پنجاب دی سوہنی اَواز :شوکت علی ا گلے جہان ٹر گئےاوہناں نے  پنجابی وچ شعری پرا گا "ٹکوراں" توں وکھ بالاں لئی گیت وی لکھے۔۔۔۔۔٭رویل خبر٭

لاہور (نمایندا رویل) پنجاب دی سوہنی اَواز شوکت علی خاں ہمیش ہمیش لئی بند ہو گئی اے ۔شوکت علی ہوریں لمے چراں توں بیمار سن۔چیتے رہوے اوہناں نے پنجابی زبان وچ شعری پرا گا"ٹکوراں" تے بالاں واسطے گیت وی لکھے سن۔اوہ پنجابی زبان واسطے ہورہے وکھالیاں وچ بھرواں بھا گ لیندے رہے , پنجاب تے پنجابی نال پیار اوہناں دی خاص پچھان سی آپ دی گلوکاری دے چاہیوان چڑھدے تے لہندے پنجاب توں وکھ پوری دُنیا وچ کھلرے ہوئے نیں۔صوفی تے فوک گلوکار شوکت علی کجھ عرصا بیمار رہن دے بعد جگر دے روگ کارن چلانا کر گئے۔ شوکت علی پچھلے کجھ عرصے توں ہسپتال وچ علاج ہیٹھ سن پر 2 دن پہلاں ای اوہناں دی حالت وِگڑن اُتے اوہناں نُوں انتہائی نگہداشت دے وارڈ (آئی سی یو) وچ داخل کروایا گیا سی‘ جتھے اوہناں دی حالت مسلسل خراب ای سی۔ شوکت علی دے گھروالیاں نے 2 اپریل دے تیجے پہر تصدیق کیتی کہ گلوکار صحت یاب نہیں ہو سکے تے خالق حقیقی نال جا ملے نیں‘ گلوکار دے انتقال اُتے موسیقی‘ شوبز تے سیاست نال تعلق رکھن والیاں شخصیات نے گوڑھے دُکھ دا اظہار کیتا تے اوہناں دی مَوت نُوں موسیقی لئی بہت وڈا نقصان متھ دِتا۔ وسیلیاں مطابق شوکت علی لمے عرصے توں جگر دے روگ وچ مبتلا سن تے پچھلے ورھے اوہناں نُوں علاج لئی پنجاب توں سندھ وی منتقل کیتا گیا سی‘ پر اہوناں دی طبیعت وچ کوئی خاص فرق نہیں پیا۔ ڈاکٹراں نے شوکت علی دے جگر دی پیوندکاری دی تجویز دِتی سی وڈی عمر تے اوہناں دی ودھدی بیماری کارن ٹرانسپلانٹ دے دھڑکوواں دے پیش نظر انج ممکن نہیں ہو سکیا۔ شوکت علی نُوں حکومت ولوں 1990 وچ پرائیڈ آف پرفارمنس ایوارڈ نال نوازیا گیا سی۔ گلوکار شوکت علی صوفیانہ کلام تے پنجابی گانیاں وچ اِک ناں رکھدے نیں‘ 1965 وچ گایا جان والا اوہناں دا ملی نغما ”جاگ اُٹھا ہے سارا وطن“ اج وی مقبول اے۔ اوہناں نے 1982 وچ نویں دِلی وچ منعقد ہون والے ایشین گیمز وچ لائیو پرفارمنس دِتی سی تے اوہناں دا گانا ”کدی تے ہس بول وے“ سال 2009 وچ بھارتی فلم لو اج کل وچ وی استعمال ہویا سی۔ گلوکار دے چلانا کر جان اُتے وزیراعظم سنے ہور سیاسی تے سماجی شخضیات ولوں گوڑھے دُکھ دا اظہار کیتا گیا اے۔