kraamaat@gmail.com
+ +92 333-430-6384


پوری دنیا وچ خبراں چھپ رہیاں نیں کہ ختم نبوت دا سبھ توں وڈا سپاہی وزیر داخلا اے:شیخ رشید……٭رویل خبر٭


نمائندا رویل April 22, 2021


اسلام آباد (نیوز ڈیسک) وفاقی وزیر داخلا شیخ رشید احمد نے کہیا اے کہ مذہبی جماعت دے 733 وِچوں 669 کارکناں نُوں رہا کر دِتا گیا اے‘ نویں طے شدا معاہدے دے تحت باقی نُوں وی رہا کر دِتا جاوے گا‘ مولانا سعد رضوی سنے 210 بندیاں خلاف مقدمے عدالتاں ویکھن گیاں‘ خاقان عباسی نے اسمبلی وچ بدترین زبان استعمال کیتی‘ نواز شریف نُوں ڈی پورٹ کرن لئی برطانیا نُوں درخاست دواں گے‘ پوری دنیا وچ خبراں چھپ رہیاں نیں کہ ختم نبوت دا سبھ توں وڈا سپاہی وزیر داخلا اے‘ مولانا فضل الرحمان نے حالیا واقعات اُتے سیاست چمکان دی کوشش کیتی تے اوہ سمجھن لگے کہ شاید کوئی لاٹری نکل آئی اے۔ مولانا فضل الرحمان نے فتا کھلارن دی کوشش کیتی تے کہیا کہ لاشاں اسلام آباد لیاؤ تاں جے اسیں وی ایہناں دے نال کھلوواں گے۔ ایہناں خیالاں دا اظہار اوہناں نے بدھ والے دن میڈیا نُوں مذہبی جماعت نال کیتے گئے نویں معاہدے اُتے پریس بریفنگ دیندیاں ہویاں کیتا۔ شیخ رشید احمد نے کہیا کہ 20 اپریل نُوں 7 گھنٹے تک کالعدم مذہبی جماعت نال مذاکرات کیتے گئے جہدے بعد معاملات طے پائے تے احتجاج تے دھرنے ختم کرن د اعلان کیتا گیا۔ وزیر داخلا نے کہیا کہ ٹی ایل پی دے دھرنے دوران 30 گڈیاں سڑیاں نیں تے 5 گڈیاں مذہبی جماعت نے واپس کر دِتیاں نیں تے 12 پولیس اہلکار وی ایہناں نے 19 اپریل نُوں واپس کر دِتے سن۔ 210 ایف آئی آرز عدالتی پراسس توں لنگھن گیاں جہدے وچ سعد رضوی دا وی کیس شامل اے تے 30 دن دے اندر ایہناں نے جواب داخل کروانا اے تے فیر اِ ک کمیٹی بنے گی ایس کیس دا فیصلا کرے گی تے سبھ توں اہم گل ایہ اے کہ وزیراعظم آپ مغربی ملکاں نُوں ناموس رسالت اُتے اعتماد وچ لین جا رہے نیں۔ اوہناں نے کہیا کہ ریاست اپنے پَیراں اُتے کھلوتی اے تے ریاست دی رٹ قایم اے جہڑا بندا قانون نُوں ہتھ وچ لوے گا اوہدے نال سختی نال نبڑیا جاوے گا۔ ملک وچ انتشار کھلارن والے خاص طور اُتے سوشل میڈیا اُتے ایہو جہے پراپیگنڈے کیتے گئے تے ایہو جہے لوکاں نُوں مردا وکھایا گیا جہڑے زندا سن۔ مذہبی جماعت دے لوک وی واصل ہوئے نیں جہدے اُتے سانوں افسوس اے پر اسیں ناموس رسالت تے اسلام دی خاطر دُبارا بیٹھے آں حالاں جے ساڈیاں پہلے والیاں ساریاں کوششاں ضایع ہو چکیاں سن پر دُبارا معاہدا طے پایا اے۔ پاکستان وچ دہشتگردی‘ فتنا انگیزی دے خاتمے لئی سخت قانون بنایا جاوے‘ مدرسیاں نُوں حکومت اپنے کنٹرول وچ لینا چاہندی اے پر ایس حوالے توں پالیسی بناواں گے‘ جہدے وچ علمائے کرام نال وی مشاورت کیتی جاوے گی۔ اِک سوال دے جواب وچ اوہناں نے کہیا کہ جہڑے پولیس والے شہید ہوئے نیں اوہناں نُوں شہید پیکج دے رہے آں جہڑے زخمی ہوئے نیں اوہناں نُوں نقد انعا م 4 کروڑ رُپئے دِتا جا رہیا اے۔ سبھ توں وڈا ہتھیار سوشل میڈیا دا استعمال اے جہدے اُتے اسیں میٹنگ کیتی اے ملکی حساس ادارے وی سوشل میڈیا دے خلاف کارروائی کرن گے‘ سوشل میڈیا دا مقصد پاکستان نُوں تباہ کرنا اے‘ ایہ سوشل میڈیا بھارت سنے بیرون ملک توں چلایا جا رہیا اے‘ دو دو لکھ لوک انڈیا توں آن لائن سن۔ اِک سوال دے جواب وچ اوہناں نے کہیا کہ اسیں جاناں دا نذرانا دے رہے آں تے جس طرحاں ساڈیاں عظیم فوجاں تے ایجنسیاں نے جاناں دے نذرانے دے کے دہشتگردی نُوں ختم کیتا اے ایس طرحاں دنیا وچ کدھرے مثال نہیں ملدی۔