دہشتگرداں دا دُبارا منظم ہونا پاکستان لئی سبھ توں وڈا خطرا: جنرل کینیتھ ایف میکینزی……٭رویل خبر٭

واشنگٹن (نیوز ڈیسک) امریکی جنرل نے خبردار کیتا اے کہ داعش تے القاعدا ورگے گرُپاں دے دہشتگرداں دا دُبارا منظم ہونا پاکستان لئی سبھ توں وڈی تشویش ہووے گی۔ امریکی سینٹرل کمانڈ (سینٹ کام) دے کمانڈر جنرل کینیتھ ایف میکینزی نے حالیا پینٹا گون بریفنگ دے دوران خبردار کیتا کہ افغانستان توں امریکا دے انخلاء دے بعد القاعدا تے داعش دے دہشتگرداں دا دُبارا منظم ہونا سبھ توں وڈا خطرا ہووے گا جہناں اُتے جے دباء نہ رکھیا گیا تے دُبارا وجود وچ آ جان گے‘ جہڑے ساریاں گوانڈھی ریاستاں خاص طور اُتے پاکستان لئی انتہائی تشویشناک ہووے گا۔ سینٹ کام دے آگو جنرل میکینزی پاک‘افغان خطے وچ ساریاں ا مریکی عسکری سرگرمیاں دے ذمے دار نیں۔ پینٹا گون ولوں چالو ہفتے جاری کیتے گئے اوہناں دے بیان دے مطابق جنرل کینیتھ میکنزی نے ہور کہیا کہ ایہناں دی کمانڈر تے امریکی سفارتکار‘ افغانستان دے گوانڈھی ملکاں دے نال امریکا دے انخلاء دے بعد دہشتگرداں دا مقابلا کرن لئی فوج تے طیارے تعینات کرن دے معاہدے اُتے کم کر رہے نیں۔ پاکستان تے ہور ملکاں دی داخلا سیاست ولوں واشنگٹن نُوں خطے وچ فوجی بیس رکھن توں روکن دے بارے اوہناں نے کہیا کہ ’ایہدا حتمی فیصلا امریکا قومی سطح اُتے کرے گا۔ افغانستان وچ 18 سالا جنگ دے ابتدائی سالاں دے دوران امریکا نے اپنے ڈرون مشنز لئی بلوچستان دی شمسی ائر فیلڈ استعمال کیتی سی۔ جنرل کینیتھ میکنزی نے کہیا کہ اوہ ہُن ایہدا حل لبھ رہے نیں کہ افغانستان وچ عدم موجودگی دے باوجود امریکا کویں علاقے وچ انسداد دہشتگردی اپریشنز کر سکدا اے۔ اوہناں نے کہیا کہ ’میں سیکرٹری دی ہدایت اُتے تفصیلی منصوبا بندی کر رہیا آں تاں جے مختلف آپشنز ساہمنے لیا سکاں‘ میں کجھ متبادل تجویزاں دے نال ایہناں نُوں ایس مہینے دے آخر تک دُبارا رپورٹ پیش کراں گا‘۔ اوہناں دا کہنا سی کہ ’انخلاء دا مطلب ایہ نہیں کہ امریکا داعش‘ القاعدا ورگے گرُپاں یاں طالبان دے رحم و کرم اُتے ہووے گا کہ اوہ جدوں چاہن مسئلے کھڑے کرن تے ساڈے مفادات نُوں خطرے وچ پان‘۔ سینیٹ کام آگو نے ہور کہیا کہ دہشتگرداں دا دُبارا منظم ہونا صرف امریکا یاں پاکستان لئی خطرا نہیں اے‘ ایہ سارے جنوبی ایشیائی ملکاں توں شمال تک خطرا نیں سگوں میرے خیال وچ ایہ مغرب وچ ایران لئی وی خطرا نیں‘ مستحکم افغانستان وچ سبھ دے مفادات نیں۔