kraamaat@gmail.com
+ +92 333-430-6384


سیاسی تے مذہبی جماعت تحریک لبیک پاکستان (ٹی ایل پی) دی میڈیا کوریج اُتے پابندی دے  ہدایت نامے جاری ……٭رویل خبر٭


نمائندا رویل April 17, 2021


اسلام آباد (نیوز ڈیسک) پاکستان الیکٹرانک میڈیا ریگولیٹری اتھارٹی (پیمرا) نے حا ل ای وچ پابندی دا ساہمنا کرن والی سیاسی تے مذہبی جماعت تحریک لبیک پاکستان (ٹی ایل پی) دی میڈیا کوریج اُتے پابندی لا دِتی پیمرا نے سارے سیٹلائٹ ٹی وی چینلز تے ایف ایم ریڈیو نُوں ایس حوالے توں ہدایت ناما جاری کر دِتا۔ ہدایت نامے وچ دَسیا گیا اے کہ وزارت داخلا نے 15 اپریل نُوں تحریک لبیک پاکستان نُوں کالعدم مِتھ دِتا سی۔ پیمرا دے ہدایت نامے وچ ہور کہیا گیا کہ پیمرا ریگولیشنز 2012 دی شق 18(ایچ) تے الیکٹرانک میڈیا کوڈ آف کنڈکٹ 2015 دی شق 16 دے تحت سارے پروگرامز ملک دے قوانین دے تحت ہونے چاہیدے نیں جد کہ الیکٹرانک میڈیا کوڈ آف کنڈکٹ 2015 دی شق 3(3) وچ کالعدم تنظیماں دی میڈیا کوریج اُتے پابندی عاید کیتی گئی سی۔ پیمرا دا کہنا سی کہ ایہناں قوانین نُوں ساہمنے رکھدیاں ہویاں سارے سیٹلائٹ ٹی وی چینلز تے ایف ایم ریڈیو لائسنس ہولڈرز‘ تحریک لبیک پاکستان نُوں کسے وی قسم دی میڈیا کوریج نہ دین۔ دوجے پاسے کالعدم تنظیماں دی فہرست وچ شمولیت دے بعد ٹی ایل پی نُوں فنڈز دین اُتے پابندی ہووے گی تے ایس تنظیم نُوں خیرات‘ صدقات یاں کسے قسم دی امداد دہشتگرداں دی مالی معاونت وانگوں ہووے گی۔ ایس توں وکھ ایف آئی ا نے ذکر کیتی کالعدم تنظیم دے 25 اکاؤنٹس بلاک کرن لئی کم شروع کر دِتا اے‘ کالعدم تنظیم دے ایہناں اکاؤنٹاں اُتے الزام عاید کیتا گیا اے کہ ایہ اکاؤنٹس شہر وچ ہون والی ہنگاما آرائی دے دوران انتشار کھلارن وچ مصروف سن جد کہ ایف آئی اے نے اکاؤنٹس بلاک کرن لئی پی ٹی اے نُوں باقاعدا چٹھی لکھن دا فیصلا کیتا اے۔ وسیلیاں دے مطابق تحریک لبیک پاکستان دے آگوواں دا ناں فورتھ شیڈول وچ شامل کرن دا امکان وی اے۔