kraamaat@gmail.com
+ +92 333-430-6384


جمہوری سفر دا اِک نواں دور شروع ہون جا رہیا اے:بلاول زرداری ……٭رویل خبر٭


نمائندا رویل March 04, 2021


اسلام آباد (نیوز ڈیسک) پاکستان پیپلز پارٹی دے چیئرمین بلاول بھٹو زرداری نے کہیا اے کہ عمران خان نُوں اپنی اسمبلی توں شکست دلوانا تواریخی کامیابی اے۔ یوسف رضا گیلانی نُوں چیئرمین سینیٹ منتخب کراواں گے۔ قومی اسمبلی وچ پاکستان ڈیمو کریٹک موومنٹ دے امیدور سید یوسف رضا گیلانی دی فتح دے بعد نیوز کانفرنس کردیاں ہویاں پاکستان پیپلز پارٹی دے چیئرمین د ا کہنا سی کہ اج پارلیمان دے وقار وچ وادھا ہویا اے‘ عمران خان نُوں اپنی اسمبلی توں شکست دلوانا تواریخی کامیابی اے‘ ساریاں پی ڈی ایم جماعتاں دا شکر گزار آں۔ اج جمہوریت دی اواز بلند ہوئی اے۔ اوہناں نے کہیا کہ اسیں ضمنی تے سینیٹ الیکشن وچ حکومت نُوں شکست دِتی اے‘ کٹھ پتلی حکومت خلاف جنگ جاری رہوے گی‘ ظالم حکومت نُوں چھیتی گھر گھلاں گے۔ جے ایہناں وچ شرم ہوندی تے مستعفی ہو جاندے‘ شہباز شریف تے فضل الرحمان دے کول جاواں گا۔ بلاول بھٹو زرداری نے کہیا کہ پاکستان ڈیمو کریٹک موومنٹ دے فاتح امیدوار یوسف رضا گیلانی نُوں چیئرمین سینٹ منتخب کراواں گے۔ ایہ اِک قسم دا پی ٹی آئی ایم ایف پروگرام اُتے عدم اعتماد اے۔ پی پی چیئرمین دا کہنا سی کہ پی ڈی ایم وچ سارے فیصلے مشاورت نال ہوندے نیں‘ پی ڈی ایم دا مستقبل روشن اے‘ پاکستان دے جمہوری سفر دا اِک نواں دور شروع ہون جا رہیا اے‘ ناکامی اُتے وزیراعظم عمران خان نُوں استعفا دے دےنا چاہیدا اے‘ جمہوریت بہترین انتقام اے‘ حکومت ہار چکی اے تے پاکستان دی لوکائی جت چکی اے۔ اوہناں دا کہنا سی کہ اسیں کہیا سی کہ سینیٹ الیکشن دے بعد لانگ مارچ یاں عدم اعتماد وی ہووے گا‘ ویلے دا تعین کراں گے کہ عدم اعتماد تے لانگ مارچ کدوں کرنا اے۔ایس موقع اُتے پچھلے وزیراعظم یوسف رضا یگلانی دا کہنا سی کہ ساریاں دیاں نظراں اسلام آباد دی سیٹ اُتے سن‘ کامیابی اُتے ساریاں نُوں مبارکباد پیش کردا آں‘ اج دی کامیابی نال جمہوریت دی فتح ہوئی اے‘ پی ڈی ایم جماعتاں دا شکر گزار آں۔ پی ڈی ایم لئی اسلام آباد دی جنرل سیٹ بہت اہم سی۔