کراچی وچ کرونا دا برطانوی ویرینٹ تیزی نال کھلرن لگا……٭رویل خبر٭

کراچی (نمایندا رویل) وزیر صحت سندھ ڈاکٹر عذرا پیچوہو نے کہیا اے کہ ملک دے ہور صوبیاں دے بعد سندھ وچ وی کرونا وایرس دے ”یو کے ویرینٹ“ دے کیسز رپورٹ ہوئے نیں۔ وسیلیاں دے مطابق سندھ دی وزیر صحت ڈاکٹر عذرا پیچوہیو ولوں جاری اہم بیان وچ کہیا گیا اے کہ کراچی وچ ساہمنے آن والے کرونا دے نویں کیسز وچ ادھے کیسز وچ کرونا دی نویں برطانوی قسم پائی گئی اے۔ ڈاکٹر عذرا پیچوہو دا اپنے بیان وچ ہور کہنا سی کہ جینومیک سٹڈی دے تحت 50 فیصد سیمپلز وچ ”یو کے ویرینٹ“ دی تصدیق ہوئی اے۔ کرونا وایرس دے ایہ ویرینٹ بہت تیزی نال کھلردا اے تے قدرے خطرناک وی اے۔ وزیر صحت سندھ دا کہنا سی کہ عید دی وجھا توں شاپنگ تے ہور خریداری دے دوران رَش ویلے وایرس دے تیزی نال کھلرن دا دھڑکو اے۔ ایس لئی لوکائی رش دے دوران احتیاط نال کم لوے تے ایس او پیز اُتے مکمل عملدرآمد کرے۔