پنجاب دے 16 ضلعیاں وچ ایڈز مرکز قایم……٭رویل خبر٭

لاہور (نیوز ڈیسک) پنجاب دے 16 ضلعیاں وچ ایڈز دے مرکز قایم کیتے جا چکے نیں جتھے ایڈز روگیاں نوں وایرس دی سکریننگ‘ ٹیسٹ تے دوائیاں مفت دِتیاں جا رہیاں نیں۔ پنجاب وچ ایچ آئی وی وچ مبتلا ہوون دے بعد وچ ایڈز دا شکار ہون والیاں دی گنتی 12ہزار اے۔ ایہ گل ڈاکٹر فیصل مسعود نے لاہور ریڈیو دے پروگرام وچ دسی جہدے میزبان تے پروڈیوسر مدثر قدیر سن۔ایڈز کنٹرول پروگرام پنجاب دے ڈایریکٹر ڈاکٹر فیصل مسعود‘ دوائی ماہر نورمہر تے پروفیسر آف میڈیسن جناح ہسپتال‘ ڈاکٹر خالد محمود خان ایس پروگرام وچ رلتی سن۔ ڈاکٹر خالد محمود خان نے بلڈ پریشر نوں چپ قاتل آکھیا جہدیاں علامتاں دا عام کر کے پتا نہیں لگدا پر فالج دے حملے یاں برین ہیمریج دا کارن بن سکدا اے۔ ایہدے لئی ننبو پانی دی ورتوں‘ کیلشیم دی گولی‘ پھلاں دا رس تے لون دی گھٹ ورتوں فایدے مند اے۔ دوائی ماہر نور مہر نے آکھیا کہ جے وزن ودھ ہووے تاں اوہنوں فوری گھٹ کیتا جاوے۔ اک کلو وزن گھٹاون نال بلڈ پریشر دو ڈگری گھٹ جاندا اے۔