پاکستان سرکار تے لوکائی بھارت سنے سارے گوانڈھی دیساں  نال پُرامن تعلقات چاہندے نیں: وزیراعظم عمران خان……٭رویل خبر٭

اسلام آباد (نیوز ڈیسک) وزیراعظم عمران خان نے کہیا اے پاکستان سرکار تے لوکائی بھارت سنے سارے گوانڈھی ملکاں نال پرامن تعلقات چاہندے نیں‘ جنوبی ایشیا وچ دیر پا امن تے استحکام لئی مسئلا کشمیر سنے سارے تصفیا طلب جھیڑیاں دا حل ضروری اے۔ وزیراعظم عمران خان نے بھارتی وزیراعظم نریندرا مودی نُوں جوابی خط لکھیا اے‘ وزیراعظم نے پاکستان دیہاڑ اُتے مبارکباد دین اُتے بھارتی وزیراعظم دا شکریا ادا کیتا تے کہیا کہ پاکستانی لوکائی ایس دن نُوں اپنے بانیان دی اِک خُد مختار تے ازاد ریاست دے وژن نُوں لے کے سوجھ بوجھ تے دور اندیشی نُوں خراج تحسین پیش کرن لئی مناندی اے جتھے اوہ ازادی نال رہ سکدے نیں تے اپنیاں بھرویاں صلاحیتاں دا احساس کر سکدے نیں۔ وزیراعظم عمران خان نے خط وچ لکھیا کہ پاکستان دی لوکائی بھارت سنے سارے گوانڈھی ملکاں نال پرامن تے تعاون اُتے مبنی تعلقات وی چاہندی اے۔ اوہناں نے کہیا کہ ساڈا یقین اے کہ جنوبی ایشیا وچ دیر پا امن و استحکام لئی مسئلا کشمیر سنے سارے تصفیا طلب جھیڑیاں دا حل ہونا ضروری اے‘ تعمیری تے نتیجا خیز مذاکرات لئی سازگار ماحول پیدا کرنا ضروری اے۔ وزیراعظم نے کہیا کہ میں کووڈ 19 دے خلاف بھارت دی لوکائی لئی نیک خاہشاں دا اظہار کردا آں۔ یاد رہو ے کہ بھارتی وزیراعظم نریندر مودی نے پاکستان دیہاڑ اُتے وزیراعظم عمران خان نُوں تہنیتی پیغام گھلیا سی۔