kraamaat@gmail.com
+ +92 333-430-6384


بھارت توں کپاہ تے کھنڈ درآمد کرن دی تجویز نُوں رَد ……٭رویل خبر٭


نمائندا رویل April 02, 2021


اسلام آباد (نیوز ڈیسک) وفاقی کابینا نے بھارت توں کاٹن تے کھنڈ درآمد کرن دی تجویز رَد کر دِتی جد کہ براڈ شیٹ تحقیقاتی کمیشن دی رپورٹ نُوں عام کرن دی منظوری دے دِتی۔ جمعرات والے دن وفاقی کابینا دا اجلاس وزیراعظم عمران خان دی صدارت ہیٹھ ہویا۔ اجلاس وچ ملکی‘ سیاسی‘ معاشی صورتحال اُتے غور کیتا گیا۔ وفاقی کابینا نے ای سی سی دی بھارت توں کپاہ تے کھنڈ درآمد کرن دی تجویز نُوں رَد کر دتا۔ اجلاس وچ وزیراعظم تے کابینا ارکان نے کرونا دے ودھدے کیسز اُتے تشویش دا اظہار کیتا‘ وزیراعظم عمران خان نے ایس او پیز اُتے ہر صورت عملدرآمد یقینی بنان دی ہدایت کردیاں ہویاں کہیا کہ ماسک دے حوالے توں ملک گیر مہم چلائی جاوے‘ لوکائی توں اپیل اے ایس او پیز اُتے عملدرآمد کرن۔ وزیراعظم نے کہیا کہ براڈ شیٹ تحقیقات رپورٹ لوکائی ساہمنے آنی چاہیدی اے تاں جے لوکائی نُوں پتا لگے کہ قومی خزانے نال کہنے کھلواڑ کیتا اے۔کابینا اجلاس بعد میڈیا نُوں بریفنگ دیندیاں ہویاں وفاقی وزیر فواد چودھری نے کہیا کہ براڈ شیٹ کمیشن نے سوئس کیس دے حوالے توں نشاندہی کر دِتی اے‘ دستاویزات دے تحت آصف علی زرداری خلاف سوئس اکاؤنٹس کیس دُبارا کھُل سکدا اے جد کہ حکومت نے براڈ شیٹ تحقیقاتی کمیشن وچ نامزد 5 بندیاں خلاف کریمنل کاررائی دا فیصلا وی کیتا اے۔ ایہناں 5 بندیاں وچ احمر بلال صوفی‘ غلام رسول‘ عبدالباسط‘ شاہد علی بیگ تے طارق فواد شامل نیں‘ ایہناں 5 بندیاں خلاف فوجداری کارروائی دا حکم دِتا گیا اے۔ فواد چودھری نے کہیا کہ پچھلے صدر آصف زرداری بَری ہوئے تے کہیا گیا کہ نیب کول سوئس اکاؤنٹس دا اوریجنل ریکارڈ نہیں‘ ہُن سوئس اکاؤنٹ دا حکومت کول اوریجنل ریکارڈ موجود اے‘ لیگل ٹیم جایزا لے رہی اے۔ فواد چودھری نے کہیا اے کہ انڈیا نال تجارت لئی ای سی سی دی تجویز دی توثیق نہیں کیتی گئی‘ بھارت نال تعلقات دی بحالی لئی مسئلا کشمیر دا حل ضروری اے۔ اوہناں نے واضہ تے دو ٹوک موقف اختیار کردیاں ہویاں کہیا کہ جدوں تک بھارت 5 اگست 2019 دے اقدامات اُتے نظرثانی نہیں کردا‘ اوہدے نال تعلقات معمول اُتے لیانا تے تجارت کرنا ممکن نہیں‘ پاکستان وچ کشمیر دا سودا کرن دی کسے وچ جرات نہیں۔