kraamaat@gmail.com
+ +92 333-430-6384


کرونا دی تیجی خطرناک لہر جاری،آکسیجن دا سٹاک مُکن لگا، پورے ملک وچ مثبت کیساں دی شرح 9.6 فیصد رہی۔۔۔٭رویل خبر٭


نمائندا رویل April 27, 2021


لاہور /راولپنڈی (نیوز ڈیسک) کرونا دی تیجی لہر دا قہر‘لاہور دے وڈے ہسپتالاں وچ آکسیجن دا سٹاک ختم ہون لگا‘ ہور 70 بندے واصل‘ 4 ہزار 825 نویں کیسز رپورٹ‘ 16 شہراں وچ فوج تعینات۔ تفصیلا ت دے مطابق کرونا دی تیجی لہر ہور شدت اختیار کر گئی اے‘ 24 گھنٹیاں دے دوران 70 بندے مَوت دی نیندر جا سُتے‘ ہلاکتاں دی گنتی 17 ہزار 187 ہو گئی اے‘ 4 ہزار 825 نویں روگی وی رجسٹر ہوئے۔ این سی او سی دے مطابق پورے ملک وچ کرونا روگیاں دی گنتی 8 لکھ 45 تک پہنچ گئی اے جد کہ 4862 روگیاں دی حالت ماڑی اے۔ پورے ملک وچ مثبت کیساں دی شرح 9.6 فیصد رہی۔ دوجے پاسے ڈی جی آئی ایس پی آر میجر جنرل بابر افتخار نے کہیا اے کہ عالی وباء کرونا وایرس دے ودھدے خطریاں دے پیش نظر ملک دے 16 متاثرا شہراں وچ فوج نُوں تعینات کر دِتا گیا اے۔ پاک فوج دے ترجمان میجر جنرل بابر افتخار دا میڈیا نُوں بریفنگ وچ کہنا سی کہ پاکستان وچ کرونا دی تیجی خطرناک لہر جاری اے جہدے نال ہر دن مَوتاں وچ وادھا ہو رہیا اے۔ پاکستان وچ کرونا دے 90 ہزار ایکٹو کیسز موجود نیں۔ میجر جنرل بابر افتخار دا کہنا سی کہ عالمی وباء دی صورتحال دے پیش نظر ملک دے 16 شہراں وچ فوج نُوں تعینات کر دِتا گیا اے۔ پاک فوج دے جوان ملک دے ہور قانون نافذ کرن والے اداریاں دی بھرویں مدد کرے گی۔ اوہناں دا کہنا سی کہ ملک وچ کرونا دی تیجی لہر نال پورا خطا متاثر ہویا اے۔ ایس ویلے آکسیجن دی پیداوار دا 75 فیصد شعبا صحت لئی مختص اے۔ ملک وچ570بندے وینٹی لیٹرز اُتے نیں‘ 4 ہزار 300 روگیاں دی حالت ماڑی اے۔ کرونا ایس او پیز اُتے عملدرآمد کر کے ای اسیں ایس وباء توں محفوظ رہ سکدے آں۔ پاک فوج دے ترجمان نے واضح کیتا کہ پورے ملک وچ پاکستان فوج نُوں سول اداریاں دی مدد لئی سدیا گیا اے۔ پشاور‘ مردان‘ چار سدا‘ لاہور‘ فیصل آباد‘ سندھ‘ کراچی‘ حیدر آباد‘ کوئٹہ‘ ازاد کشمیر تے مظفر آباد وچ پازیٹو کیسز انتہائی بُہتے نیں جد کہ 51 شہراں وچ کرونا مثبت کیسز دی شرح 5 فیصد توں بُہتی اے۔ اوہناں نے دَسیا کہ فوج نُوں سول اداریاں دی مدد لئی سدیا گیا ا‘ ہر ضلع دی سطح اُتے آرمی دستے سول انتظامیا دی مدد لئی صبح 6 وجے پہنچ چکے نیں۔ جہڑے موجودا وبائی صورتحال وچ لوکائی دی حفاظت نُوں یقینی بنان گے۔ ڈویژن دی سطح اُتے بریگیڈیئر تے ضلع دی سطح اُتے لیفٹیننٹ کرنل معاملات ویکھن گے۔ اوہناں نے کہیا کہ رمضان المبارک دا مہینا سانوں احساس تے نظم و ضبط دا درس دیندا اے‘ بحیثیت قوم سانوں پہلے توں وی ودھ احتیاط تے رَل کے اجتماعی تے انفرادی ذمے داریاں نُوں نبھانا پوے گا۔ اوہناں دا کہنا سی کہ ساریاں صوبائی ایپکس کمیٹیاں دی میٹنگز ہفتے وچ 1 دن ہووے گی۔ اوہناں نے کہیا کہ فوج دا کم ہنگامی حالات وچ سول اداریاں دی مدد کرنا ا تے پاک فوج ازمایش دی ایس گھڑی وچ لوکائی دیاں توقعات اُتے پورا اُترے گی۔ جد کہ پاک فوج نے انٹرنل سیکیورٹی الاؤنس نہ لین دا فیصلا کیتا اے۔ اوہناں نے کہیا کہ ایس ویلے صحت د ا شعبا شدید دباء وچ اے‘ ملک وچ آکسیجن دی کُل پیداوار دا 75 فیصد صحت دے شعبے لئی مختص اے‘ پر جے کرونا دی صورتحال خراب ہوئی تے صنعتاں لئی مختص آکسیجن ہسپتالاں نُوں دینا پوے گا۔وسیلیاں مطابق عالمی وباء کرونا وایرس دی تیجی لہر وچ ڈاڈھ دے بعد لوکائی نُوں ایس او پیز اُتے عملدرآمد کروان لئی پاک فوج نے لاہور دا کنٹرول سانبھ لیا اے۔ وسیلیاں مطابق کسے بندے نُوں غیر ضروری طور اُتے گھر توں نکلن دی اجاز ت نہیں ہووے گی۔ ایمرجنسی دی صورت وچ شناختی کارڈ وکھانا لازمی ہووے گا۔ سرکاری ملازمین دفتر دا کارڈ وکھا کے سرگرمیاں جاری رکھ سکن گے۔ فوج 150 گڈیاں اُتے گشت کرے گی۔ اودھر لاہور دے 7 وڈے ہسپتالاں وچ آکسیجن دا سٹاک صرف 16 توں 24 گھنٹے دا رہ گیا اے۔ لاہور دے میو‘ سروسز‘ جناح‘ لاہور جنرل‘ گنگا رام‘ پی کے ایل آئی تے شیخ زاہد ہسپتال وچ 24 گھنٹے تک دا آکسیجن موجود اے۔ ہسپتال انتظامیا دا کہنا اے کہ آکسیجن پلانٹ تے بیک اپ سلنڈرز نُوں وی بھروایا جا رہیا اے۔ ایم ایس جنرل ہسپتال دا کہنا اے کہ متھی ماترا گھٹ ہون نال آکسیجن پریشر متاثر ہوندا اے‘ ہر 18 گھنٹیاں دے بعد آکسیجن سپلائی دی ضرورت ہوندی اے۔ آکسیجن دا استعمال معمول توں 5 گناہ بُہتا اے۔ سروسز ہسپتال وچ 16 گھنٹے دی آکسیجن سپلائی دا بیک اپ موجود اے جد کہ جنرل ہسپتال وچ 30 گھنٹے دا بیک اپ موجود اے۔ میو ہسپتال وچ 19 گھنٹیاں دا بیک اپ موجود ا تے جناح ہسپتال وچ 17 گھنٹیاں دا آکسیجن بیک اپ موجود اے۔ گنگا رام ہسپتال وچ 30 گھنٹیاں دا بیک اپ موجود اے جد کہ شیخ زاہد ہسپتال وچ 50 گھنٹیاں دی آکسیجن سپلائی دا بیک اپ موجود اے۔ایس توں وکھ شہر قائد وچ کرونا وایرس دیاں سبھ توں خطرناک قسماں دے 2 کیسز ساہمنے آئے نیں‘ وائرس دی تصدیق ضلع وسطی دے علاقے نارتھ کراچی دے رہایشی ذیشان شیخ وچ ہوئی اے۔محکما صحت دے وسیلیاں مطابق ذیشان شیخ نامی شہری وچ کرونا وایرس دی سبھ توں خطرناک قسم پائی گئی اے‘ ذکر کیتا وایرس سبھ توں ودھ تیزی نال کھلرن والا ورژن اے تے ایہ وائرس برطانیا تے انڈیا نال رلدا اے۔