ایوان زیریں تے ایوان بالا وچ موجود لوک صرف پیسے دی خاطر اوتھے نیں:سراج الحق دا جیکب آباد وچ خطاب ……٭رویل خبر٭

جیکب آباد (نیوز ڈیسک) جماعت اسلامی دے مرکزی امیر سراج الحق نے کہیا اے کہ ملک دی 22 کروڑ لوکائی اوکڑاں دا شکار اے‘ پی ٹی آئی دے 1100 دن حکومت دے باوجود وی وزیراعظم رو رہے نیں کہ مافیا کم کرن نہیں دیندا۔ مافیا تے اسمبلی تے سینیٹ وچ موجود اے چوراں نُوں ٹکٹ دِتی گئی‘ 60 کروڑ وچ ٹکٹ لین والے ایوان وچ آ کے خدمت نہیں لوکائی دیاں دھوناں مروڑن گے‘ دولت تے زر دے ایہناں سوم ناتاں نُوں محمود غزنوی بن کے ٹکڑے ٹکڑے کرنا پوے گا۔ امیر جماعت اسلامی پاکستان سراج الحق نے کہیا اے کہ سینیٹ تے اسمبلی وچ لوکاں دی موجودگی دی وجھا پیسا اے‘ اج کل بازار دا چوکیدار تے ملک دا آگو دوویں ای مشکل وچ نیں‘ جے تُسیں چاہندے او کہ ملک ترقی کرے تے غریب نُوں روٹی تے کپڑا ملے تے ایتھے اللہ دا نظام لیانا پوے گا۔ سراج الحق نے ایہ وی کہیا کہ ایوان زیریں تے ایوان بالا وچ موجود لوک صرف پیسے دی خاطر اوتھے نیں۔ امیر جماعت اسلامی نے ہور کہیا کہ سینیٹ الیکشن فکس سی‘ اسلا آباد توں گیلانی سلیکٹ ہووے گا‘ سینیٹ چیئرمین سنجرانی سلیکٹ ہووے گا۔ اوہناں نے کہیا کہ کجھ عرصے پہلاں مچھ وچ 10 مزدوراں نُوں شہید کیتا گیا‘ شہید مزدوراں دیاں ماواں وزیراعظم دا انتظار کر رہیاں سن‘ 8 دن تک وزیراعظم مزدوراں دے لواحقین کول نہیں گئے‘ وزیراعظم نے کہیا کہ لواحقین بلیک میل کر رہے نیں۔ سراج الحق نے کہیا کہ ظالم نُوں ووٹ دین والا وی ظلم وچ رلتی اے‘ پیپلز پارٹی‘ ن لیگ تے پی ٹی آئی اِک ای سیاسی جماعتاں نیں۔ اوہناں نے کہیا کہ وزیراعظم نے 1 کروڑ نوجواناں نُوں روزگار دین دا وعدا کیتا سی‘ 50 لکھ گھر دین دا وعدا کیتا گیا سی‘ جھوٹھ بولن دا ریکارڈ بنا یا گیا۔ امیر جماعت اسلامی نے ایہناں خیالاں دا اظہار ضلع کونسل ہال جیکب آباد وچ جماعت اسلامی دے اراکین نال خطاب تے کشمور وچ ورکرز کنونشن نال خطاب کردیاں ہویاں کیتا۔ سراج الحق نے ہور کہیا کہ عدالتاں وچ انصاف وِکدا اے‘ ہسپتالاں وچ غریب دا علاج نہیں ہوندا‘ بچے تعلیم توں محروم نیں‘ کجھ کرپٹ سرمایا داراں تے جاگیر داراں نے نظام نُوں یرغمال بنا رکھیا اے جو سیاسی دہشتگردی اے‘ ایہناں دا مقابلاکرنا اے تے قوم نُوں ایہناں توں نجات دلوانی اے‘ چوناں وچ ملک دے گلی گلی تے کوچے کوچے وچ میر جعفر دے پیرو کاراں دا مقابلا کر کے ایہناں نُوں ہرانا پوے گا۔ اوہناں نے کہیا کہ لوکائی نُوں ہُن نویں لوکاں اُتے اعتماد کرنا پوے گا‘ نیکی کرن والے بڑے نیں ایہناں توں فایدا چُکن دی ضرورت اے۔ اوہناں نے جماعت دے اراکین نُوں ہدایت کیتی کہ اوہ معاشرے وچ پھَل دار رُکھ بنن‘ محبت‘ بھائی چارے نُوں عام کرن۔