کرونا وایرس  پچھلے 24 گھنٹیاں دوران ہور 83 بندیاں دے چلانا کر جان نال مرن والیاں د ی مجموعی گنتی 14 ہزار 613 ہو گئی ……٭رویل خبر٭

اسلام آباد (نیوز ڈیسک) کرونا دی تیجی لہر شدت اختیار کر گئی‘ مثبت کیسز وچ ہر لنگھدے دن نال وادھا ہو رہیا اے‘ پورے ملک وچ کرونا دے مثبت کیساں دی گنتی 5 ہزار توں ودھ گئی۔ نیشنل کمانڈ اینڈ اپریشن سینٹر ولوں جاری کردا آنکڑیاں مطابق پچھلے 24 گھنٹیاں دوران پورے ملک وچ ہور 5 ہزار 234 مثبت کیسز رپورٹ ہوئے نیں ایس طرحاں پاکستان وچ کرونا دے مصدقا روگیاں دی گنتی 6 لکھ 78 ہزار 165 ہو گئی اے۔ سرکاری آنکڑیاں مطابق ایس ویلے ملک وچ کرونا دے فعال روگیاں دی گنتی 56 ہزار 347 اے جد کہ 3 ہزار توں ودھ روگیاں دی حالت ماڑی اے۔ پچھلے 24 گھنٹیاں دوران ہور 83 بندیاں دے چلانا کر جان نال مرن والیاں د ی مجموعی گنتی 14 ہزار 613 ہو گئی اے۔ این سی او سی دے مطابق کرونا توں 1 دن وچ 1 ہزار 931 روگی صحت یاب ہوئے جہدے بعد صحت یاب ہون والے روگیاں دی گنتی 6 لکھ 7 ہزار 205 ہو گئی اے۔ ایس توں وکھ چین توں خریدی گئی کرونا ویکسین دی ہور کھیپ پاکستان پہنچ گئی اے۔ ہُن تک چین توں کرونا ویکسین دیاں مجموعی طور اُتے 25لکھ 60 ڈوز پاکستان پہنچ چکیاں نیں‘ 15 لکھ کرونا ویکسین سائینو فارم چین ولوں امداد وچ دِتیاں گئیاں نیں۔ اج پاکستان پہنچن والیاں سائینو فارم ویکسین دیاں ڈوزز دی گنتی 5 لکھ اے جد کہ پاکستان ولوں خریدی گئی کین سینو بائیو دیاں 60 ہزار ڈوز وی پہنچ چکیاں نیں۔ حکام وزارت نیشنل ہیلتھ سروسز نے دَسیا کہ چین توں کرونا ویکسین دیاں ہور 40 لکھ ڈوزز اپریل وچ پاکستان پہنچن گیاں۔دوجے پاسے برطانیا نے پاکستان نُوں سفری پابندیاں دی ریڈ لسٹ وچ شامل کر دِتا اے۔ پاکستان دے علاوا فلپائن‘ کینیا تے بنگلا دیس وی ریڈ لسٹ وچ شامل نیں۔ برطانوی حکام مطابق 9 اپریل توں برطانیا وچ داخل ہون والے سارے مسافراں نُوں 10 دن لئی اکلاپے وچ رہنا پوے گا‘ اطلاق اوہناں مسافراں اُتے وی ہووے گا جہڑے ٹرانزٹ فلائٹ اُتے ایہناں ملکاں وچ جان گے۔