کرونا وایرس نال57بندے جان دی بازی ہارے، 3060 نویں کیس رپورٹ……٭رویل خبر٭

لاہور (نیوز ڈیسک) ملک وچ کرونا وائرس نے ہور 57 بندیاں دی جان لے لئی جد کہ 3060 نویں کیس رپورٹ ہوئے نیں۔ نیشنل کمانڈ اینڈ اپریشن سینٹر دے آنکڑیاں دے مطابق پچھلے دن ملک وچ کرونا دی تشخیص لئی 58 ہزار 670 ٹیسٹ کیتے گئے جد کہ 3 ہزار 60 بندیاں وچ ایہدی تشخیص ہوئی‘ ایس طرحاں ملک وچ کرونا مثبت کیسز دی شرح 5.21 فیصد رہی۔ این سی او سی دے مطابق پچھلے دن کرونا دے ہور 2 ہزار 639 روگیاں نے ایس وائرس نُوں شکست دِتی اے‘ ایس طرحاں ہُن تک ملک وچ ایس وباء توں شفا یاب ہون والے مصدقا روگیاں دی گنتی 8 لکھ 20 ہزار 374 اے۔ کرونا وباء نال ہور 57 مَوتاں دے بعد ایس وباء نال مرن والیاں دی مجموعی گنتی 20 ہزار 308 ہو گئی اے۔ دوجے پاسے وزیر اعلا سندھ سید مراد علی شاہ دی صدارت ہیٹھ پیر نُوں کرونا وائرس بارے صوبائی ٹاسک فورس دا اجلاس وزیر اعلا ہاؤس وچ منعقد ہویا۔ اجلاس وچ کرونا وائرس دی صورتحال دا جایزا لیا گیا تے ایہدی شدت دے پیش نظر مناسب وجھاں دے علاوا رات 8 وجے دے بعد توں لوکاں دی غیر ضروری آوا جائی‘ پیدل یاں گڈیاں وچ سفر کرن اُتے پابندی عاید کر دِتی گئی اے۔ اجلاس نُوں دَسیا گیا کہ پچھلے 1 ہفتے 17 توں 23 مئی دے دوران کرونا وائر س نال ضلع شرقی بُری طرحاں متاثر رہیا جتھے 21 فیصد کیسز تے 19 مَوتاں رپورٹ ہوئیاں۔ ضلع جنوبی وچ 16 فیصد کیسز تے 9 مَوتاں ہوئیاں‘ وسطی وچ 10 فیصد کیسز تے 12 مَوتاں رپورٹ ہوئیاں۔ حیدر آباد وچ 11 فیصد کیسز تے 22 مَوتاں رپورٹ ہوئیاں۔ ہفتا وار رپورٹ دے مطابق کراچی وچ تشخیص دی شرح 12.67 فیصد‘ حیدر آباد وچ 10.79 فیصد تے صوبے دے ہور حصیاں وچ 4.53 فیصد رہی۔ ایس موقع اُتے وزیر اعلا سندھ نے انتظامیا نُوں متنبا کیتا کہ اوہ ایس او پیز اُتے عملدرآمد وچ سختی کرن تے حکومت ولوں عائد پابندیاں اُتے عملدرآمد کروان‘ دوجی صورت سخت کارروائی عمل وچ لیاندی جاوے گی۔ اوہناں نے کہیا کہ میں پابندیاں اُتے عمل درآمد دا جایزا لین لئی ذاتی طور اُتے شہراں دے اچانک دورے کراں گا۔