kraamaat@gmail.com
+ +92 333-430-6384


کیہ دساں ۔۔۔۔ ٭رویل شاعری٭


ندیم افضل March 19, 2021


کیہ دساں کیہ روپ تیرا اے

وگدے ہوئے دریاواں وانگوں

ساون وچ گھٹاواں وانگوں

نکلیاں دلوں دُعاواں وانگوں

بوڑھ دیاں اے چھاواں وانگوں

کیہ دساں ۔۔۔۔

کیہ دساں کیہ رُوپ تیرا اے

چیتر دے ہے رنگاں ورگا

دل دیاں پاک امنگاں ورگا

گوری بانہہ وچ ونگاں ورگا

الھڑ دی اے سنگاں ورگا

کیہ دساں ۔۔۔۔

کیہ دساں کیہ رُوپ تیرا اے

جنگل وچ اذان ای جاپے

شاہاں دا وی مان ای جاپے

بالاں دی مسکان ای جاپے

اے ونجھلی دی تان ای جاپے

کیہ دساں ۔۔۔۔

کیہ دساں کیہ روپ تیرا اے

ہندا جت دا ٹہور اے جیویں

رنداں دے لئی دور اے جیویں

پھلاں اتے بھور اے جیویں

پینڈو دے لئی لہور ای جیویں

کیہ دساں ۔۔۔۔

کیہ دساں کیہ روپ تیرا اے

مستاں دے ہے حال جہیا اے

ہرنیاں دی اے چال جہیا اے

ہیریاں دا اک تھال جہیا اے

اے تے سولہویں سال جہیا اے

کیہ دساں ۔۔۔۔

کیہ دساں کیہ روپ تیرا اے

مندراں دے ہے ٹل دے وانگوں

اے موسم دے پھل دے وانگوں

اے خوشیاں دے پل دے وانگوں

توڑ چڑھی کسے گل دے وانگوں

کیہ دساں ۔۔۔۔

کیہ دساں کیہ روپ تیرا اے

ہارے لئی دلاسا جیویں

دکھیے دے لئی ہاسا جیویں

جگ تے اکو پاسا جیویں

حسن دا خاص خلاصا جیویں

کیہ دساں ۔۔۔۔

کیہ دساں کیہ روپ تیرا اے

مور دے پیلاں پاؤن دا منظر

نچن ہسن گاؤن دا منظر

بھُلے یار مناؤن دا منظر

کسے دے ہتھ نہ آؤن دا منظر

کیہ دساں ۔۔۔۔

کیہ دساں کیہ روپ تیرا اے

وارث دی اے ہیر جہیا اے

خاباں دی تعبیر جہیا اے

سوہنا اے کشمیر جہیا اے

جنت دی تصویر جہیا اے

کیہ دساں ۔۔۔۔

کیہ دساں کیہ روپ تیرا اے

٭٭٭٭٭