویا

پاک جمال اوہدے نوں سِکدے رُوح نبیاں سَندے

حُوراں مَلک اوہناں دی خاطر خدمت گاراں بندے