جسپال گھئی دی غزل ۔۔۔٭رویل شاعری٭

چُپ دے کھوہ تے کھڑکے کوئی ڈول ذرا
سُتی رات دے کن اندر کجھ بول ذرا
پوہ پھٹی ہے باہر، اندر نھیرا کیوں
اپنے اندر وی کوئی سورج ٹول ذرا
شاید کوئی لال گواچا مل جاوے
مٹی مٹی بول ، مٹی پَھول ذرا
ٹٹدا ہویا تارا وی کجھ دے جاندے
منگ دعا کوئی، اڈّ کھاں اپنی جھول ذرا
شاید 'توں' دے نالوں 'میں' وزنی نکلے
پکڑ ترازو، اپنی 'میں' وی تول ذرا
مستقبل دے نیناں راہیں ویکھن لئی
ماضی دا کوئی خاب ادھورا ٹول ذرا
دوروں دوروں پچھدیں، دُوروں دساں کیہ
دل دی دساں، آ، بہ دل دے کول ذرا

٭٭٭٭٭